شه‌هید ئه‌حمه‌د مه‌دحه‌ت

10:48 - 2024-02-05
ڕاپۆرت
122 جار خوێندراوەتەوە


شه‌هیدی نه‌مر ئه‌حمه‌د مه‌دحه‌ت حسێن، له‌ دایكبووی ساڵی 1964ی گوندی (زه‌ڕین)ی سنووری گه‌رمیان، له‌ خێزانێكی جوتیاری نیشتمانپه‌روه‌ردا گه‌وره‌ بووه‌.
به‌هۆی نه‌بوونی خوێندنگه‌ له‌ گونده‌كه‌یاندا نه‌خراوه‌ته‌ به‌رخوێندن، به‌ڵام له‌ حوجره‌ و له‌لای  مامۆستای ئاینی خوێندویه‌تی فێری خوێندنه‌وه‌ و نووسین بووه‌.
كاتێك ته‌مه‌نی هه‌ڵده‌كشێت و هه‌ستی كوردایه‌تی له‌ ناخیدا چه‌كه‌ره‌ ده‌كات و هه‌ر زوو له‌ رێگه‌ی شه‌هید ئه‌حمه‌د محه‌مه‌د ساڵح (مام باپیر)ه‌وه‌ په‌یوه‌ندی ده‌كات به‌ رێكخستنه‌كانی كۆمه‌ڵی ره‌نجده‌رانی كوردستانه‌وه‌، چاوكراوه‌ و گورج و گۆڵ بووه‌ له‌ خه‌باتی نهێنیدا، بۆیه‌ ده‌بێته‌ ئه‌ندامێكی چالاكی  شانه‌ نهێنییه‌كانی كۆمه‌ڵه‌.
هه‌میشه‌ له‌ كۆششدابوو بۆ خۆپه‌روه‌رده‌كردن، بڵاوكراوه‌كانی كۆمه‌ڵه‌ و به‌رهه‌مه‌ چاپه‌مه‌نییه‌كانی شاخی ده‌خوێنده‌وه‌ و ئاگاداری ئه‌ده‌بیاتی شۆڕش و به‌شێك له‌ روداو و گۆڕانكارییه‌كان بوو.
به‌ره‌به‌یانیی رۆژی 21/9/1985 هێزێكی زۆری سوپای رژێم كه‌ پێكهاتبوو له‌ سه‌رباز و جاش، به‌ هاوكاری و پاڵپشتی چه‌كی دوورهاوێژ و فڕۆكه‌، په‌لاماری گونده‌كانی (زه‌ڕین و دوخڕان و ده‌نگه‌وه‌ره‌ و قه‌بری مه‌لا و بووه‌كه‌ی سنووری تیره‌ی باشكی)یاندا، هێرشێكی به‌ربڵاوبوو هه‌رچی ده‌كه‌وته‌ به‌رده‌ستیان راپێچی مه‌رگیان ده‌كرد، هه‌ر له‌و هێرشه‌دا هه‌ر یه‌ك له‌ (ئه‌حمه‌د مه‌دحه‌ت حسێن و ساڵح قادر ئه‌حمه‌د و قادر محه‌مه‌د نادر و مه‌حمود رۆسته‌م) كه‌ هاووڵاتی بێچه‌ك و سڤیل بوون، ده‌ستگیركران و پاشان به‌ شێوه‌یه‌كی دڕندانه‌ گولله‌باران كران.
سڵاو بۆ گیانی پاكی شه‌هید ئه‌حمه‌د و هاوڕێكانی و سه‌رجه‌م شه‌هیدانی كورستان. 
   سۆران حسێن زه‌ڕین

بابەتە پەیوەندیدارەکان