بێژەری هەواڵی سیاسی، سندوس بایز :

پیشەکەم خۆشدەوێت، چونکە پەیوەندیی بە گوزەرانی هاووڵاتیانەوە هەیە

11:16 - 2024-07-08
هەمەرەنگ
430 جار خوێندراوەتەوە

بێژەری هەواڵی سیاسی لە کەناڵی گەلی کوردستان، سندوس بایز عەبدوڵڵا لە قەڵادزێ لەدایکبووە و لە سلێمانی دەژی. پەیمانگای تەکنیکی دوکانی تەواو کردووە و ساڵی 2009 دەستی بەکاری راگەیاندن کردووە،  سوندس بە دوالاپەڕەی وت:
تا ئێستا بەشداریم لە هەشت خولی راگەیاندندا کردووە و دڵخۆشم  بەپیشەکەم و زۆرم خۆش دەوێت، چونکە هەواڵ راستەوخۆ پەیوەندیی بە ژیان و گوزەرانی هاووڵاتیانەوە هەیە، ئەمەش وادەکات بە ئەمانەتەوە زانیاریی بگەیەنین.  سندوس    وتیشی : 
بێجگەلە راگەیاندن لەبواری ژمێریاریدا شارەزایم هەیە بەحوکمی ئەوەی ژمێریاریم تەواو کردووە. 
لەوەڵامی ئەو پرسیارەدا کە پێی وایە راگەیاندن و راگەیاندنکاری سەرکەوتوو دەبێت چۆن بن، وتی:
بینەری ئێستا زۆر لەوە بە ئاگاترە بەهەواڵی ساختە چەواشە بکرێت، هەموو کەناڵێک ستراتیژی تایبەت بەخۆی هەیە، بەڵام ئەوەی گرنگە هەواڵێک بێت بە پێزبێت و جێگەی چاوەڕوانیی خەلک بێت و هەواڵی راست و دروست بێت.
راگەیاندنکاری سەرکەوتووش  کەسێکە ترسی نەبێت لەگەیاندنی راستییەکان و ئەوەیە کە پیشەکەی بۆ ئیشی بزنس بەکارنەهێنێ، ئەبێ روحت ئاوێتەی ئیشەکەت بێت، هەرچەند کۆسپ و ڕێگریی هەبێت، ئیرادەی سەرکەوتن بۆ رۆژنامەنووسی سەرکەوتوو زیاترە، هەروەها سزاو پاداشت زۆر گرنگە، لە هەردوو حاڵەتدا هاندانە بۆ ئیشی زیاتر.
 راگەیاندن لای من پرۆسەیەکی ئەقڵییە، چونکە کۆمەڵێک هێما و  داتا لە یادەوریی خەڵکدا دەچەسپێنێ، پرۆسەیەکی رۆشنبیریشە،  لە رێگەی راگەیاندنەوە مـــرۆڤ دەتوانێت لەخۆی و ژینگەی دەورووبەری تێبگات.
ســوپاسی ئەوانە دەکــــەم فێریان کردم پشت بەخۆم ببەستم کە ئەم هەنگاوە بۆ مرۆڤ زۆر گرنگە.

ئالان محەمەد جەزا

بابەتە پەیوەندیدارەکان