دڤێت دگەل هەر گوهورینەكا د سیستەمێ پەروەردێدا، ماموستا ژی دگەل بهێنە راهێنانكرن و خۆل بۆ بهێنە ڤەكرن كا دێ چاوان شێت ل سەر ماددێ خوە زال بیت و دێ چاوان شێت ڤی ماددەی گەهینتە خوێندكاری
پەیوەندییا دناڤبەرا مامۆستایی و خوێندكاریدا، ژ پەیوەندیێن هەرە گرنگ و هەستیارە. ژبەركو قوتابخانە ب مالا دوویێ یا خوێندكاری دهێتە ناسكرنێ و ل وێرێ ئەو فێری پەروەردێ و فێركرنێ دبیت، بوویە زوورا پێدڤییە مامۆستا ژی لدویڤ سەردەمی خوە بگونجینیت، دا كو بشێت باوەری و رێزگرتنا خوێندكاری بدەستڤە بینیت. لێ دەما مامۆستا ژ روویێ تەمەنی ڤە یێ مەزن بیت، ئەو سالێن ئەو تێدا مەزن بووی، ئەو سالێن وی تێدا وانە گوتین رەنگە دگەل ئەڤرۆیا نوكە گەلەك گوهورین هەبن و ئەگەر مامۆستا هەر ل سەر هەمان شێوازێ وانەگوتنێ ما یێ بەری 20 سالان، پێنەڤێت دێ خوێندكار ژ وانا وی بێزار بن. ژبەر ڤێ چەندێ ژی دێ گەلەك گوھلێبی كو ھندەك خوێندكار ژ وانا مامۆستایەكێ تایبەت درەڤن یان ئەو ژ وانا وی بێزار دبن و د حالەتەكێ هوسادا، ئەو نەشێن مفای ژڤێ وانێ وەربگرن و دیسان بۆ مامۆستایی بخوە ژی رەنگە یا نەخوش بیت، دەما خوێندكار د پولێدا دگوھدار نەبن و ھزرا وان بۆ لایەنەكێ دی چبیت یان ژی نەشێن دروست د وانەیێ بگەھن و ئەڤێ ژی رەنگە پەیوەندی ب وان گوهورینێن ل سەر سیستەمێ پەروەردێ دا هاتی، گوهورینێن بەردەوام یێن ب سەر ماددێن خواندنێدا دهێن، دێ بینی بۆ نموونە هێشتا ل قوناغا بنەرەتی بتنێ بۆ ماددێ زانستێ دێ دوو پەرتووكان بینی ئێك بۆ وەرزێ ئێكێ و یا دی بۆ وەرزێ دوویێ و هەر پەرتووكەك بخوە ب قەد ماددەكێ سالێ هەمیێ یە و لڤێرە دا دویراتیەك دناڤبەرا حەزكرنا خوێندكاری بخوەدا دروست بیت كو نەشیاییە دروست وانێ بگەهینیت و ئێدی نەشێت وانا خوە كونترول بكەت و ماموستا ژی ژبەركو نەشیاییە خوە دگەل وێ گوهورینێ و ڤان پەرتووكێن نوی بگونجینیت، ئێدی وانە گوتن ژی بۆ وی ب زەحمەت دكەڤیت و نەشێت برەنگەكێ پێدڤی تشتێ د ماددەیدا هاتی بگەهینیتە خوێندكاری. لڤێرە ئەگەر گونەها خوە گونجاندنا مامۆستایی ژی نەبیت، دڤێت دگەل هەر گوهورینەكا د سیستەمێ پەروەردێدا، ماموستا ژی دگەل بهێنە راهێنانكرن و خۆل بۆ بهێنە ڤەكرن كا دێ چاوان شێت ل سەر ماددێ خوە زال بیت و دێ چاوان شێت ڤی ماددەی گەهینتە خوێندكاری.
