شاعيرى نەمسايى
پيتەر تورينى
خۆشەویستيى مرۆڤ نابينا دەکات
پێشينان وايان وتووە،
كەواته دەمەوێت بەمزووانه
ببم به ئەندامى كۆمەڵەی نابينايان و چاوكزان.
گەرەکم دەبێت سەگێک پەیدا بکەم،
لەو سەگانەی یارمەتیی نابینایان دەدەن
لە هاتوچۆدا.
پێویستە شێوەی ماڵەکەم دەستکاریی بكەم،
تاکو بۆ ژيانى نابينايەك بگونجێت.
ئيتر دەبێت هەموو شەوێك
مەشقی لێكدانەوه و خوێندنەوەى
ئەو نووسينانه بكەم
كه لەسەر جەستەی تۆ
بۆ نابينايەك دانراون.
له ئەڵمانيیەوە، داناى شەدەڵە
