هەوڵدان بۆ باشتركردنی هەر سیستمێك، سەركەوتنی هەر شۆڕشێك، تەنانەت بچووكیش بكرێتەوە بۆ هەموو خەباتێك لەپێناوی بەدەستهێنانی سەركەوتنێكدا، پاشەكشێی دوای سەركەوتنی مەترسیدارترە وەك ئەو هەنگاوانەی كە سەرەتایین و هێشتا میللەت بەرهەمی ئەو شۆڕش و سیستمەی نەچنیوەتەوە، چونكە كاتێك میللەت بەرهەمی دیموكراسی وەك سیستم و شۆڕشی وەك خەونێكی مێژوویی بینی، ئیدی دەرفەتی پاشەكشێ لێی كەم دەكاتەوە، واتە كرانەوەی هاووڵاتی و تاك لە سایەی هەر شۆڕشێكدا یان هەر سیستمێكدا، مانای جێهێشتن و بازدانێكی مێژووییە، بۆیە قورس دەبێت هەر هێزێك و سیستمێكی دیكە، ئەو بازدانە بگێڕێتەوە ئاستی سەرەتای دەستپێکردنی بە سیستم و شۆڕشێكی خراپتر لەوەی پێشوو.
ئەو رەخنە و ناڕەزاییانەی لە هەرێمی كوردستان لە پاشەكشێی ئازادی و كاری راگەیاندن و رۆژنامەنووسی دەگیرێت، یان ئەو رەخنانەی لە كار و پڕۆژەكانی حكومەت دەگیرێت لە دوای نزیكەی سێ دەیە، مایەی هەڵوەستە لەسەر كردنن و نابێت بهێڵرێت تێبپەڕن، نابێت هیچ هێزێكی سیاسیش رەخنە و گلەیی هاووڵاتیان بە نەیارێتی و دوژمنایەتی بۆسەر سیستمە سیاسییەكەی هەرێمی كوردستان ببینێت.
هەر رەخنەیەك لەم سیستمە بگیرێت ئەوە نەك نەیارێتی نییە، بەڵكو پیشاندانی دڵسۆزییە لە ئاست مەترسییەكی راستەقینە كە پاشەكشێیە لەو خەونە گەورەیەی كە كورد لە سەختی شاخەوە هەڵیگرت و هێنایە تەختی شار، بۆیە بەو پێیەش هاووڵاتی كوردستان ئەو ئەزموونەی تەختی شاری بینیووە و بە بەرهەمی خەباتی خۆی دەزانێت، ئەوا، رەنگە قورس بێت بۆی قبووڵی هەر پاشەكشێیەك بكات لە فەرمانڕەوایی كورد لە شاردا.
جوگرافیای هەرێمی كوردستانیش ئەگەرچی لە رووی كەشوهەوا سیاسییەكەیەوە لەبەردەم هەمان شەپۆلی سیاسی خۆرهەڵاتی ناوەڕاستدایە، بەڵام هاووڵاتیانی كوردستان ویستێكی جیاوازتر و گەورەتریان بۆ هەر كرانەوە و پێشەوەچوونێك تێدایە، دەكرێت ئەمە دەرفەت بێت بۆئەوەی كوردستان وەك چۆن لە دوای راپەڕینەوە نموونەیەكی جوانی زەوییە دیموكراسیخوازەكانی ناوچەكە بووە، ئەوا لە ئێستاشدا بەردەوام بەرەو پێشەوە بچێت نەك پاشەكشێ بكات.
مادام دەوترێت، باشووری كوردستان لە رووی سیاسی و ئازادی و دیموكراسی و خزمەتگوزارییەوە، بۆتە جێی سەروسوونجی وڵاتانی زلهێز و نەتەوەیەكگرتووەكان و رێكخراوەكانی مافی مرۆڤ و نێردەی وڵاتان و پێمان رادەگەیەنن كە كوردستان لە پاشەكشێدایە، ئەوا واتە كوردستانیش وەك هەر جوگرافیایەكی سیاسی دیكەی ناوچەكە تووشی چوونەوە ناو مێژووی رابردوی بۆتەوە و وێنەیەكی جیاوازترمان لە وڵاتانی ناوچەكە پیشان نەداوە كە ببێتە جێی بایەخی دەرەوە.
بە لەبەرچاوگرتنی مێژوو، ئەگەری پاشەكشێ تەنها بۆ جوگرافیایەكی سیاسی وەك هەرێمی كوردستان مەترسیدار نەبووە، زۆرێک لە نووسەرانی عەرەب، لەبارەی بەهاری عەرەبییەوە رەشبینن و پێیانوایە ئەوانە شۆڕش نەبوون، چونکە هەنگاوی گەورەیان بۆ پێشەوە نەهاویشت، بەڵكو بۆ چەندان ساڵ شەڕ و ناكۆكییە ناوخۆییەكانی گەڕاندۆتە دواوە و پاشەكشێیان کردووە.
لێرەوە دەردەکەوێت هەر پاشەکشێیەکی نەرێنی لە سیاسەت و سیستمی هەرێمی کوردستاندا، واتای بچوکبوونەوە و گەڕانەوەیە لە ئەو خەونە مێژووییانەی کە کورد قوربانی لە پێناودا داوە.
