(15)
زاراوەیەکە گوزارشت لەو گرژی و ناکۆکییانە دەکات کە لە نێوان تاکەکانی تەمەنە جیاوازەکاندا سەرهەڵدەدات، بەتایبەتی لەنێوان گەنجان و بەساڵاچوواندا. ئەم ململانێیە لە جیاوازیی بەها و بیرۆکە و چەمکەکاندا بەرجەستە دەبێت کە هەر نەوەیەک باوەڕی پێیەتی و کاریگەرە بە پێشکەوتنەکانی کات و تەکنۆلۆژیا و کەلتوری کۆمەڵایەتی.
لە پەیوەندییە سۆزدارییەکاندا، ئەم ململانێیە دەتوانێت دەربکەوێت لە چۆنێتی بینینی خۆشەویستی و وابەستەییدا، بەشێوەیەک نەوەی رابردوو مۆدێلی نەریتی هاوسەرگیریی و پەیوەندیی سۆزداری جێگیر پەسەند دەکەن، لەکاتێکدا نەوەی ئێستا بەدوای ئەزموونی نەرمتر و هەمەجۆردا دەگەڕێن لەگەڵ کاریگەریی زیاتری تەکنۆلۆژیا وەک سەکۆی تۆڕە کۆمەڵایەتییەکان.
تەکنۆلۆژیای نوێ، یارمەتیدەرە بۆ دروستکردنی کەلێن لە شێوازی پەیوەندی و کارلێککردنی نێوان نەوەکان. نەوەی داهاتوو ئامڕازی دیجیتاڵی بەکاردەهێنن بۆ دروستکردنی پەیوەندی، لە کاتێکدا نەوەی رابردوو چاوپێکەوتنی راستەوخۆ و پەیوەندیی تەقلیدی پەسەند دەکەن.
هەروەها بەها و بیروباوەڕەکان هۆکارێکی ترە کە نەوەی رابردوو زۆرجار پابەندن بە دابونەریتی کۆمەڵایەتی و خێزانی کە دەشێت نەوەی ئێستا بە پێویستی نەزانێت.
ئەمە دەبێتە هۆی جیاوازیی شێوازی تێگەیشتن لە پەیوەندییە کۆمەڵایەتی و خێزانییەکان.
هۆکارێکی تر، چاوەڕوانی و هیوای کە دەشێت نەوە جیاوازەکان پێشبینی جیاوازیان هەبێت سەبارەت بە چۆنێتی رەوڕەوەی پەیوەندییەکان، بە نموونە گەنجان بەدوای ئازادیی کەسیی و ئەزموونی تاکەکەسیدا دەگەڕێن، لەکاتێکدا نەوەی رابردوو دەشێت پەیوەندییەکان وەک پابەندبوون و سەقامگیریی درێژخایەن ببینن.
چارەسەرەکان چین؟
شێوازەکانی چارەسەر زۆرن لەوانە، دیالۆگ و تێگەیشتن لەڕێی بەهێزکردنی پەیوەندیی کراوە لە نێوان نەوە جیاوازەکاندا کە دەتوانرێت بۆشایی کەلتوری و جیاوازیی تێڕوانین دەربارەی پەیوەندییەکان کەمبکرێتەوە، بۆ نموونە نەوەی رابردوو دەتوانێت یارمەتیدەر بێت لە رێنماییکردنی ئامۆژگارییەکانی ژیان لەسەر بنەمای ئەزموونی رابردوویان، لە کاتێکدا نەوەی داهاتوو دەتوانێت بە بەکارهێنانی میدیای مۆدێرن تێڕوانینی نوێ پێشکەش بکات بۆ کارلێکردنی سۆزداری.
خۆڕاگری و رێزی هاوبەش، گرنگە تاکەکانی نەوە جیاوازەکان فێربن رێز لە جیاوازییەکانی یەکتربگرن و وەک دەرفەتێک سەیریان بکەن بۆ فێربوون و گەشەکردن.
جگە لەوەی پەروەردەکردن و رۆشنبیرکردنی نەوه جیاوازەکان دەشێت یارمەتیدەر بێت بۆ کەمکردنەوەی بۆشایی فکری و سۆزداری لە نێوان نەوە جیاوازەکاندا. بۆ نموونە، فێربوون دەربارەی کاریگەریی تۆڕە کۆمەڵایەتییەکان لەسەر پەیوەندییەکان یارمەتی نەوەی رابردوو دەدات بۆ تێگەیشتنی باشتر لە تێڕوانینی نەوەی ئێستا و بە پێچەوانەوە. هەروەها نەرمیی بۆ خۆگونجاندن لەگەڵ گۆڕانکارییەکان رێگەیەکی تری چارەسەرەکانە کە هەر نەوەیەک دەبێت فێربێت چۆن خۆی لەگەڵ گەشەکردنی کەلتوری، تەکنۆلۆژیا و کۆمەڵایەتی بگونجێنێت و جیاوازیی نێوان نەوەکان قبووڵ بکات، چونکە گۆڕانکاریی لە پەیوەندییەکان مەرج نییە بە مانای پاشەکشەکردن بێت لە بەها سەرەکییەکان، بەڵکو گونجاندنیانە لەگەڵ چوارچێوەی مۆدێرندا.
هەرچەندە ململانێی نەوەکان لە بواری پەیوەندیدا هەندێک جار ئازاربەخش دەبێت، بەڵام دەرفەتێکە بۆ خۆگونجاندن و پەرەسەندن لە پەیوەندییەکانماندا، چونکە دیاردەیەکە کە لە زۆر لایەنی ژیانی کۆمەڵایەتی و کەلتوریدا دووبارە دەبێتەوە و رەنگدانەوەی ئەو گرژیەیە کە لە ئەنجامی جیاوازیی نێوان نەوەکان لە شێوازی بیرکردنەوە و هەڵوێست لەسەر بابەتە جۆراوجۆرەکاندا دروست دەبێت، بۆیە مەرج نییە دیاردەیەکی نەرێنی بێت.
بە پێچەوانەوە دەتوانێت هاندەرێک بێت بۆ گەشەی کۆمەڵایەتی و کەلتوری، لە رێگەی فێربوونی هاوبەش، رێزی هاوبەش و کراوەیی بۆ جیاوازییەکان، بۆیە نەوە جیاوازەکان دەتوانن بەشداری بکەن لە دروستکردنی کۆمەڵگەیەکی هاوسەنگ و تێگەیشتووتر لەسەر چۆنێتی بونیادنانی پەیوەندییەکی تەندروست و بەردەوام.
[email protected]
