سەردانی وەفدی ئیمرالی كە لە ئەندامانی دەم پارتی، سیری سورەیا ئۆندەر جێگری سەرۆكی گروپی پەرلەمانی دەم پارتی، پەروین بوڵدان جێگری سەرۆكی شارەوانیی وان و ئەحمەد تورك سەرۆكی پێشووی شارەوانیی گەورەی ماردین، پێكدێن بۆ لای لایەنەكان بەردەوامە و لەوچوارچێوەیەدا لەگەڵ ئەحمەد داودئۆغڵو سەرۆكی پارتی ئایندە كۆبوونەوە.
داود ئۆغڵو رایگەیاند: پێویستە مافی كورد لە توركیا پارێزراو بێت و كورد و تورك پێكەوە بە ئاشتی بژین.
دواتر وەفدەكەی ئیمرالی سەردانی پارتی داد و گەشەپێدان-ی كرد و لەگەڵ وەفدی ئاكپارتی كە پێكهاتبوو لە عەبدوڵڵا گولەر سەرۆكی گروپی پەرلەمانتارانی ئاكپارتی و ئەفكان عەلا و عومەر چەلیك، كۆبوونەوە.
هەفتەی رابردووش، وەفدی دەم پارتی لەگەڵ نوعمان كورتولموش سەرۆكی پەرلەمانی توركیا، دەوڵەت باخچەلی سەرۆكی مەهەپە لە پەرلەمان كۆبوونەوە و بڕیارە لەم هەفتەیەدا سەردانی پارتی گەلی كۆماریی بكەن، پاشان جارێكی دیكە سەردانی ئۆجەلان لە ئیمرالی دەكەنەوە. بەپێی لێدوانەكانیش «تائێستا كۆبوونەوەكان ئیجابین».
