بەپێی ئەنجامی سەرژمێریی گشتیی دانیشتوان كە رۆژی 20/11/2024 بەڕێوەچوو، پارێزگای هەولێر بەراورد بە شارەكانی دیكەی هەرێم، زۆرترین رێژەی كرێنشینی تێدایە. كۆمەڵەی كرێنشینانی كوردستانیش ئەوە دەخاتەڕوو كە «پرۆژەكانی نیشتەجێبوون نەیانتوانیوە ئەو رێژەیە كەمبكەنەوە».
كارزان رەسوڵ سەرۆكی لقی هەولێری كۆمەڵەی كرێنشینانی كوردستان بە كوردستانی نوێ-ی راگەیاند: ئەنجامی سەرژمێریی گشتیی دانیشتوانی عیراق، دەریخستووە رێژەی كرێنشینان لە پارێزگای هەولێر 102 هەزار خـێزانە، ئەوەش دەكاتە 26 %ی كۆی دانیشتوانی پارێزگاكە، وتیشی: ئەو رێژەیە دەریدەخات كە هەولێر بەراورد بە پارێزگاكانی دیكەی هەرێمی كوردستان لەڕووی ژمارەی كرێنشینانەوە بە پلەی یەكەم دێت.
سەرۆكی لقی هەولێری كۆمەڵەی كرێنشینان، راشیگەیاند: هۆكاری زۆربوونی رێژەی كرێنشینان لە هەولێر، بۆ نەبوونی هیچ پرۆژەیەكی نیشتەجێبوون بۆ كرێنشینان و كەمدەرامەتان دەگەڕێتەوە، كە لەماوەی چەند ساڵی رابردوودا هیچ پرۆژەیەك جێبەجێ نەكراوە، ئەوانەشی بۆ كرێنشینان دروستكراون، یان تەواونەكراون، یان لە كرێنشینان وەرگیراونەتەوە و دراون بە توێژێكی دیكە، هاوكات ئەو پرۆژانەی لەلایەن كەرتی تایبەتەوە لە سنووری هەولێر دروستكراون، بەهۆی بەرزیی نرخەكانیانەوە، هۆكارێك نەبوون بۆ كەمبوونەوەی رێژەی كرێنشینان و خەڵكی كەمدەرامەت نەیتوانیوە بیانكڕێت یان بەجۆرێك لە جۆرەكان لێیان سوودمەندبن.
تەها عەبدوڵڵا
