سبەی چوار شەممە 10/1/2024 لە سعودیە یارییەكانی جامی سوپەری ئیسپانیا دەستپێدەكەن و تیپی چوار یانەی ئەو وڵاتە بەسیتمی چوونە دەرەوە بە یەك دۆڕاندن لە نێوان خۆیاندا یاریی دەكەن.
یارییەكان
یارییەكانی ئەم خولە تا یاریی كۆتایی بەمشێوەیە دەبن:
چوار شەممە 10/1/2024
*ریاڵ مەدرید×ئەتلەتیكۆ مەدرید - سەعات 10.
پێنجشەممە 11/1/2024
*بارسیلۆنا × ئۆساسۆنا - سەعات 11.
یەكشەممە 14/1/2024
*یاریی كۆتایی هەردوو براوەی ئەو دوویارییە سەعات 11 ی شەو دەیكەن.
جامی سوپەری ئیسپانیا
ئەم خولە كورتخایەنە و تەنیا تیپی چوار یانەی ئیسپانیا بەشداریی تیادا دەكەن، یەكەمیان یانەی بارسیلۆنا وەك پاڵەوانی وەرزی رابردوو (2022-2023)، ریاڵ مەدرید وەك یەكەمی خولی جامی ساڵی رابردووی ئیسپانیا (2022-2023)، ئۆساسۆنا وەك دووەمی خولی جامی كوپا دیلرێ، لەبەر ئەوەی وەرزی رابردوو ریاڵ مەدرید دووەمی لالیگا بووە و لە هەمان كاتیشدا یەكەمی كوپا دیلرێش بووە ئەتلەتیكۆی سێیەمی لالیگا دەچێتە شوێنی.
یارییەكانیش قورعەی بۆ ناكرێت، بەشێوەیەك دیاریی دەكرێن كە پاڵەوانی لالیگا بارسیلۆنا بەرامبەر دووەمی جامی شا (ئۆساسۆنا) و یەكەمی جامی شای ئیسپانیاش (ریاڵ مەدرید)بەرامبەر دووەمی لالیگا (لەم خولەدا سێیەم بەشدارە) (ئەتلەتیكۆ مەدرید) یاریی دەكەن.
سعودیە لە وەرزی 2019-2020 –ەوە ئەم خولە رێكدەخات، تەنیا وەرزی 2020-2021 نەبێت كە بەهۆی پەتای كۆرۆناوە لە ئیسپانیا كراوە.
وەرزی رابردووش هەر لە سعودیە كرا، لە یەكەم یارییدا بارسیلۆنا بە پەنالتی 4-2 لە ریاڵ بیتیسی بردەوە پاش ئەوەی لە كاتی یاسایی یارییەكەدا 2-2 یەكسان بوون، پاشان لە یاریی كۆتاییدا 3-1 لە ریاڵ مەدریدی بردەوە.
فایلی براوەكانی ئەم خولە
یانەی بارسیلۆنا لە فایلی براوەكانی ئەم خولەدا پكشی شێری بەردەكەوێت و خاوەنی 14 جامە، ریزبەندیی ئەو یانانەش كە براوەی ئەم جامە بوون یان گەیشتوونەتە یاریی كۆتایی و یاریی كۆتاییان دۆڕاندووەو دووەمی خولەكە بوون بەمشێوەیەیە:
-1بارسیلۆنا (14 جام) (11 دووەمی).
-2ریاڵ مەدرید (12 جام) (6 دووەمی).
-3ئە.بیلباو (3 جام) (3 دووەمی).
-4د.لاكۆرۆنیا (3 جام) (0 دووەمی).
-5ئە.مەدرید (2 جام) (5 دووەمی).
-6ڤالانسیا (1 جام) (3 دووەمی).
-7سیڤییا (1 جام) (3 دووەمی).
-8زاراگۆزا (1 جام) (2 دووەمی).
-9ریاڵ مایۆركا (1 جام) (1 دووەمی).
-10ریاڵ سۆسیداد(1 جام) (0 دووەمی).
-11ئیسپانیۆڵ (0 جام) (2 دووەمی).
-12ریاڵ بیتیس (0 جام) (1 دووەمی).