د. سەمەد ئەحمەد
نزیكەی (3300) ساڵ پێش ئێستا، رامسیسی دووەم، پاشای میسر، كە بە (فیرعەون) ناسراوە و ئێستا لاشەكەی بە مۆمیاكراوی لە یەكێك لە هەرەمەكانی میسر دایە و رۆژانە سەدان بگرە هەزاران كەس سەردانی دەكەن، خەونێكی ناخۆش دەبینێت، لەو خەونەیدا رەشەبا و زریان و تۆفەنێك لە ئاگر، لە باكووری وڵاتەوە هەڵدەكات، دار و دیوار دەسوتێنێ، میسر یەكپارچە دەكات بە خەڵووز و سوتوو..
(فیرعەون) بۆ لێكدانەوەی خەونەكەی، كاهین و سیحرباز و ئەستێرەناسەكان داوەتی كۆشكەكەی دەكات، ئەوانیش خەونەكەی بۆلێكدەدەنەوە، پێی دەڵێن: كوڕێك لە نەوەی ئیسرائیل لەدایك دەبێت، هێز و دەسەڵاتت لێدەسێنێتەوە
(فیرعەون) بۆ لێكدانەوەی خەونەكەی، كاهین و سیحرباز و ئەستێرەناسەكان داوەتی كۆشكەكەی دەكات، ئەوانیش خەونەكەی بۆلێكدەدەنەوە، پێی دەڵێن: كوڕێك لە نەوەی ئیسرائیل لەدایك دەبێت، هێز و دەسەڵاتت لێدەسێنێتەوە، ئینجا لەناویشت دەبات! لە دوای ئەمە، (فیرعەون)، جگە لەوەی ترسی لێدەنیشێت، توڕە و شێت و هاریش دەبێت، بڕیار دەدات: هەر ژنێكی نەوەی ئیسرائیل كە منداڵی كوڕی ببێت، دەبێت یەكسەر سەرببڕدرێت و بكوژرێت.. بەفەرمانی فیرعەون، هەزاران منداڵی نەوەی ئیسرائیل سەربڕدران. ئا لەم سەردەمی زوڵم و ترسەدا (موسا) لەدایك دەبێت، دایكی نزیكەی سێ مانگ بەنهێنی بەخێوی دەكات، بەڵام لەترسی ئەوەی ئەمیش بەدەردی كوڕانی تر نەچێت، موسا دەكاتە سەبەتەیەكەوە،بە ئومێدی ئەوەی بكەوێتە دەست كەسێكی خاوەن سۆز و ویژدا و لەمردن رزگاری بكات، دەیداتە دەم ئاوی نیلەوە.. قەدەری خوا وابوو، موسا نەمرد و ما، كەوتە دەست (ئەنخاس ئاموون)ەوە، كە یەكێك بوو لە ژنە هەرە جوان و خۆشەویستەكانی فیرعەون، ئەم ژنە نەزۆك بوو، نەزۆكیی خۆی لە فیرعەون شاردبووەوە، دوای ئەوەی موسای دۆزییەوە، وەك كوڕی خۆی بەخێوی كرد، وەكو فیرعەونزادەیەش لەكۆشكی پاشایەتیدا فێری خوێندەواری و زۆر زانست و زانیاریكرد..
(موسا) كە لە جوانی و شەنگی و هێز و باڵا و رێكی جەستەدا بێوێنە بوو، لە ئازایەتی و رەندی و مەردیشدا بێ هاوتا بوو، دوای ئەوەی كە گەورە بوو و تەمەنی گەیشتە قۆناغى بالقبوون، (فیرعەون) ترسی ئەوەی لێنیشت كە ئەم كوڕە لاوە لەناوی ببات، بۆیە بەبیانوویەك لە كۆشكی پاشایەتی دەریدەكات و وەك جەنگاوەرێك دەیكات بە سوپاسالار و دەینێرێت بۆ شەڕ، بە ئومێدی ئەوەی كە لەشەڕدا بكوژرێت و هەرگیز نەیبینێتەوە، بەڵام (فیرعەون) ئەم خەونەشی نەهاتەدی، كوڕە لاو نەكوژرا و ما..
(هاوارد فاست) لەم رۆمانەدا، پشتی بە سەرچاوە مێژووییەكان و هەرسێ كتێبی ئاسمانی (تەورات و ئینجیل و قورئان) بەستووە، هەوڵی داوە لە رێگەی گێڕانەوەی ماجەرای ژیانی (موسا) وە، كە ئێجگار ژیانێكی سەرنجڕاكێش و پڕ لە حیكمەتە و شایانی موتاڵا و تێفكرین و تێڕامانە، ئاشنامان بكات بە ئاین و داب و نەریت و ژیان و ژیار و شارستانییەتی فیرعەونەكانی میسر، كە شارستانییەتێك بووە لە رووی زانستی ئەندازیاری و پزیشكی و گەردوونناسیی وكشتوكاڵ و هونەرەكانی جەنگ و كەشتی دروستكردن و.. هتد، هێندە پێشكەوتوو بووە، بۆ مرۆڤی مۆدێرن، بۆ مرۆڤی سەردەمیئێستای تەكنەلۆجیای دیجیتاڵیش جێگای سەرسامییە!
لەم رۆمانەدا (موسا) كە سومبوولی هەقبێژی و دادپەروەری و بەرخۆدان و خەبات و بەرگریكردنە لە چەوساوە و هەژاران، لە پێناو نەهێشتی زوڵم و ستەمكاریدا كە (رامسیسی دووەم - فیرعەون) نوێنەرایەتی دەكات، هەوڵدەدەت ئاینی (ئاتوون - یەكتاپەرستی) زیندوو بكاتەوە، كە سەردەمانێك لە میسردا پەیڕەو دەكرا و لەسەردەمی (رامسیسی دووە – فیرعەون) دا ئاینی (ئاموون)كە دژی یەكتاپەرستی بوو، پەیڕەو دەكرا..
لەم رۆمانەدا ئەوە دەخوێنینەوە ئەگەرچی مێژووی مرۆڤایەتی چەندە دێرینە، چەندە لەسەردەمێك بۆ سەردەمێكی تر جیاوازن لەیەك، چەندە دژ بەیەكن.. لەمانە زیاتر لەیەك دەچن ! ئاخر ئەو شەڕەی، ئەو هەوڵ و تێكۆشانەی، ئەو حەز و ئارەزووانەی، ئەو گرفتانەی كە مرۆڤی مۆدێرن، مرۆڤی ئەم چەرخە هەیانە، مرۆڤی هەزاران ساڵی پێش ئێستاش هەیان بووە ! شەڕی دەسەڵات، شەڕی پارە و دەوڵەمەندی، مل شكاندنی ئەویدی، خیانەت، شۆڤاری و جاشایەتی، شكست، سەركەوتن.. سێكس و شەهوانییەت، دڵپیسی، خۆشەویستی، سۆز و میهرەبانی، مەردی و رەندی و هەموو شتێكی تر لە رۆمانی (موسا، شازادەی میسر) نەك هەردەخوێنیتەوە، بەڵكو چونكە هێندە جوان رووداوەكان سفت چنراون، دەشیان بینیت.. بەڵێ دەیان بینیت!!
رۆمانی (موسا، شازادەی میسر)، لە نووسینی رۆماننووسی بەناوبانگی ئەمریكی (هاوارد فاست)ە، (ئەبوبەكر ساڵح ئیسماعیل) لە فارسییەوە زۆر بەجوانی كردوویەتی بە كوردی، هەزارجار دەستی خۆشبێت، ساڵی (2009) دەزگای موكریانی لە دووبەرگدا و لە دووتوێی (896) لاپەڕەدا چاپ و بڵاوی كردووەتەوە.. عەیبێك كە ئەم رۆمانە هەیبێت ئەوەیە بەخەتێكی زۆر ورد و بەفۆنتی (10) نووسراوە، چاو بەتەواوی ماندوو و ناڕەحەت دەكات، وەكو من تا خوێندمەوە، چەندین چار چاوی هێنامە ئێش.. هیوادارم ئێوەش دەستی بخەن، لە ئێستاشەوە و لە دەمی هونەرمەندی رەحمەتی (عەباسی كەمەندی) یەوە دوعا بۆ هەر كەسێك كە ئەم رۆمانە دەخوێنێتەوە، دەكەم و دەڵێم: (تۆ چاوت نەیەشێ، عالی و بەكەیفە .. با چاو من بێشێ، كەس نایژێ حەیفە).
