سەرۆک بافڵ لە دیداری باڵیۆزی ئەمریکادا: ناکرێت گوزەرانی خەڵک بە بابەتە سیاسییەکانەوە ببەسترێتەوە

بافڵ جەلال تاڵەبانی، سەرۆکی یەکێتیی نیشتمانیی کوردستان لە ماڵی مام لە بەغدا پێشوازیکرد لە ئەلینا رۆمانۆسکی، باڵیۆزی ئەمریکا لە عیراق.

لە دیدارەکەدا دوایین پەرەسەندنە سیاسی، ئابووری، ئەمنییەکان و کێشەکانی نێوان هەولێر و بەغدا گفتوگۆیان لەبارەوەکرا و جەخت لە چارەسەری دەستووری و سیاسییانەی کێشەکان کرایەوە بەشێوەیەک کە وەڵامدەرەوەی خواستی هەموو لایەک بێت و سەقامگیریی ناوچەکە پارێزراو بێت.

سەرۆک بافڵ جەلال تاڵەبانی پەرۆشی یەکێتی بۆ چارەسەرکردنی کێشەکانی نێوان هەولێر و بەغدا دووپاتکردەوە و رایگەیاند، ناکرێت گوزەرانی خەڵک و شایستە داراییەکان بە بابەتە سیاسییەکانەوە ببەسترێتەوە، چونکە ژیانی خەڵکەکەمان زۆر لەوە گەورەترە کە بکرێتە قوربانیی ململانێ سیاسییەکان و هەموو هەنگاوێکیش لەپێناوی کۆتاییهێنان بەو دۆخە نەخوازراوە دەگرینەبەر. 
وتیشی، پاراستنی ئارامیی ناوچەکە ئەرکی هەموومانە و دەبێت بەرپرسیارانە مامەڵە لەگەڵ دۆخەکەدا بکرێت، هیچ سەقامگیرییەکیش بەدینایەت ئەگەر بەسەر ئاڵنگارییەکاندا زاڵنەبین و هەموومان لەپێناوی داهاتوویەکی گەشتردا تێنەکۆشین.

دۆخی گشتیی هەرێم و پرسی هەڵبژاردن تەوەرێکیتری دیدارەکە بوون و لەوبارەیەوە سەرۆک بافڵ وتی، پێویستە هەموو پرسە نیشتمانییەکان کۆدەنگیی هەموو لایەنەکانی لەسەربێت و هەموو هەوڵێکیش لە دەرەوەی ئەو ئیرادەیە رەتدەکەینەوە، پێمانوایە پاراستنی قەوارەی هەرێم و بەهێزیمان پەیوەستە بە یەکگرتوویی و یەکهەڵوێستیمانەوە، بۆ ئەمەش لە هەوڵەکانمان بەردەوامین.