بەشداریی پێكهاتە جیاوازەكان لە ئازادكردنی شاری هەولێر

كوردستانی نوێ/ هەولێر

رادیۆی دەنگی گەلی كوردستان، رۆڵی گرنگ و پڕ بایەخی هەبوو لە جۆشدانی خەڵك، كاتێك پێشمەرگە لە هەولێر نزیكبوویەوە، كاتێك رادیۆ بە زمانی توركمانی پەیامی پێشمەرگە و هەواڵە خۆشەكانی دەگەیاندە خەڵك

 لە رۆژی ئازادكردنی شاری هەولێر لە راپەڕینی ساڵی 1991، سەرجەم پێكهاتەكانی ئەو شارە بەشدارییان تێداكرد، لەو رۆژەدا هیچ جیاوازییەك لە نێوان ئایین و نەتەوە و مەزهەب نەبوو، ئەوەی بەلایەنەوە گرنگ بوو، رووخان و نەمانی رژێمی بەعس بوو لەو شارە و تەواوی كوردستان، هەربۆیە سەرجەم پێكهاتەكان دەستكەوتی راپەڕین بە هی خۆیان دەزانن و لەو پێناوەشدا چەندین شەهیدیان داوە.
د. جەمیل عیسا لە پێكهاتەی مەسیحی بە كوردستانی نوێی راگەیاند: راپەڕینی ساڵی  1991ی خەڵكی كوردستان، راپەرینی سەرجەم چین و توێژەكان بوو، بۆیە بەدڵنیاییەوە پێكهاتەی مەسیحی بەتایبەتی لە شاری هەولێردا، رۆڵی كاریگەریان هەبوو لە سەركەوتنی راپەڕین،  ئەوان وەك پێشمەرگە یان وەك جەماوەر بەشداربوون لەناوبردنی داموودەزگاكانی بەعس لە شارۆچكەی عەنكاوە و شوێنەكانی تری هەولێر و كوردستان بە گشتی .
وتیشی: بۆیە مەسیحییەكان بەشداریی كارایان لەو رۆژە مێژوویەدا کرد، چونكە ئەوانیش هاوشێوەی كورد و پێكهاتە ئایینی و نەتەوەییەكانی تر، قوربانی دەستی تاوانەكانی رژێمی بەعس بوو، چەندین كەسیان لێ ئەنفالكرا، كەسوكاری شەهید سۆران بە نموونە، كە پێشمەرگەی یەكێتیی نیشتمانیی كوردستان بوو، دوای شەهید بوونی، خۆی  و كەسوكارەکەشیان زیندە بەچاڵكران، هەروەها مەسیحییەكان چەندین زەوی و موڵك و ماڵیان لەلایەن رژێمی بەعس دەستی بەسەردا گیرا، هەربۆیە ئەوانیش بەشدارییان لە رزگاكردنی كوردستان كرد.
د. جەمیل عیسا ئاماژەی بەوەش كرد: هەر راپەڕین و شۆڕشێك ئەگەر سەرجەم پێكهاتەكانی ئەو وڵاتە لەگەڵی نەبن و بەشداریی تێدا نەكەن، ئەوا بە دڵنییایەوە سەركەتوو نابێت، وەك چۆن ئێستا لە سوریادا دەیبینین، ئەوەی هاتۆتە سەر كورسی دەسەڵات، گوزارشت لەسەرجەم پێكهاتەكان ناكات، لەم حاڵەتەشدا بەدڵنیاییەوە سەركەوتوو نابێت، بەڵام ئەوەی لە كوردستاندا پێش 34 ساڵ روویدا، شۆڕشێك بوو دژی ستەمكاری، بۆئەوەی هەمووان بەبێ جیاوازیی ئایینی و نەتەوەیی و مەزهەبی پێكەوە بژین و دوارۆژی هەموو دیكتاتۆرێكیش، هەر رووخان و لەناوچوونە.
 لەلای خۆیەوە هەندرێن توركمان پێشمەرگەی دێرینی یەكێتیی نیشتمانیی كوردستان بە كوردستانی نوێی راگەیاند: ئێمەش وەك توركمان لە شاری هەولێر بەشداریی كاریگەرمان هەبوو لە راپەڕینە مەزنەكەی ساڵی 1991ی خەڵكی كوردستان، بەشێك لەگەنجان هاوشێوەی كوردەكان، چەكی پێشمەرگایەتیان كردە شان، كە من یەكێكم لەوانە، چونكە حوكمی رژێمی بەعسیان رەتكردەوە و روویان كردە شاخ، بۆئەوەی بە یەكەوە خەڵكی كوردستان لەدەست ئەو رژێمە رزگار بكەین.
وتیشی: بەشداریی توركمانەکان لە رزگاركردنی هەولێردا، رۆڵی كاریگەریان هەبوو لە ئامادەكارییەكان بۆ ئازادكردنی شاری كەركوك، لە 20 ی ئازاری هەمان ساڵدا، چونكە بەو پێیەی بەشێك لە پێكهاتەی كەركوك لە توركمان پێكدێن، بۆیە كاتێك زانیان لە هەولێر، توركمان بەشداریی راپەڕینیان كردوو، ئەوانیش بەشێوی جۆراوجۆر پاڵپشتی خۆیان بۆ راپەرین دەربڕی.
هەروەها وتی: جگە لە پێكهاتە رەسەنەکان، لە رزگارکردنی شاری هەولێردا، رادیۆی دەنگی گەلی كوردستان، رۆڵی گرنگ و پڕ بایەخی هەبوو لە جۆشدانی خەڵك، كاتێك پێشمەرگە لە هەولێر نزیكبوویەوە، كاتێك رادیۆ بە زمانی توركمانی پەیامی پێشمەرگە و هەواڵە خۆشەكانی دەگەیاندە خەڵك.
هەندرێن توركمان جەختی لەوە كردەوە: پێویستە ئەو راستییە بزانین، سەركەوتنی راپەرین سەركەوتنی هەموو پێكهاتەكان بوو، لەو رۆژەدا جگە لە رووخانی رژێم، جیاوازیی لە نێوان هیچ كەسێكدا نەبوو، هەمووان  بە ئاواتی رزگاریی و ئازادیی، چەكیان هەڵگرت و دژی رژێم راپەڕین.