بڕیارە ئەمڕۆ بەسەرپەرشتی قوباد تاڵەبانی لێپرسراوی سكرتارییەتی سەرۆك مام جەلال و بەدروشمی:بەدیدگایەكی نوێ؛ بەهێزی و بەرەوپێشچوون و خزمەتگوزاری دووەمین دیداری یەكێتیی نیشتمانیی كوردستان بەبەشداری ژمارەیەكی بەرچاو لە كادرانی یەكێتی و پێكهاتە جیاكانی شارەكە لە موسڵ بەڕێوەبچێت.
لای خۆیەوە فەهمی بورهان لێپرسراوی سكرتاریەتی دیدارەكە رایگەیاند، شاری گەورەی موسڵ مەیدانێكی بایەخداری خەباتی دیموكراتی و نیشتمانیی یەكێتییە بۆیە بە گرنگییەوە لە گفتوگۆ و پێشنیارەكانی دیدارەكەی موسڵ دەروانن.
باسی لەوەشكرد،ئامانجی دیدارەكە وەك لە دروشمەكەیدا دیارە داڕشتنەوەو تاوتوێكردنەوەی دیدگایەكی نوێ و ئامادەكاری و خۆسازدانی یەكێتییە بۆ قۆناغێكی نوێی ژیانی سیاسی و حكومڕانی لە هەرێمی كوردستان.
راشیگەیاند، دیدارەكەیان لە شاری موسڵەوە دەست پێدەكەن و كادرانی یەكێتی و كەسایەتی و پێكهاتەكانی ناوچەكە بەشداری تێدا دەكەن و پاشان لەسەرجەم پارێزگاو ناوچە دیارەكان بەڕێوەدەچێت، لە رۆژانی دیدارەكەدا كادرانی یەكێتی دیدگا و تێڕوانینی خۆیان بۆ داهاتووی حزبەیەكان دەخەنەڕوو.
تەئكیدیشی كردەوە لەوەی ،دیدارەكە هەوڵێكی ترە بۆ بەهێزكردنی پێگەو سەنگی یەكێتی وەك حزبێكی دیارو كاریگەر لەسەر ئاستی هەرێمی كوردستان و عیراق و وڵاتانی ناوچەكەو جیهان خۆگونجاندنی لەگەڵ كۆی ئەو گۆڕانكاریانەی لە ئارادایە.
