محەمەد نەجمەدین فەرەج ناسراو بە محەمەد كەساس ساڵی 1957 لە گەڕەكی كانی ئاسكانی سلێمانی لەدایكبووە و دەرچووی پەیمانگەی مامۆستایانی سلێمانییە و ئێستا مامۆستای خانەنشینە.
محەمەد كەساس بە دوالاپەڕەی وت: لە سەرەتای ساڵانی حەفتاكانی سەدەی رابردووەوە لە پەنجەرەی شیعرەوە هاتۆتە ناو جیهانی بەرفراوانی ئەدەبەوە و یەكەمین شیعری خۆی لە ساڵی 1977 لە رۆژنامەی هاوكاری بڵاوكردۆتەوە و تا ئێستاش لە نووسین بەردەوامە.
وتیشی: تا ئێستا 30 بەرهەمی چاپكراوم هەیە، شەش بەرهەمیان دیوانە شیعری خۆیەتی و 12 بەرهەمی ئەدەبی منداڵان و 10 بەرهەمی دیكەش بابەتی وەرگێڕانن. لە بوارەكانی ئەدەبی منداڵان و شیعر و بابەتی وەرگێڕان لە زمانی عەرەبییەوە، یەكێكە لە شاعیرانی ئەدەبی بەرگری.
محەمەد كەساس سەبارەت بە ئەدەبی منداڵان وتی: ئەدەبی منداڵان بە رواڵەت دنیایەكی سادە و ساكارە، بەڵام لە ناوەڕۆكدا زۆر دژوارە، چونكە نووسەر و شاعیر رەنگە هەرگیز بە تەواوەتی مافی راستەقینە بە دەق نەدەن، لەبەر ئەوەی كە بەشێكی هەرە زۆریان لەگەڵ جیهانی منداڵدا ئاشنا نین و هەندێك كەس بە زۆر و زۆرداری خۆیان بەسەر ئەدەبی منداڵاندا سەپاندووە.
كەساس لەبارەی ئەركی ئەدەبەوە وتی: لە راستیدا ئەركی ئەدەب گەیاندنی پەیامی مرۆییە بۆ فەراهەمكردنی جیهانێكی پرشنگدار و خۆشگوزەران بۆ مرۆڤایەتی.
ئاماژەی بەوەشكرد كە دیوانێكی شیعری كلاسیكی ئامادەیە بۆ چاپ و چاوەڕوانی سپۆنسەرێك دەكات بۆ ئەوەی چاپی بكات.
جەواد جەعفەر
