ئەو شەوەی بە نیازی گەیشتنە هەولێر لە(گۆمەسپان) بووین

د. عەبدولواحید ئیدریس پێشمەرگەی دێرین


لەم ساڵیادەی راپەڕین دوای 34 ساڵ نامەوێت باسی ئەوە بكەم كێ راپەڕینی كرد و كێ نەیكرد بكەم، لە بابەتێكی تایبەتدا ئاماژەم پێداوە، لێرەدا تەنیا باس لە شەوی 10/11ی ئازاری 1991دەكەم، دوای ئازادكردنی شاری كۆیە لە 9 ی ئازار،  رۆژێك دواتر هێزی پێشمەرگە و جەماوەر بەرەو هەولێر بەڕێكەوتین، پێشمەرگەكان بەشێكی هی بەتالیۆنی هەشتی هەولێر و بەشێكی هی كەركوك بوون، شەهید عەلی نەبیش كۆمەڵێک پێشمەرگەی لەگەڵدا بوو، لەگەڵ چەندان فەرماندەی پێشمەرگە.
لە بەیانییەوە بەڕێكەوتین بەڵام لە رێگا چی رەبایە و سەنگەری دوژمن هەبوو تەسلیم دەبوون، بەڵام بەداخەوە پێش هێزی پێشمەرگە، هێزی پاتاڵ كە تراكتۆر و عەرەبانەیان لابوو، دەگەیشتنە ناو رەبایەكە و چی چەك و فیشەك و ئازووقە هەبوو  باریان دەكرد، بەم جۆرە رۆیشتین تائێوارە گەیشتینە نزیك گۆمەسپان، كە تاریك داهات، جگە لە پێشمەرگە كەسی تر لەو شوێنەدا نەما، بارەگای فەوجەكەی گۆمەسپان هێزێكی زۆری دوژمنی لێبوو، كە رۆژی پێشتر لە هەولێرەوە هاتبوون  بچنە كۆیە، بەڵام لەوێ چەقی بوون.
فەرماندەكانی پێشمەرگە، پلانی گرتنی بارەگای فەوجی گۆمەسپانیان دانا، زۆربەی فەرماندەكان و هێزێك لە سەرجادە سەرەكییەكەی كۆیە-هەولێر نزیك گۆمەسپان مانەوە. ئێمە بەتالیۆنی هەشتی هەولێر، كە نزیكەی 20 پێشمەرگە دەبووین، كە پێكهاتبووین لە(بێستون-جێگری بەتالیۆن، شەهید سوارە بێستانە -سەرتیپ، نەریمان پاشتەپە -فەرماندەی كەرت، خۆم -دكتۆری بەتالیۆن، جەواد ساڵەیی، شەهید موحسین حەمشین، ئەحمەدە قوت، نەمر عاسی، نەمر فەرهاد یاسین، شەهید زیادگەزنە، ئازاد پاشتەپە، مامۆستا ئیبراهیم، سیروان بەننا، جوتیار، پلینگ رەواندزی، فەرماندە رەمەزان، بورهان كەركوكی، حەمید تەزویر، پوشۆ دیبەگەیی..) بۆ دەستە راستی  بارەگای فەوجەكە بەڕێكەوتین، هێزەكەی كەركوكیش (مەلا شاخی، هیوا رەش-ف. تیپ، شەهید نەهرۆ قەسرۆكی، سەرباز مام حوسێن، تالیب فاروق، فەیسەڵ، شەهید حەمید، محەمەد سەلیم، مام عەلی، شەهید ئیباو.) ئەوانی تر، ناویانم لەیادنەماوە دەبێت ببورن. بە دەستەچەپی بارەگاكە رۆیشتن بۆ شوێنی دیارییكراو، زیاتر لە سەعاتێک بەناو قوڕدا رۆیشتین كە رۆژێك پێشتر بارانی زۆر باریبوو، تا گەیشتینە پشتی بارەگاكە، لەوێ هەموومان لەسەر سك و بەدانیشتن لەناو ئەو قوڕەدا چاوەڕێی سەعاتی سفر بووین، كەلای  هێزەكەی سەرجادە سەرەكییەكە بوو، چەند سەعاتێک بەم شێوە لە چاوەڕوانییدا بووین، ناوەناوەش زرێپۆش و دەبابەی ناو بارەگای فەوجەكە، بلاجكتۆری رووناكی لەچوارلای فەوجەكە دەدا، دەیكردە رۆژی رووناك.
هەرلەوكاتەدا لەناو خۆماندا بووە مشتومڕ تاكەی چاوەڕێ بین، سەرما كاری خۆی لێكردبووین، هەندێک دەیانووت با هێرش بكەین، هەندێک دەیانووت نابێت خۆ سەعات سفر لای ئێمە نییە، دەرئەنجام دوای چەند سەعاتێك چاوەڕوانی بڕیاردرا بگەڕێینەوە لای هێزەكەی سەرجادە، بە جەستەی قوڕاویی و سكی برسی و هەنگاوی خەواڵوانە لە ناو قوڕاودا، گەیشتینەوە هێزی سەرجادەكە. ئەوسا بۆیان روونكردینەوە كە دوای رۆیشتنی ئێمە، چەند سەربازێكی كورد خۆیان لە بارەگای فەوج دزیوەتەوە و گەیشتونەتە هێزەكەی سەرجادە، پێیانوتوون كەس شەڕ ناكات، بەڵام لە ترسی فەرماندەكەیان ناوێرن بارەگاکە چۆل بكەن، بۆیە فەرماندەكان بە باشی دەزانن، هێرش نەكەن و چاوەڕێی كات بكەن، هیچ ئامێرێكی پەیوەندییش لە نێوانماندا نەبوو تا ئاگادارمان بكەنەوە و بگەڕێینەوە لای ئەوان، لەبەر هیلاكی و ماندووبوونمان، ئێمەیان رەوانەی كۆیە كردەوە.
سەعات یەكی شەو بوو، چونكە لە نێوان ئیزۆپ و كۆیە هیچ  ئاوەدانی نەبوو. بەیانی لە كۆیەوە بەڕێكەوتینەوە تا ناو هەولێر، هیچ هێزێك لە رێگامان نەبوو، هێزەكەی دوژمن كە شەوی پێشتر لە ئیزۆپ لە بارەگای فەوجەكە جێگیر بوبوو، بەیانی زوو گەڕابۆوە بۆ هەولێر، لە كەسنەزان پێشمەرگە پارتیزانەكان(جەلال ئیلنجاغی، نەمر مامۆستا تایەر بەكر، مامۆستا كاوە، ........) لەگەڵ جەماوەری راپەڕییودا، رێگا لەو هێزە دەگرن و پەرشوبڵاویان دەكەن.