رێککەوتنی نێوان جەنەراڵ مەزڵووم عەبدی، فەرماندەی هێزەکانی سوریای دیموکرات (هەسەدە)، و ئەحمەد شەرع، سەرۆکی ئێستای سوریا، لە کاتێکی زۆر هەستیاردا دێت، کە بەرژەوەندییە هەرێمی و نێودەوڵەتییەکان بە شێوەیەکی بێوێنە تێکەڵ بوون. لە کاتێکدا حکومەتی سوریا لە ناوخۆ و دەرەوە رووبەڕووی فشاری فرە رەهەند دەبێتەوە، کورد بژاردەی سنوورداری لە بەردەمدایە و سەرەڕای زیادبوونی هەڕەشەکانی تورکیا و ناڕوونی هەڵوێستی ئەمریکا.
حکومەتی سوریا بە قۆناغێکی شەکەتی سیاسی و سەربازیدا تێدەپەڕێت، کە خۆی لە نێو چەندین دۆسێی ئاڵۆزدا دەبینێتەوە:
*ئاڵۆزییەکانی ئەم دواییەی عەلەوییەکان، لە ناوچە کەناراوییەکانی سوریا، فشارە ناوخۆییەکان زیاد دەکات، لەگەڵ ئاستەنگە ئەمنی و ئابوورییەکانی ناوچەکەدا.
*هێرشە بەردەوامەکانی ئیسرائیل، کە شوێنە سەربازی و ئەمنییە هەستیارەکان بە ئامانج دەگرێت، دیمەشق رووبەڕووی ئاستەنگی ئەمنی زیاتر دەکاتەوە.
*هەوڵەکانی شکاندنی گۆشەگیری نێودەوڵەتی، کە حکومەتی سوریا کار بۆ گەڕاندنەوەی دانپێدانانی دیپلۆماسی و کرانەوە بەسەر وڵاتانی ناوچەکە دەکات، بەرامبەر جێبەجێکردنی مەرجەکانی کۆمەڵگای نێودەوڵەتی .
هەموو ئەم فاکتەرانە وایان لە دیمەشق کردووە، بە دوای سەقامگیرییەک لە باکووری رۆژهەڵاتدا بگەڕێت، کە لەوانەیە ئەمەیان هۆکاری ئامادەبوونی بۆ دانیشتن لەسەر مێزی لێکتێگەیشتن لەگەڵ هەسەدە روونتر بکاتەوە، کە وەک هێزێکی «یاخی بوو» سەیرکراوە کە هەمیشە پشتگیری دەرەکی لەپشتەوەیە.
دەتوانین بڵێن هۆکاری بڕیارەکەی هەسەدە، بەرهەمی ناڕوونی هەڵوێستی نێودەوڵەتی بوو، بەتایبەت لەلایەن ویلایەتە یەکگرتووەکانی ئەمریکاوە، ئەنقەرە هەڕەشە سەربازییەکانی خۆی زۆر زیاد کردووە و ئامانجی داگیرکردنی شوێنەکانی هەسەدەیە، کە پاڵی بە هەسەدەوە ناوە بە دوای کارتی هێزی نوێدا بگەڕێت.
ئاشکراو روونە کە هەموو لایەنەکان دەزانن کە هێشتا گۆڕانکاری گەورەی تریش بەڕێوەیە، بەڵام هێشتا نیشانەکانیان ناڕوونن و نەزانرە بە چی ئاراستەیەکدایە، ئەمەش وای کردووە، کە هەسەدە بڕیاری هەنووکەیی بدات، کە دەستکەوتەکانی دەپارێزێت یان زیانەکانی کەم دەکاتەوە، ئەم گۆڕانکارییانەی روو دەدەن تەنها پێکدادانی سەربازی یان لێکتێگەیشتنی کاتی نین، بەڵکو جێگیربوونێکی نوێن کە لەگەڵ واقعی نێودەوڵەتی و هەرێمی گۆڕاودا دەگونجێت.
وەک خوێندنەوەیەکی سەرەتایی، دەتوانین بڵێین کە رێککەوتنی نێوان عەبدی و شەرع، دەستکەوتی هەنووکەیی بۆ هەردوولا تێدایە.
بۆ کورد: مانەوەی سیاسی و دەستکەوتی کارگێڕییان لە ناوچەکە بۆ دەستەبەر دەکات.
بۆ حکومەتی سوریا: بەرەیەکی سەربازی کراوە کەم دەکاتەوە، هەروەها یارمەتی دەدات لە دەرخستنی وێنەیەکی ئەرێنیتر لەسەر ئاستی نێودەوڵەتی و هەرێمی.
بەڵام رێککەوتنەکە، هاوپەیمانییەکی ستراتیژی نییە، بەڵکو زیاتر لەوە دەچێت هەنگاوێکی ناچاری بێت، لەوانەیە بەپێی پێشهاتەکانی داهاتوو هەڵسەنگاندنی نوێی بۆ بکرێت. گۆڕانکارییەکانی داهاتوو یەکلاکەرەوە دەبن لە دیاریکردنی ئەوەی کە ئایا ئەم رێککەوتنە وەک ئاڕاستەیەکی درێژخایەن بنیات دەنرێت، یان تەنها ئاگربەستێکی کاتییە.
