ئاژانسی (سانا) بڵاویكردەوە، مانگی سووری عەرەبی سوریی 15 رێككەوتنی نوێی لە بواری هاوكاریی مرۆیی بۆ زیانلێكەوتووانی سوریا ئیمزاكردووە، لەو بارەیەوە حازم بوقلە بەڕێوەبەریی رێكخراوی مانگی سووری عەرەبی سوری لەگەڵ ستیڤان ساكالیان نوێنەری لیژنەی نێودەوڵەتیی خاچی سوور لە سوریا، نزیكەی 15 رێككەوتنیان ئیمزاكردووە وەك هاوكاریی بۆ ساڵی 2025 و بە ئامانجی فراوانكردنی هاوكارییە مرۆییەكان.
بەپێی هەواڵی رۆژنامەكە، ئەو رێككەوتنانە بۆ هاوكاریی هەمەلایەنەیە لە بوارەكانی خزمەتگوزاریی تەندروستی و ئۆتۆمبێلی فریاكەوتن، تواناسازیی و فریاگوزاریی، پشتگیریی و بژێویی ژیان، ئاو و هۆیەكانی پاكوخاوێنی، بەرزكردنەوەی هۆشیاریی لە پاشماوەكانی جەنگ، هەروەها بڵاوكردنەوەی بنەما یاساییە نێودەوڵەتییە مرۆییەكان و راگەیاندن و بنەماكانی گەیاندن.
