شەهیدانی زیندوو لە (سەنگەر و خوێن) دا

ناوی كتێب: سەنگەر و خوێن
كۆكردنەوە و ئامادەكردنی: ئەمیرە محەمەد
بەرهەمی بۆردی هۆشیاری- مەكتەبی راگەیاندن و هۆشیاری یەكێتیی نیشتمانیی كوردستانە.
كتێبی زنجیرە 23ی پڕۆژەی دیاریی ئازادی
چاپخانەی رۆژهەڵات- هەولێر

70 تێكۆشەری یەكێتیی نیشتمانیی كوردستان لەم كتێبەدا بەشێكی چیرۆكی ژیان و خەباتی خۆیان گیڕاوەتەوە

شەهیدانی زیندوو، بەو تێكۆشەرانە دەوترێت كە بە رێكەوت ماون و هێشتا رۆژیان تەواو نەبووە، دەنا لە شەڕ و ئاگربارانەكاندا بوون و بە سەختی پێكراون و پارچەی تەقەمەنییەكان بە قووڵی چۆتە جەستەیانەوە، بەشێكی زۆری جەستەشیان چ لە ناوەوە و چ لە دەرەوە لە دەستداوە، هەیانە هەردوو چاوی و هەشیانە هەر دوو دەستی، یان هەردوو قاچەكانی نەماون.
ئەوانە، پێشمەرگە و تێكۆشەری گەلێكن و لە كایەی خەباتیاندا، دووچاری ئەو ژیانە پڕ لە تراژیدیایە بوونەتەوە و ئێستا (پێشمەرگە كەمئەندامەكانی سەنگەر)یان پێدەوترێت.

ئەوان هێشتا نیشتمان و خەڵک و باوەڕەکەیان خۆشدەوێت
ئەمیرە محەمەد، كە نووسەر و ئامادەكاری زنجیرە كتێبەكانی پڕۆژەی (دیاریی ئازادی)یە، كتێبی ئەمجارەی پڕۆژەكەی تەرخانكردووە بۆ ئەو توێژە گرنگەی خەباتگێڕان و ناوێكی شایستە و شایانی، بۆ  قوربانیدانەكانیان هەڵبژاردووە، ئەویش (سەنگەر و خوێن)ە.
بەڵێ، سەنگەر و خوێن گونجاوە و لانی كەم جۆرێكە لە راڤە و پیشاندانی واقعی ژیانیان، ژیانێك بەبێ بەشێك و بگرە بەبێ چەند ئەندامێكی گرنگی جەستەیان. رۆژانە ئەو تێكۆشەرانە، بەردەمماندا گوزەر دەكەن و لە جەنجاڵیی ژیاندا سەرنجمان ناچێتە سەریان، یان چاومان تێربووە و ئەوپەڕەكەی بە گۆشەی نیگایەکی سەرچیخ سەیریان دەكەین، بەڵام ئەگەر وردببینەوە لە ژیانیان، ئەگەر بگەڕێینەوە بۆ ساتی یەكەمی رووداوەكەیان، ئەگەر چیرۆكی پڕ لە تراژیدیای كاتی چارەسەر و دوای چارەسەریان ببیستین و بخوێنینەوە، ئەوسا دڵەكان دەكەونە ژان و دەروونمان دەكەوێتە هەژان.
كتێبەكە ئاوێنە و رێنماییەكە بۆ ئەو واقیعەی رۆژانە دەیبینین و رەنگە هەستی پێنەكەین، لە دەرگادانێكی بیركردنەوە و وردبوونەوەمانە لەو مرۆڤانەی وەك ئێمە، بەبێ كەموكوڕیی و بە جەستەیەكی تەواوەوە لە دایكبوون و چوونە سەر رێگەی ژیان، بەڵام لە رێگەی خەباتدا و لە پێناو ئێمەدا، ئەو قوربانییەیان داوە.بەڵێ، كتێبەكە ئەوەمان پێدەڵێت و راماندەچڵەكێنێت بەرامبەر بەرپرسیارێتی هەست و ویژدانمان.
مرۆڤێك هەردوو چاوی لە دەستداوە و بۆ كەمترین فرمانی رۆژانەی (وەک: ئاوخواردنەوە)، پێویستیی بە هاوكاریی كەسێكی دیكەیە، هەیە قاچەكانی لە دەستداوە و هەست بە بەركەوتنی زەوی ناكات، هەشە دەستی نەماوە و حەسرەتی بەڕێوەبردنی كارەكانی رۆژانەی، بەردەوام دەیهاڕێت. ئەمە دەبێت خەمی هەموومان بێت و لەگەڵ ئازارەكانیاندا بژین، دەبێ لە مامەڵە و هەڵسوكەوتمان لە تەكیاندا، میهرەبان و بەسۆز بین، هاوكار و یاردەدەریان بین، بەڵام نەك وەك بەزەیی و دەستگیرۆیی كەسێكی پەككەوتە، بەڵكو وەك ئەمەك و وەفا، وەك رێز و پێزانین، پێزانین بەوەی كە ئەوان لە پێناو ئێمەدا وایانلێهاتووە و بەشێك لە پێویستترین ئەندامەكانی جەستەیان لە دەستداوە، لە قۆناغەكانی خەباتی رزگاریی نیشتماندا، لە دەستی بەعسی داگیركەر وایانلێهاتووە، لە پاراستنی كوردستانەكەمان لە دەستی تیرۆریستانی داعش وایان بەسەر هاتووە. ئەوانە بۆ ئێمە و لە پێناو هەمووماندا قوربانییان بە خۆیانداوە، هەر وەك چۆن شەهیدەكانی هاوڕێ و هاوسەرنگەریان، قوربانییان بە ژیان و گیانی خۆیاندا و بۆ ئێمە و وڵاتەكەمان شەهیدبوون، ئەوانیش بەو چەشنە چوونە گۆڕەپانی ئاگرەوە، بە رێكەوت شەهید نەكراون و بە نیوە جەستەوە، لە سەنگەرە خوێناوییەكانەوە گەڕانەوە بۆ ژیان.
سەرەڕای ئەو واقیعەش، ئەوان هێشتا مرۆڤە ئازاكانی نیشتمانن، رۆڵە دڵسۆزەكەی كوردەوارین و ئەگەرچی بەشێكی گرنگی جەستەیان لە دەستداوە، بەڵام ئیرادە و هێزیان وەك خۆیەتی و جەسوورییان لێدەبارێت، ئەوان هێشتا نیشتمان و خەڵك و باوەڕی خۆیان خۆشدەوێت.
لە كتێبەكەدا، بەشێك لەو تێكۆشەرانە بەسەركراونەتەوە، ژمارەیان 70 كەمئەندامی سەنگەرە و مشتێكە لە خەرواری هەزاران قارەمان و گیانفیدا.
70تێكۆشەری یەكێتیی نیشتمانیی كوردستان، لەم كتێبەدا بەشێكی چیرۆكی ژیان و خەباتی خۆیان گیڕاوەتەوە، باسی زۆر رووداو و بەسەرهاتی جۆراوجۆری كایەی تێكۆشانی گەلەكەیان گێڕاوەتەوە، باسی هاوڕێ شەهیدەكانیان و زۆر بابەتی دیكەی ئەو سەردەمەیان كردووە، تا دەگاتە یەكەم چركەی پێكران و خوێناوی بوونی بەرگی بەرخودانیان، برینداربوون وكەمئەندامبوونیان، پاشان قۆناغی چارەسەر و دەستپێكردنی ژیانێكی نوێ، ژیانێك بەبێ بەشێكی جەستەیان.
چیرۆكەكان هی قۆناغە جیاوازەكانن، لە پێشمەرگایەتیی سەردەمی شاخەوە تا دەگاتە شەڕەكانی دژ بە تیرۆریستانی داعش.
پڕۆژەی شەهیدبوون
ئەمیرە محەمەد، ئامادەكاری كتێبەكە پێشەكییەكەیدا نووسیویەتی: ئەم كتێبە كە دەیخوێنیتەوە، بەرهەمی رەنجێكی بە ئازارە بۆ تۆماركردنی مێژووی زارەكیی میللەتێكی عەوداڵی ئازادی و دیموكراسی، كە لە زمانی 70 قارەمانی رووداوەكان و نەبەردە ئەفسانە ئاساكانەوە خراونەتە سەر كاغەز، ئەوانە بەشێكن لە چوار هەزار پێشمەرگەی كەمئەندامبووی سەنگەر و خەبات و فیداكارییەكانی یەكێتیی نیشتمانیی كوردستان.
نووسەر دەشڵێت:
گێڕانەوەی ئەو سەروەرییانە، تەنیا هەر چیرۆكی خودی پێشمەرگە پێكراوەكان نییە، بەڵكو فیلمنامەیەكە گەورەیی دڵی كەسوكارەكانیان و دڵسۆزیی هەڤاڵەكانیان و دانیشتوانی دێهاتەكان و خەمخۆریی پزیشك و كارمەندە تەندروسیتییەكانی شۆڕش وێنا دەكات، كە لە بارودۆخێكی یەكجار دژوار و سەختدا، بە سەرەتایترین كەرەستەی پزیشكی و ورەی بەرزەوە، گیانی پێشمەرگە بریندارەكانیان، لە چنگی مردن دەرهێناوە.
لە بەشێكیدیکەی پێشەكییەکەدا هاتووە: ئەم حەفتا قارەمانەی گەلەكەمان، لە گێڕانەوەی چیرۆكەكانیاندا پێمان دەڵێن: پێشمەرگە، بەتایبەت لە فەرهەنگی یەكێتیی نیشتمانیی كوردستاندا، هەمیشە پڕۆژە بووە بۆ شەهیدبوون لە پێناوی بەدیهێنانی مافە دیموكراسییەكانی خەڵكی كوردستاندا.