ژووری بازرگانیی نێودەوڵەتی، خەڵاتی باشترین لیژنەی لەسەر ئاستی جیهان بەخشییە ژووری بازرگانیی عیراق.
دوێنێ، یەکێتیی ژوورە بازرگانییەکانی عیراق لە بەیاننامەیەکدا رایگەیاند: لە دەستکەوتێکی سەرنجڕاکێشدا، ژوورە بازرگانییە نێودەوڵەتییەکان خەڵاتی باشترین ژوورە بازرگانییەکانی لەسەر ئاستی جیهان بەخشییە ژووری بازرگانیی عیراق کە ئەم خەڵاتەش لەئەنجامی جێبەجێکردنی پلانی ساڵانەیە بۆ ساڵی 2024-2025 بەپێی لێهاتوویی و کاریگەریی.
ئاماژەی بەوەشکردووە، لە پەراوێزی هەفتەی ساڵانەدا، یەکەمین ساڵیادی پەیوەستبوونی رەسمیی عیراق بە ICC بەڕێوەچوو، ئەمەش هەنگاوێکی گرنگە بەرەو بنیاتنانی هاوبەشیی ستراتیژی و بەرزکردنەوەی ژینگەی بازرگانی لە عیراقدا.
ژووری بازرگانیی نێودەوڵەتی ناسراو بە (ICC) لە ساڵی 1919 لە پاریس دامەزرا، عیراق کە لە ساڵی 2024ەوە ئەندامێتیی تەواوی بەدەستهێنا، لە رێگەی لیژنەی نیشتمانیی عیراقی - ژووری بازرگانیی نێودەوڵەتی - بەشداری لە هەفتەی ساڵانەی ژووری بازرگانیی نێودەوڵەتی لە پاریس، لە 17 تا 20ی حوزەیران کرد، کە زیاتر لە 60 وڵات لە لیژنە جیاوازەکانی نەتەوەیی لە سەرانسەری جیهان بەشدارییان تێدا کرد.
