لەم ماوەیەدا عیراقییەكان بەشێوەی جیا یادی نەبەردیی تێكشكاندنی داعش دەكەنەوە و بەهای جیاوازی دەدەنێ. راستییەكەی؛ راماڵینی داعش و تێكومەكانی دەوڵەتە تیرۆریستییەكەی، سەركەوتنێكی گەورەبوو، ئەهێنێت شانازیی پێوەبكرێت و كەسێك پشكێكی تیایدا هەبێت، مافی خۆیەتی پێوەی بنازێت، بەڵام سروشتی شەڕی بەرەی فراوان وایە كە بەقەدەر بەرەكەی شەڕەكە و كۆڵانە پێچاوپێچەكانی روانگەی جیاواز دەخوازێ و هەر كەس زوومێك دەبینێ و زووم دەخاتە سەر دیمەنێك، كە خۆی ئاگای لێیەتی. لە كام كۆڵانەوە دەستڕێژت لە داعش كردووە، ئەو كۆڵانە زوومی تۆیە، بۆیە گێڕانەوەكەت دروستە با نوقسانیش بێت. تەواوكردنی دیمەنەكەش پێكەوەنووسانی پارچەكانی گەرەكە.
شیعە، بە رەسمی و بە حەشدییەوە، ریوایەتی خۆی دەگێڕێتەوە و دەنگی لە هەمووان بەرزترە. كوردیش فیلم و دیكۆمێنتاری و شیعر و شیعاری لەناو گۆڕەپانەكە مەعلومی گشت عالەمە. سوننە خۆڕاپسكانی لە داعش و پێشتریش قاعیدە، بە فاكتەرێكی دەستەبەر دەزانێ بۆ لاتەریك و تەنیا كەوتنی دەوڵەتی تیرۆر و لەدەستچوونی ژینگەی جوگرافی و ئایدیۆلۆژی، كە تێری دەكرد و كەرەستەی خۆبژێویی بوو.
هاوپەیمانەكانیش، لەسەروویانەوە ئەمریكا، پاوەری گەورەی یارمەتی بوو و گێڕانەوەكانی كەس رەتناكاتەوە، مادام كەس لە توخمی ناوخۆیی وڵات باسكردنی سەروەریی خۆی نەكردووەتە بۆنەیەك بۆ فەرامۆشكردنی رۆڵی یەكلاكەرەوەی هاوپەیمانیی نێودەوڵەتی.
واقیعی گێڕانەوە تا ئەوەی لە مینبەرەكانەوە بۆ پەسیج و خۆسازدان بەكاردێت، ئاسایی و نۆرماڵە، بەڵام نێگەتیڤی ئەم دەركەوتە لە مەسجە هەڵەكانی، كە هەر لایەك لە ماددە و ماكی ئەو شانازییەوە بەدەستیدەهێنێت، لێڵی و شڵەژانی بۆ قۆناغی پۆست لەناوچوونی داعش، لەم گۆشەیەوە، كوشندەترین بوو. هەر كەسە و پاداشتی فەوری و سەوریی بەشداریی خۆی ویستەوە. كوردستان كە خوێن و فرمێسكی زۆری بۆ بەرەنگاریی داعش دا، لە ساتەوەختێكی ئاڵۆزدا ریفراندۆمی كرد و درزێكی گەورەی خستە دیواری بەرەی نەبەردیی داعشەوە. سوپا و حەشد و جەماوەری پەسیجی شیعە لە عیراق، زۆرینەیی خۆی كردە قەمیسەكەی عوسمان، كە خوێنی عەلی لێ دەتكا و زۆرداریی كردە بژاردەی ناڕەوا. لەگەڵ كورد بە ریفراندۆم و مووچە و بودجەوە چووە سەنگەرەوە، كە خەریك بوو دەستكاریی دیكۆمێنتاریی شەڕی داعش بكات و سەرۆك وەزیرانی ئەوێ رۆژێی عیراق حەیدەر عەبادی، ناوی پێشمەرگەی لە وۆردی بەلاغی سەركەوتن، سڕییەوە.
توێژاڵێكی نوێی سوننەش وەختێك بڕیاریاندا خاوەندارێتی لە بەروبوومی میانڕەوی خۆیان بكەن لە ناوچەی تەماسی نێوان هەرێمی كوردستان و ناوچە دابڕاوەكان، كەوتنە گوشار خستنەسەر كورد بۆ قەرەبووكردنەوەی پاشەكشێی پێشووتریان بەرامبەر بە شیعە. ئەم گوشارە، لەماوەی دادێ، دوای ڤیاگرای سیاسی، كە بەرهەمی كەوتنی رژێمەكەی ئەسەدە لە سوریا، زیاتر دەبێت.
جا لە غیابی یەكڕیزیی دوای سەركەوتن بەسەر داعشدا، هاوپەیمانەكانیش خێری زۆریان لە تەفروتوناكردنی داعش نەبینییەوە، بۆیە پرۆسەی عیراق وایلێهاتووە ناوی پەیوەستە بە هەرچی دژواریی ناوچەكە: غەززە، لوبنان، سوریا و دەرودراوسێكانی عیراق.
عەرەب بەمە دەڵێن: (وكأنك یا بوزید ما غزیت) شتێك لە بابەت ئیدیۆمی كوردی: جۆبڵاو.... ئێستاش دونیا لە جەدوای سەركەوتن بەسەر داعش دەپرسێتەوە. مادام بەسەرهاتی دیمەشق چیرۆكی تر دەنووسێتەوە.
