سەرۆكی هەرێم: كەمكردنەوەی ناكۆكییە سیاسییەكان
بە ئامادەبوونی بافڵ جەلال تاڵەبانی و نێچیرڤان بارزانی سەرۆكی هەرێم و قوباد تاڵەبانی جێگری سەرۆكی ئەنجومەنی وەزیران و شێخ جەعفەر شێخ مستەفا و مستەفا سەید قادر جێگرانی سەرۆكی هەرێم، شۆڕش ئیسماعیل وەزیری پێشمەرگە و ژمارەیەك لە لێپرسراوانی حزبی، حكومی و فەرماندە سەربازییەكان، رێوڕەسمی دەرچوانی خولی 16ی كۆلێژی سەربازیی قەڵاچوالان بەڕێوەچوو.
سەرۆكی هەرێم: كۆلێژی سەربازیی قەڵاچوالان،
یادگارێكی گرنگی
سەرۆك مام جەلال-ە
لە رێوڕەسمەكەدا، سەرۆكی هەرێم وتارێكی پێشكەشكرد و رایگەیاند: بۆ كەمكردنەوەی ناكۆكییە سیاسییەكان و كاریگەرییەكانی بەسەر بارودۆخی كوردستانەوە، ئێمە وەك ئەركی یاسایی خۆمان لە سەرۆكایەتیی هەرێمی كوردستان بۆ چارەسەر هەوڵمانداوە و هەوڵدەدەین، بەردەوام لەگەڵ هەموو لایەنەكان گفتوگۆمان كردووە و دەیكەین. بە خۆشحاڵییەوە دەڵێم ئێستا زەمینەیەك هاتۆتە پێشەوە بۆ نەرمی نواندن و گفتوگۆ لەگەڵ یەكتر.
نێچیرڤان بارزانی سەرۆكی هەرێمی كوردستان لە بەشێكی دیكەی وتارەكەیدا، رایگەیاند: رۆڵی كۆلیژی سەربازیی (3)، لە پێگەیاندنی پێشمەرگە و هێزی سەربازیی عیراقدا، رۆڵێكی دیار و جێگەی رێز و دەستخۆشییە. هەر لێرەدا پێویستە بڵێم: كۆلێژی سەربازیی قەڵاچوالان، یادگارێكی گرنگی سەرۆك مام جەلال-ە، راشیگەیاند: پیرۆزبایی لە ئێوە دەكەم، كە ئەمڕۆ لێرەدا دەرچوونی ئەم پۆلە پێشمەرگەیە دەبینن، چونكە ئەمانە دەبنە یارمەتیدەرێكی سەرەكی بۆ پاراستنی سەروەریی عیراق. پاراستنی سەروەریی عیراق لە بەرژەوەندیی هەموو هاووڵاتییەك و ناوچەیەكی عیراقدایە. پاراستنی عیراق زۆر بەلای ئێمەوە گرنگە. بە هەمان شێوە پێویستە پاراستنی هەرێمی كوردستانیش وەك بەشێك لە دەوڵەتی عیراق، بەلای هەموو عیراقییەك و هەموو دامەزراوە دەوڵەتییەكانی عیراقەوە جێگەی بایەخ بێت و وەك ئەركێكی هاوبەش تەماشا بكرێت. بەهێزبوونی عیراق، پارێزراوبوونی بەرژەوەندییەكانی گەلی عیراق، دەبێتە مایەی بەهێزبوونی هەموو ناوچەكانی عیراق، بە هەرێمی كوردستانیشەوە، راشیگەیاند: لێرەوە داوا لە هەموو عیراقییەك دەكەم، دژی ئەو هێرشانە بێت كە گروپە یاساشكێنەكان لە ناوخۆی عیراقەوە دەیكەنە سەر هەرێمی كوردستان و هەولێری پایتەخت.
سەرۆكی هەرێم ئاماژەی بەوەشدا «نیگەرانی، مەترسی و هەستیاریی خەڵكی كوردستان، دەبێ بۆ ئێمە جێگەی بایەخ بێت. دەبێ هاندەرمان بێت بۆ بەجێهێنانی ئەو بەڵێنانەی حزبەكانمان بە گەلی كوردستانیان داوە»، وتیشی: دەبێت دەستتێوەردانی حزبی لە كاروباری پێشمەرگەدا بە زووترین كات كۆتایی پێبهێنین.
وەزیری پێشمەرگە: دۆخی ئێستای هەرێمی كوردستان وادەخوازێت بە یەكەوە كار بكەین
هەر لە رێوڕەسمەكەدا، وتاری كۆلێجی سەربازیی قەڵاچوالان خوێندرایەوە، هەروەها شۆڕش ئیسماعیل وەزیری پێشمەرگە وتارێكی پێشكەشكرد و رایگەیاند: مەترسیی لەسەر هەرێمی كوردستان و قەوارەكەی هەیە و دۆخی ئێستای هەرێمی كوردستان وادەخوازێت كە زیاتر لەوەی هەیە، بە یەكەوە كار بكەین.
وەزیری پێشمەرگە راشیگەیاند: لە رێكخستنەوەی هێزەكانی پێشمەرگەدا بە یەكتیم كارمان كردووە و هەنگاوی باشمان لە چاكسازیی سەربازیی پێشمەرگەدا ناوە، داواشی کرد «هیچ هێزێكی پێشمەرگە لە دەرەوەی پێكهاتەی وەزارەتی پێشمەرگە دانەمەزرێت»، راشیگەیاند: هاوكارییەكانی هاوپەیمانان بۆ هێزەكانی پێشمەرگە بەردەوامە.
