هەوراز كاوه
محەممەد سەڵاح -ی ئەستێرەی یانه‌ی لێڤه‌پوڵ، جارێکی دیکە له خولی ئینگلیزیدا وه‌ك پاڵه‌‌وان ده‌ردەکەوێت، ئەمەش لەبەر ئەوەی جێدەستی لەسەر ئاست و ئەنجامەکانی ئەم وەرزەی لیڤەرپوڵ د‌یارە.
ئەم یاریزانە، گرێبەستەکەی لەگەڵ یانە سوورەکه، مانگی حوزەیرانی 2025 کۆتایی دێت، بەڵام سەڵاح گۆڵکاری دیاری یانەکەیه، كه‌چی وەک ئەوەی گرێبەستێکی هه‌میشه‌یی هەبێت باشترین ئاست پێشكه‌ش ده‌كات، لە کاتێکدا زۆرێک له چاودێران وای دەبینن و چاوەڕوانی ئەوەن ئەمساڵ کۆتا وەرزی سەڵاح بێت لەگەل لێڤەر و دووریش نییه خه‌ڵاتی باڵۆن دۆریش بباته‌وه.
خەڵاتی باڵۆن دۆر لەلایەن گۆڤاری فرانس فۆتبۆڵەوە، لە مانگی تشرینی یەکەمی هه‌موو ساڵێك به چاكترین یاریزانی جیهان ده‌درێت، پێدەچێت سەڵاح ئەمساڵ شایانی ئەوە بێت بۆ یەکەمجار خەڵاتەکە بەدەستبهێنێت، ئەمەش دوا هه‌له بۆی، تا لە ژیانی وەرزشیی خۆیدا له‌گه‌ڵ یانه‌ی لێڤه‌رپوڵ، پاش هه‌شت ساڵ به‌ده‌ستی بهێنێت.
ده‌وترێت ئه‌م وه‌رزه سەڵاح، بۆ یەکەمجار لە ژیانی وەرزشیی خۆیدا چانسی هەیە، تۆپی زێڕین بباته‌وه، دوای ئەوەی ساڵی ڕابردوو ناوی لە لیستەکەدا هه‌ر نه‌بوو، چونكه به‌هۆی پێكانه‌وه، ئاماره‌كانی خراپ بوون، بەڵام پێدەچێت ئه‌مساڵ جیاواز بێت، لە وەرزی پێشوو. ئه‌وه‌تا سەڵاح دوای 25 هه‌فته له خولی ئینگلیزی بە تۆمارکردنی 23 گۆڵ لە پێشەنگی گۆڵکارانی پرێمەرلیگدایە، ئەمەش مانای وایە لە مانگی تشرینی یەکەمدا، ڕەنگە لە پێشەنگی لیستی پاڵێوراوانی تۆپی زێڕینی 2025 دا بێت.
پێدەچێت ئه‌مساڵیش پێشبڕکێی تۆپی زێڕین پەیوەست بێت بە کۆمەڵێک هۆکارەوە، دیارترینیان ئەنجامی بەکۆمەڵی تیپه‌كان، پێش دەستکەوتە تاکە کەسییەکان، وه‌ك چۆن ساڵی ڕابردوو رۆدری ئیسپانی خەڵاتەکەی بەدەستهێنا دوای ئەوەی وڵاتەکەی جامی نەتەوەکانی ئەوروپای 2024 - ی بەدەستهێنا.
سەرەڕای ئەوەی مان سیتی نازناوی چامپیۆنس لیگی نەبردەوە، رۆدری سوودی لە باڵادەستی ناوخۆیی تیپەکەی وەرگرت و لە سوپرایزێکی سەرسوڕهێنەردا، لە ڤینیسیۆس جونیۆر باشتر بوو، بەتایبەتی ئەوه‌ی دووەمیان له‌گه‌ڵ یانه‌ی ڕیاڵ مەدرید چوار نازناوی برده‌وه، دیارترینیان چامپیۆنس لیگ و سوپەری ئەوروپی بوو، كه‌چی خه‌ڵاته‌كه‌ی دۆڕاند.
بۆیه سەرەتا پێویستە سەڵاح نازناوێک لەگەڵ لیڤەرپوڵ بەدەستبهێنێت، لەوانە پریمەرلیگ یان چامپیۆنس لیگ، ئەمەش لە غیابی رکابەرییەکانی هەڵبژاردەی میسردا، جیاوازی لە ڕیزبەندیدا بۆ دروست دەکات.
ده‌وترێت محمد سەڵاح بە تەنیا لە کێبڕکێی نازناوەکەدا نابێت، ئه‌ویش لەبەر رۆشنایی ئەو پێوەرانەی ئێستا و تەنانەت
قۆناغی بردنه‌وه‌ی تۆپی زێڕین، چونكه یاریگاکانی تۆپی پێی جیهان شاهیدی درەوشانەوەی چەند ناوێکی ترن، وەک رافینهای بەرازیلی و لامین یاماڵی ئیسپانی لە یانەی بارسیلۆنا، هه‌روه‌ها کیلیان مباپێی فەرەنسی، کە ماوەیەکە بە بەهێزی گەڕاوەتەوە ڕیاڵ مەدرید.
بێگومان یاریزانانی بارسیلۆنا و ڕیال مەدرید گەورەترین مەترسین لەسەر سەڵاح، بەدڵنیاییەوە کلیلی سەرکەوتنی بۆ سەر شانۆی پاریس لە ئۆکتۆبەری داهاتوودا، بەستراوەتەوە بەوەی ده‌بێت لیڤەر نازناوی چامپیۆنس لیگ بباتەوە، به‌وه‌ش ده‌كه‌وێته پێش ته‌واوی هێرشبه‌رانی جیهان.
