د. نەوزاد عەلی ئەحمەد
1-2
دەستپێك
تا ئێستا ئەوەی پشكنینم بۆ كردووە بابەتێك نەنووسراوە، كە باس لە رۆژنامەگەریی ناوخۆی حزبی، زۆر تایبەت و نهێنی بۆ ریزەكانی رێكخستن بكات، راستە لە دووتوێی چەند بابەتێكدا ئاماژە بە فڵان بڵاوكراوە، یاخود گۆڤار كراوە، كە بچێتە ئەم چوارچێوەیە، بەڵام وەك بابەتێكی فراوان و سەربەخۆ كارێكی لەو جۆرەم نەبینیووە.
رۆژنامەگەریی تایبەتمەند
ئەو جۆرە رۆژنامەیەی لێرەدا هەڵوەستەی بۆ كراوە، دەچێتە چوارچێوەی رۆژنامەگەریی تایبەتمەند، بەڵام لەو پۆڵێنكردنەشدا زیاتر بەرتەسك دەبێتەوە، چونكە رۆژنامەی تایبەتمەند بریتییە لە رۆژنامەی چین و توێژێكی تایبەت وەك؛ خوێندكاران، كرێكاران، جوتیاران، لاوان، ژنان... تاد. كەواتە باشترین پێناسە بۆ ئەو رۆژنامانەی لە كایەیەكی زۆر سنووردار دابەشدەكرێن و دەخوێندرێنەوە، بریتین لە رۆژنامەی ناوخۆیی حزبی، یان رۆژنامەی زۆر تایبەت و نهێنی حزبی، كە لە ناو حزبیشدا سنووری بڵاوكردنەوەی دیاریكراوە و پلەبەندی حزبی بۆ كراوە.
ئەم بابەتە دابەشی دوو بەشكراوە، لە بەشی یەكەمدا بە كورتی باس لە ژیانی رۆژنامەگەریی زۆر تایبەت و نهێنی لەنێو ریزەكانی یەكێتیی نیشتمانیی كوردستان «كۆمەڵە، شۆڕشگێران» كراوە. لە بەشی دووەمدا چەند نموونەیەكم لەو جۆرە رۆژنامەیە خسۆتەڕوو، كە دوای راپەڕینی 1991 لەلایەن چەند ئۆرگانێكی یەكێتیی نیشتمانیی كوردستان، بە تایبەتیش ئۆرگانەكانی رێكخستن بڵاوكراونەتەوە.
بەشی یەكەم
رۆژنامەگەریی ناوخۆیی، یاخود زۆر تایبەت-ی یەكێتیی نیشتمانیی كوردستان
1991-1975
یەكێتیی نیشتمانیی كوردستان، وەك هێزێكی نیمچەبەرەیی چەترێك بوو بۆ كۆكردنەوەی چەند رێكخراو و حزبێك، دوونیان لە چوارچێوەیەی یەكێتیی دا دەستیان بە خەبات و تیكۆشان كرد، هێز و دەستەی دیكەش هەبوون، دۆست و هاوكاری بەرنامەكانی ئەو نیمچەبەرەییە بوون.
یەكێتیی نیشتمانیی كوردستان پێكهاتبوو لە «كۆمەڵەی ماركسی- لینینی كوردستان و بزووتنەوەی سۆشیالیستی كوردستان»، دوای ئەوەی بەشێكی هەرە گەورە لە بزووتنەوە لە لەناو چوارچێوەی یەكێتیی نیشتمانیی كوردستان هاتنە دەرەوە و لەگەڵ پارتی دیموكراتی كوردستان- لیژنەی ئامادەكردن، حزبی سۆشیالیستی یەكگرتووی كوردستان-یان پێكهێنا، ئەو بەشەی بزووتنەوە، كە لەناو یەكێتیی نیشتمانیی كوردستان مابوون، ساڵی 1982 لەگەڵ خەتی گشتی یەكێتیی شۆڕشگێرانی كوردستان-یان راگەیاند، تا یەكگرتنەوەكەی ساڵی 1992، یەكێتیی نیشتمانیی كورستان لەو دوو هێزە پێكاهاتبوو، دوای ئەمە ئەو دوو هێزە «كۆمەڵە و شۆڕشگێڕان» رێكخستنی تایبەت بە خۆیان نەما.
سەرەتای پەیدابوونی رۆژنامەی زۆر تایبەت لەنێو ریزەكانی ی. ن. ک. لە رێگای نامەی تایبەت و كورتە پەیام بە ئامێری جیهازی بێتەل بووە
رۆژنامەگەریی زۆر تایبەت-ی یەكێتی
سەرەتای پەیدابوونی رۆژنامەی زۆر تایبەت لەنێو ریزەكانی یەكێتیی نیشتمانیی كوردستان لە رێگای نامەی تایبەت و كورتە پەیام بە ئامێری جیهازی بێتەل بووە، نامەی تایبەت وەك هۆكارێكی تایبەت تا ئەمرۆش درێژەی هەیە، سەرەڕای پێشكەوتنە زۆر خێراییەكانی تەكنۆلۆجیای نوێی پەیوەندییەكان، كە مێدیای گەیاندنی نوێ بە جۆرەها جۆر بۆتە بەشێك لە ژیانی حزبایەتی. ئەوەی ئێمە لەم بەشەدا لەسەری دەوەستین رۆژگاریی خەباتی سیاسی و پێشمەرگایەتییە 1975- 1991، ئەو قۆناغە دابەشی چەندان وێستگە دەكرێت؛ سوریا- برادۆست- خڕی نێوزەنگ- دوای كارەساتی هەكاری- گفتوگۆ و دوای گفتوگۆ- سەرسنوور و رۆژهەڵات- پێش راپەڕین و لە كاتی راپەڕیندا. لە هەر یەكێك لەو وێستگانەدا چەندان هۆكارێك بەكارهێنراون، بۆ گەیاندنی پەیامی زۆر تایبەت و نهێنی.
هەر لە سەرەتاوە جۆرێك لە رێكەوتن كرابوو، كە رێكخستنێك نەبێت بەناوی یەكێتیی نیشتمانیی كوردستان، تەنیا ئەو حزب و هێزانە رێكخستن بكەن، كە یەكێتیی- یان پێكهێناوە، بەڵام تا دوای راگەیاندنی یەكێتیی شۆڕشگێرانی كوردستان-یش كۆمەڵێك كادر و خەڵكی ئاسایی وەك خەتی گشتی مانەوە و رێكخستنی تایبەت بە خۆیان هەبوو.
ئەوەی دیارە و وەك بەڵگە لەبەردەستمان دایە، هەر یەكێك لە كۆمەڵەی رەنجدەرانی كوردستان و یەكێتیی شۆڕشگێرانی كوردستان بڵاوكراوەی تایبەت بە خۆیان هەبوو:
- كۆمەڵەی رەنجدەرانی كوردستان؛ رەنگە پێشتر بڵاوكراوەی تایبەتی هەبووبێت، بەڵام ئێمە نەمانبینیبێت، ئەوەی وەك بەڵگە بۆم ساغبۆتەوە، ساڵی 1981 بۆ یەكەمینجار بڵاوكراوەی «بڵاوكراوەی ناوخۆ»ی دەركردووە و لە ماوەی ساڵێكدا هەشت ژمارەی لێدەرچووە و پاشان وەستاوە. بۆ زانیاری زیاتر دەكرێت سەیری ئەم كتێبەم بكرێت: «نەوزاد عەلی ئەحمەد، بڵاوكراوەی ناوخۆ، كۆمەڵەی رەنجدەرانی كوردستان 1981-1992، لە بڵاوكراوەكانی دەزگای میدیا بۆ فكر و لێكۆڵینەوە، چاپخانەی حەمدی، سلێمانی .2017
دوای بڵاوكراوەی ناوخۆ، كۆمەڵەی رەنجدەرانی كوردستان، بڵاوكراوەیەكی دیكەی بە ناوی «ژیانی رێكخراوەیی مان» دەركردووە، لەنێوان ساڵانی 1982 تا 1985، هەژدە ژمارەی لێدەرچووە. بۆ زانیاری زیاتر دەكرێت سەیری ئەم كتێبەم بكرێت: «نەوزاد عەلی ئەحمەد، ژیانی رێكخراوەیی مان، كۆمەڵەی رەنجدەرانی كوردستان، چاپخانەی كارۆ، سلێمانی 2019.»
- یەكێتیی شۆڕشگێڕانی كوردستان: ئەم هێزە بۆ هوشیاكردنەوەی ئەندامەكانی و ئاگاداربوون لە رووداوەكان و كاروباری ناوخۆیدا دەستی بە بڵاوكردنەوەی ئاگادارینامەیەكی ناوخۆ كرد كە لەژێر ناوی «بڵاوكراوەی ناوخۆ»، یاخود نامەی تایبەتدا بوون. بەڵام لە ساڵی 1984 دا بە شێوەیەكی دیارتر دەستی بە چاپكردنی بڵاوكراوەیەك كرد بەناوی «بەرنامەی رۆشنبیری- رۆشنبیری» لەسەر بەرگی نووسراوە: « تایبەت بە ئەندامان. ئەم بڵاوكراوەیە دوازدە ژمارەی لێدەرچووە. دیسان بۆ زانیاری دەكرێت سەیری ئەم كتێبەشم بكرێت: «نەوزاد عەلی ئەحمەد، رۆشنبیری، یەكێتی شۆڕشگێرانی كوردستان، چاپخانەی شەهاب، هەولێر 2016.»
دوای وەستانی ئەم بڵاوكراوەیە یەكێتیی شۆڕشگێڕانی كوردستان چەند ژمارەیەكی لە بڵاوكراوەیەك بەناوی بڵاوكراوەی ناوخۆ كردووە. ئەمە و بۆ یەكەمجار كۆمەڵەی رەنجدەرانی كوردستان و یەكێتیی شۆڕشگێرانی كوردستان دوای پڕۆسەكانی ئەنفال پێكەوە بڵاوكراوەیەكی ناوخۆیان بۆ كادرانی هەردوو هێزەكە بەهاوبەشی دەركردووە و لە سنوورێكی بەرتەسكی كادرانی پێشكەوتووی هەردوولادا دابەشكراوە. لەو رووەوە دەكرێت سەیری ئەم كتێبە بكرێت: «رزگاری دەنگی یەكێتیی شۆڕشگێڕانی كوردستان، ئامادەكردنی: بنكەی ژین، لێكۆڵینەوە: رەهبەر سەید ئیبراهیم، پڕۆژەی هاوبەش: بنكەی ژین و ئەكادیمیای هۆشیاری و پێگەیاندنی كادیران، سلێمانی 2011».
بەشی دووەم
رۆژنامەی ناوخۆیی، یاخود زۆر تایبەت-ی یەكێتیی نیشتمانیی كوردستان وەك رۆژنامەی زۆر تایبەت بە كادران و كادری پێشكەوتوو تا ئاگاداری رووداوە گەرمەكان و باسوخواسی رۆژ بن و چۆن ئاڕاستە بكرێن، دوای راپەڕینیش یەكێتیی نیشتمانیی كوردستان بە تایبەتیش دوای یەكگرتنی كۆمەڵەی رەنجدەرانی كوردستان و یەكێتیی شۆڕشگێرانی كوردستان، لە رێگەی مەكتەبی رێكخستنەوە تەوجیهاتی بەردەوامی هەبووە و بڵاوكراوەی زۆر تایبەت و نهێنی بۆ كادران ناردووە، ئەوەندەی من دەستم كەوتوون، ئەم چەند بڵاوكراوەیەیە، كە لەم بەشەدا باسیان دەكەم، ئەوەی باری ئەم نووسینەی زۆر قورس كرد، ئایا كاتی ئەوە هاتووە توێژەری ئێمە لەسەر ئەم جۆرە بڵاوكراوەیە بوەستێت و لێكۆڵینەوەیان لەبارەیەوە بنووسێت، ئەگەر بشنووسین پێویستە بە وریایی مامەڵە لەگەڵ ناوەڕۆكیان بكەین، منیش هەروام كردووە، ئێ خۆ ناكرێت، ئەو چالاكییە رۆژنامەگەرییە لە ژیانی حزبایەتیدا فەرامۆش بكرێت! ئەمانە تەنیا چەند نموونەیەكن:
* گۆڤاری رێكخستن
لە لاپەڕە 1دا، ئەم زانیارییانە نووسراون: گۆڤاری رێكخستن گۆڤارێكی ناوخۆییە مەكتەبی رێكخستنی ی. ن. ك دەری دەكات. ژمارە 1، ناوەڕاستی ئەیلولی 1992. تا ئەندام كەرت دەیخوێنێتەوە. لەسەر قەبارەی نیو ئەی فۆڕ چاپكراوە و بریتییە لە 20 لاپەڕە. بە تایپی برازەر بابەتەكانی تایپكراون و دیزانێكی سادەی بۆ كراوە، بەرگەكەی لەسەر هەمان كاغەزی ناوەڕۆكەكەی چاپكراوە، بەڵام رەنگەكەی سەوزە.
لە لاپەرە 1دا ئەم ناونیشانە هەیە «مەبەست لەم گۆڤارە چیە؟» لەبەرئەوەی مەكتەبی رێكخستن لە رۆژهەڵاتدا كۆڵەگەی سەرەكی كاروباری رێكخراوەیی حزبە، بۆیە بۆ تێگەیشتن لەم بڵاوكراوە تایبەتە، ئەمەش رستەبژێرێكە لەو بابەتە:
«بەڵام ئەو باسانەی لە رۆژنامە و گۆڤار و رادیۆ و تەلەفزیۆنەكاندا بڵاودەكرێتەوە، هەمووی ئەو سیاسەتە روون دەكەنەوە، كە لە ئەدەبیاتی سیاسیدا پێی دەوترێت (سیاسەتی راگەیاندن) واتە سیاسەتێك كە هەوڵ دەدات (ی. ن. ك) لەلای جەماوەردا خۆشەویست بكا و ئاستی رۆشنبیریان بەرزبكاتەوە و رووی گەشی یەكێتی بە خەڵك بناسێنێ، سیاسەتێك كە وا دەكا یەكێتی ئەو هەڵوێستە بنوێنێ كە لەگەڵ باری ناوخۆی و ئیقلیمی و دەولیدا دەگونجێن.
رۆژنامەی ناوخۆیی حزبی، یاخود رۆژنامەی زۆر تایبەت لە ژیانی رۆژنامەگەریی یەكێتیی نیشتمانیی كوردستاندا، بەسەر دوو قۆناغی شاخ و شار دابەش دەكرێن
لەبەرئەوە لەم جۆرە راگەیاندنەدا هەموو شتێك بە ئاشكرا ناوترێ ئەم گۆڤارە گۆڤارێكە ئازادتر شتی تیا بڵاودەكرێتەوە چونكە گۆڤارێكە:
- لەبازاڕدا نافرۆشرێ.
- مەبەست لە دەركردنی بانگەشە و پڕوپاگەندەكردن بۆ سیاسەتی یەكێتی نیە.
- تایبەتە بە ئەندامانی ناو یەكێتی و ئەوانی لێ بترازێ كەسی تر نایبینێ.
- هۆیە دیارەكانی ئەو هەڵوێستانەی تێدا بڵاودەكرێتەوە كە ی. ن. ك لەبارەی مەسەلەیەكەوە دەنوێنێ.
- هەرچی گیروگرفتی ناو یەكێتی یە تێیدا باس دەكرێ.
- ئەو هەواڵ و ئامۆژگاری یانەی تێدا بڵاودەكرێتەوە كە ناكرێ لە وەسیلەكانی تری راگەیاندن بە ئاشكرا بڵاوبكرێتەوە
ئەم گۆڤارە گۆڤارێكی ناوخۆییە، واتە تەنها لەناو ریزەكانی رێكخستنی ی. ن. ك دا خۆی دەبینێ، نابێ بچێتە دەرێ و نابێ بكەوێتە دەست هیچ لایەنێك. هەرچی تێدا بڵاودەكرێتەوە، بەپێی ئەو ئامۆژگاریەی لەسەری دەنوسرێ، دەبرێنە دەرەوە یان نا.
پێویستە لەسەر ریكخستنەكانمان:
- حورمەتی نهێنی ئەم گۆڤارە بپارێزن.
- ئیلتزامێكی تایبەت بەو ئامۆژگاریانە بكەن كە تێدا بڵاودەكرێتەوە.
- نەهێڵن بچێتە دەرەوەی رێكخستن.
- هەواڵ و زانیاری تایبەت بە روداوەكانی ناوچەكانی خۆیانی بۆ بنێرن».
ئەو بابەتەی سەرەوە ناوەڕۆكێكی واتاداری وردی هەیە سەبارەت بە رۆژنامەگەریی زۆر تایبەت بە كاروباری رێكخستن و بۆچی حزب پێویستی بەو جۆرە رۆژنامانە هەیە.
بەداخەوە من هیچ ژمارەیەكی دیكەم لەم گۆڤارە نەبینیوە، هەر بۆیە وا سەرنێوی بابەتەكانی ئەو ژمارەیە دەنووسمەوە: ئەركە رێكخراوەییەكانمان لەم قۆناغەی ئێستاماندا. پاشەڕۆژی عراق و هەڵوێستی دەوڵەتان. ناوچەیەكی ئاسایش بۆ شیعە. هەڵویستمان لە پ. ك. ك. پاشەڕۆژی پ. ك. ك چی دەبێ؟ لە پەراوێزی یەكگرتنی سێ حزبی كوردستاندا.
* بڵاوكراوەی ناوخۆ
ئەم بڵاوكراوەیە مەڵبەندی رێكخستنی دەرەوە-ی یەكێتیی نیشتمانیی كوردستان دەریكردووە و تایبەت بووە بە ریزەكانی رێكخستن. كاتی دەرچوونی دیار نەبووە، رووداو و پێشهاتەكان رۆڵیان لە دەركردن و بڵاوكردنەوەیدا هەبووە. زیاتر لە رێگای ئامێری پەیوەندی فاكسمیل بۆ كۆمیتە و كادرەكان ناردراوە. لەسەر قەبارەی نیو ئەی فۆڕ دایە. بۆ تایپكردن و رێكخستنەكانی بابەتەكان سوود لە ئامێری كۆمپیوتەر وەرگیراوە. ژمارەیەكی زۆر لەم بڵاوكراوەیە دەرچووە، لێرەدا ئاماژە بە چەند ژمارەیەك و چەند هەواڵێك دەدەم:
«ژمارە 2، رۆژی 3/5/1994. ژمارە 25، رۆژی 28/6/1994. ژمارە 29، رۆژی 8/8/1996. ژمارە 30، رۆژی 1/9/1996. ژمارە 32، رۆژی 1/9/1996. ژمارە 33، رۆژی 7/9/1996. ژمارە 106، رۆژی 20/8/1996. ژمارە 108، 28/8/1996».
ئەمەش هەواڵێكە لەو بڵاوكراوەیە:
لە ژمارە 108ی رۆژی 28/8/1996یدا چەند هەواڵێك بڵاوكراوەتەوە، ئەم سێ هەواڵە دەنووسمەوە، كە سێ رۆژ پێش هاتنی هێزەكانی بەغدایە بۆ هەولێر واتە پێش 31/8/1996: «رۆژی 27/8 نزیكەی 100 سەیارە و شاحنە لە هێزی سەربازی هاتۆتە دووڕیانی حەمدانیە- موسڵ و لەوێشەوە بۆ رێگای خازەر- فایدە+ رێگای موسڵ ئاكرێ. رژێم تەحشداتی هەیە لە دارەبەن. كەتیبەیەكی دەبابات هاتۆتە ناوچەی بەرامبەر سینارا لە نزیك رێگای ئاڵتون كۆپری- قوشتەپە و هەموو هێزەكانیش (حرس جمهورین)».
* پەخشنامە
لەبەرئەوەی رۆژنامەگەریی تایبەت و نهێنیی ناوخۆیی حزبی لە چوارچێوەیەكی زۆر بەرتەسك و سنووردار دابەشكراوە و دەستاودەستی پێكراوە، بۆیە كۆكردنەوە و پۆڵێنكردن و ساغكردنەوەیان كارێكی ئاسان نییە. ئەوەندەی من بەدواداچوونم بۆ كردووە بڵاوكراوەی «پەخشنامە»ی مەكتەبی رێكخستن تا ئێستا بەتەمەنترین بڵاوكراوەی ناوخۆی یەكێتیی یە، كە لەنێو كادراندا بڵاوكرابێتەوە.
من نزیكەی 100 ژمارە لەو بڵاوكراوەیەم لەلایە، پێدەچێت بۆ بە ژمارەكردنی ژمارەكان، ساڵانە ژمارەكان تازە كراببنەوە. بۆ دڵنیابوونەوە لەو بۆچوونەم ژمارە 77 لە رۆژی 14/11/1998 دەرچووە، بەڵام ژمارە 51 لە رۆژی 16/12/1999 دەرچووە، ئەمە و ژمارە 49 لە رۆژی 2/12/1999 و ژمارە 50 لە رۆژی 4/12/1999 دەرچووە، ئەگەر لەو سێ ژمارەیە (49، 50، 51) وردببینەوە، رۆژێكی دیاریكراو نەبووە بۆ بڵاوكرانەوەی بڵاوكراوەكە. بە گوێرەی زانیارییەكانم تا ئێستاش مەكتەبی رێكخستن بەردەوامە لەسەر چاپ و بڵاوكرانەوەی «پەخشنامە»كەی. بۆ تایپكردن و دیزاین سوود لە ئامێری كۆمپیوتەر وەرگیراوە، بە ئامێری فۆتۆكۆپی دانەی لەبەرگیراوەتەوە. ژمارەی لاپەڕەكانی بە گوێرەی بابەت و نووسینەكان گۆڕاوە، واتە ژمارەی لاپەڕەكانی جێگیر نییە. لە قەبارەی نیو ئەی فۆڕ، یاخود چارەگە فۆڵسكاب دایە.
وەك نموونە چەند هەواڵێك دەنووسمەوە:
لە ژمارە 30ی رۆژی 10/9/2001 دا، ئەم هەواڵە بڵاوكراوەتەوە: «لە رۆژی 12/7/2001 عەلی حەسەن مەجید سەردانی شاری دووزی كردووە، لە بارەگای حزبی بەعس لەگەڵ رەفیق حزبی یەكان كۆبونەوەیەكی ئەنجام داوە، لەمیانی كۆبونەوەكەیدا داوای چەند سەرژمێرییەكی دانیشتوانی شاری دووزی كردووە بەم شێوەیەی لای خوارەوە:
-1 ژمارەی هاوڵاتیانی كورد.
-2 ژمارەی هاوڵاتیانی توركمان.
-3 ژمارەی هاوڵاتیانی عەرەب.
-4 ژمارەی ئەندامانی حزبی بەعس.
-5 ژمارەی بێ لایەن.
-6 ژمارەی ئەندامانی حەرەكەی وەهابی.
-7 ژمارەی سەربازی هەڵاتوو.
-8 ژمارەی قاچاخچی».
لە ژمارە 43ی رۆژی 29/11/2001 دا هاتووە: «وەفدێكی ی. ن. ك سەردانی كۆماری ئیسلامی ئێرانی كرد. لەگەڵ گەورە بەرپرسانی حكومەتی ئێران باسی گروپی تیرۆرستی (جند الاسلام) و چۆنێتی پاكردنەوەیان لە كوردستان كرا، بۆ ئەم مەبەستە رێكەوتنی باش كراوە، هەردوولا ئەم جۆرە گروپانە بە نامۆ و دەستكردی بێگانە دەزانن، پێویستە رێگەیان لێ بگیرێ لە ناوچەكەدا وەدەربنێرێن، هەروەها باسی گەلێ مەسەلەی گرنگی تر كرا كە پەیوەندی بە وەزعی ناوچەكەوە هەیە.»
* بڵاوكراوەی رێكخستن
دوای «بڵاوكراوەی ناوخۆ» و پێشتریش ناوە، ناوە هەواڵنامەیەكی بۆ رێكخستنەكانی ناردووە، ساڵی 1999 مەڵبەندی دەرەوەی یەكێتیی نیشتمانیی كوردستان دەستی بە دەركردنی بڵاوكراوەیەك كردووە و ناوی لێناوە «بڵاوكراوەی رێكستن». لەژێرناوی بڵاوكراوەكەدا ئەم زانیارییانە نووسراون: «بڵاوكراوەیەكی سیاسی رێكخراوەییە، مەڵبەندی رێكخستنی دەرەوەی (ی. ن. ك) دەری دەكات. تەنیا بۆ ئەندامانە». ئەم ژمارانەی لێدەرچووە: «ژمارە 1، نۆڤەمبەری 1999. ژمارە 2، دیسەمبەری 1999. ژمارە 3، فێبریوەری 2000. ژمارە 4، مارتی 2000. ژمارە 5، نیسانی 2000. ژمارە 6، مایسی 2000». هەر یەكێك لەو ژمارانە چوار لاپەڕەیە و لەسەر كاغەزی ئەی فۆڕ چاپكراون، ئامێری كۆمپیوتەر بۆ تایپ و دیزاین بەكارهێنراوە، بە فۆتۆكۆپی دانەی لەبەر گیراوەتەوە و لە رێگای پۆست بۆ كادران ناردراوە.
سەبارەت بە ئامانج لە دەركردنی ئەم بڵاوكراوەیە، لە ژمارە 1دا لەژێر ناونیشانی « ئەم بڵاوكراوەیە و وتەیەك» نووسراوە: «بۆئەوەی هەڤاڵانی رێكخستنەكانمان ئاگایی و هوشیاری زیاتریان سەبارەت بە هەڵویست و سیاسەتی یەكێتیی نیشتمانیی كوردستان هەبێت بە هەموو روداو و گۆرانكارییەكانی ناوخۆ و دەوروپشت و جیهانەوە، بڕیارمان دا وەك هەوڵێكی سەرەتا، ناوبەناو ئەم بڵاوكراوەیە بخەینە بەردەستی هەڤاڵانمان».
ئەنجام
- حزب لە رێگەی هۆیەكانی راگەیاندن و گەیاندن دەتوانێت لەسەر ئەم سێ پایەیە كار بكات، واتە؛ رێكخستن، هوشیاریی، هاندان. ئەم سێ بنەمایە پێناسەیەكی پوخت و كاریی راگەیاندنی حزبیین.
- یەكێتیی نیشتمانیی كوردستان هەر زوو دركی بە كاریگەریی هۆیەكانی راگەیاندن كردووە و نامەكانی مام جەلال باشترین بەڵگەن، نووسەری ئەم بابەتە، توێژینەوەیەكی لەو بارەوە بڵاوكردۆتەوە.
- رۆژنامەی ناوخۆیی حزبی، یاخود رۆژنامەی زۆر تایبەت لە ژیانی رۆژنامەگەریی یەكێتیی نیشتمانیی كوردستاندا، بەسەر دوو قۆناغدا دابەش دەكرێن؛ شاخ و شار.
- لە قۆناغی شاخدا هەر یەكێك لە كۆمەڵەی رەنجدەرانی كوردستان و یەكێتیی شۆڕشگێڕانی كوردستان بڵاوكراوەی ناوخۆیی حزبییان هەبووە.
- لە قۆناغی شاردا، مەكتەبی رێكخستن و مەڵبەندەكان بڵاوكراوەی ناوخۆییان دەركردووە، بە تایبەتیش مەكتەبی رێكخستن و مەڵبەندی دەرەوەی یەكێتیی لە دەرەوەدا، لەو بوارەدا خاوەنی چەند كاریی رۆژنامەگەریین.
- ناوەڕۆكی بڵاوكراوەكان هەواڵی زۆر تایبەت و لێدوان و وتاری تێدایە، كە لە رۆژنامە و گۆڤارە ئاساییەكان نەبینراون.
- لەباری چاپ و دیزایندا زۆر پێشكەوتوونین، وەك دیارە زیاتر مەبەستیان لە گەیاندنی پەیامەكان بووە، نەك جوانكاریی لە دیزایندا.
- ئەو بڵاوكراوانە بۆ توێژەران سەرچاوەی بە سوود و گرنگن.
تێبینی: لە ژمارەی رابردوودا وێنەی بڵاوکراوەیەک بەهەڵە دابەزیبوو كە پەیوەندیی بە بابەتەكەوە نەبوو، داوای لێبوردن لە نووسەری بابەتەكە و خوێنەران دەكەین.
