ئا: بادینان كوردستانی نوێ
هەرێما كوردستانێ و تایبەتی ژی دەڤەرێن سنوری یێن پارێزگەها دھوكێ، یێن بووینە گورەپانا ململانێن سیاسی یێن هەرێمی و ئەڤە بۆ چەندین سالە، توركیا بەردەوام ب فرۆكێن بێ فرۆكەڤان، یا ھێرشی سەر ئاخا هەرێما كوردستانێ دكەت و خەلكێ سڤیل و ژێرخانا ئابووری دكەتە ئارمانج، ب بەهانا ژناڤبرنا بنكە و نەھێلانا گەریلایێن پەكەكێ و د بەرامبەردا، پەكەكێ كو گورەپانا وێ یا شەری ل ناڤ ئاخا توركیایە، بەهانا بۆ توركیا دروست دكەت، كو بەلێ هەبوونا پەكەكێ ل دەڤەرێن سەر سنوری و دناڤ ئاخا هەرێمێ دا یێن هەین و توركیا ژی یا سیاسەتا عەرد سوتنێ و ترساندنا خەلكێ سڤیل دگریتە بەر و دەرئەنجام ژی، هاولاتیێ بێ دەستهەلات یێ دبیتە قوربانی و هەر بۆ نمونە ژی چیرۆكا (مام بەھجەت) خەلكێ گوندێ بلاڤە، كو رەز و باغێ وی هەمی هاتیە سوتن و ئەو دها چلی یا ئەو دبێژیت: «من و هەڤژینا خوە پێكڤە ئەو چلی بری بوو و ب پشتێ كێشا بوو و كربوو تەخە». لێ ل بەرچاڤێن وی هاتە سوتنێ و بتنێ بەرێخوەدان و تەماشەكرن یا بۆ مای.
هاولاتیەكێ گوندێ بلاڤە سەر ب دەڤەرا ئامێدیێ ڤە، لدوور بێدەنگیا حكومەتا هەرێمێ و یا عیراقێ و جڤاكێ نیڤ دەولەتی دبێژیت: «دار برین، بێدەنگی! ئاقار و چەروان هەمی سووت، بێدەنگی! دارێن سەد ساڵی بوونە خولی، بێدەنگی! توپ بناڤ ماڵا کەفتن، بێدەنگی! ژێدەرێن ئاڤێ هشک کرن، بێدەنگی! گوند چۆلکرن، بێدەنگی! خانی هەرفاندن، بێدەنگی! دوژمنێ دیارە و ئەم دنیاسین و وێنە ژی (مام بەهجەت) ب بێدەنگی و هزار گوتن، وەکی تابلۆیەکا هزار رامان ژێ دچن، بەرامبەر زەحمەت و ئیزایا خوە راوەستایە».
جھێ ئاماژێ یە كو ل رۆژا 24/6/2024ێ، ھێزێن توركیا ل هەردوو گوندێن (کێستە و چەلکێ) هاتینە ناڤ ئاخا هەرێمێ و چەندین زیانێن گیانی و ماددی لپشت خوە ھێلانە، هژمارەكا زۆرا رەز و بیستانێن وەلاتیان سۆتینە و هژمارما گوندان ژی هاتینە چولكرن و ب هزارەها دۆنەمێن دارستانێ ژی ئاگر بەربوویێ و ژناڤچووینە و وەلاتیەكێ سڤیل ژی شەھید كرینە.
