سازدانی: نیهاد جامی
ژنێک لەپاڵ نووسینی شیعر، (یۆگا) وەک پسپۆرییی و پیشەی رۆژانەی ژیان دەبینێت، ئەوە رووبەرووی کۆمەڵێک پرسیارم دەکاتەوە لەبارەی ئەو پەیوەندییەوە، ئەو خانمە ناوی سۆزانایە و بە رەگەز ئیسپانییە، لە دوورگەیەکی ئەندەلوس لەدایک بووە بەناوی هاین، ئێستا سەرگەرمی نووسینی یەکەمین کتێبیەتی بە زمانی ئیسپانیی.
*لەکوێوە دەست پێبکەین؟ من پێم باشە سەرەتایەک هەبێت وەک ئەوەی چۆن لە یۆگادا رۆح ئازاد دەکرێت، با هەر بەم رۆحی یۆگایەوە دەست پێبکەین.
سۆزانا: ئەم رۆحیەتەم زۆر پێخۆشە، من خولیای نووسین و شیعر و میتۆدێکی سەراپاگیرم، هەوڵ دەدەم وشەکان وەک رێگەیەک بەکاربهێنم بۆ دەربڕینی بیر و سۆزەکانم.
* کەواتە کەی هەستت بەوەکرد کە شیعری نەنوسراو لە تۆدا هەیە و پێویستە بنووسرێتەوە؟
سۆزانا: لە مناڵییەوە هەستم دەکرد شتێک ئاشکرا دەکەم ئەویش ئەفسوونی پیتەکان بوو لە شێوازی ئەدەبیی جیاوازدا، ئەوە وایکرد پابەندبم بە نووسین و بواری سەراپاگیریی لە گەشتی ئاشکرا کردنی خود و گەشەی کەسێتیدا کە بەقوڵیی ئاماژە بەخش بوو بۆ نووسینی شیعر.
*بەلام تۆ سەرباری ئەوە وەک پسپۆڕیی خەریکی یۆگایت، کاتێک دەکەویتە نێوان نووسین و یۆگا، هەرگیز لەو نێوانەدا ویستوتە بزانیت تۆ دەکەویتە کوێی ئەو پەیوەندییەوە؟
سۆزانا: سوپاس بۆ وروژاندنی پرسیاری وا قوڵ، لە نێوان شوێنی من لەو پەیوەندییەی نووسین و یۆگادا، وای دادەنێم هەردووکیان لە رووی بەهاوە هاوتەریبن، هەر یەکەیان بەشێوازێکی شایستە یەکتریی تەواو دەکەن، نووسین ئەو دەرفەتەم پێ دەبەخشێت تاوەکو بتوانم بیرکردنەوە و هەستەکانم دەرببڕم، لەکاتێکدا تێڕامان پانتاییەکم بۆ دابین دەکات بۆ رامان و پەیوەندیی کردن بە بوونی ناوەکیی خۆمەوە، هەردووکیان کۆمەکم دەکەن بۆ گەشەسەندن و بۆ قوڵبوونەوە لە ناسینی خۆمدا.
*لەو کاتەدا ژیان لەکوێیە لەنێوانیاندا؟ ئێمە خودی ژیان فەرامۆش دەکەین، لە کاتێکدا خۆی ژیانە ئەوانەمان پێ دەبەخشێت، باشتر وایە ئەو تێگەیشتنە بەو پرسیارە بگۆڕم: ئایا خوازیاری ژیان وەک یۆگا قەسیدەیەکی شیعریی و رۆحی بێت؟
سۆزانا: ئەو پرسیارە دەکرێت وەک ئومێدێک بیبینیت لە مندا، هەر بەڕاستی ئومێدێکی نایاب و سەرنجڕاکێشە، هەوڵ دەدەم بەم شێوەیە لەگەڵ ژیان رەفتار بکەم، سەرباری ئەوەی هیوام وایە لە زۆربەی کاتەکاندا بۆ هەموو ساتێک بە قوڵیی و جوانیی دەنگدانەوەی هەبێت، پێویستە دانبەوەدا بنێم ژیان لە توانایدایە سەرکەشیی و سەرسوڕمانی چاوەڕوان نەکراو بخاتە روو، بڕوام وایە ئەوە لە رێی چاندنی داهێنان و رۆحانیەتەوەیە، ئێمە لە تواناماندایە ساتە شیعرییەکان بدۆزینەوە،
تەنانەت لە زۆربەی ئەزموونەکانی رۆژانەشماندا لە ژیاندا.
*ئێمـــە گەیشــــتینە ئـــەو شوێنەی کە تێگەیشـــتنەکە لـە بارەی پەیوەندیی ئەو دواونە ناڕۆشن نەبن، بۆیە دەتوانین بەوە کۆتایی بەگفتوگۆکەمان بێنین: کەواتە یۆگا بۆ تۆ چی دەگەیەنێت؟
ســۆزانــا: لــــە رووی کەســـێتیەوە، یۆگــــا بــە ئامرازێکی بەهادار دادەنێم بـــۆ چـــاودێریی کردنــــی جەستەم، کە بواری ئەوەم پـــێ دەدات ســـــوودێکی تەواو لە بەرجـەستەکردنی تێڕامان ببینم.
