نزار بەزاز.. 53 سالێن خەباتا رەوشەنبیری و ھونەری (شانۆڤان، شاعیر، شێوەكار، دیزاینەر، موزیكژەن)

دیدار: رۆژڤان

د بیاڤێ شانۆیێ دا، پیشەنگ بوو و چەندین شانۆگەری نڤیسینە و سەرۆكێ تیپەكا شانۆیێ بوو و ئەكتەری ژی یا كری. 
د بیاڤێ نڤیسینێ دا، بەشداری د چەندین رۆژنامە و گوڤاراندا هەیە و دوو دیوانێن شعری هەنە و چەندین شعرێن وی بووینە ستران و ئاواز بۆ هاتینە دنان و بدەنگێ چەند ھونەرمەندێن ب ناڤ و دەنگ هاتینە گوتن. 
د بیاڤێ دیزاینێ دا، بۆ چەند رۆژنامە و گوڤارێن كوردی كاركریە و بەرگێ چەندین پەرتووكان ژ دیزاینا وینە.
 دبیاڤێ شێوەكاریێ دا، باشنڤیسە، شێوەكارە و تابلویێن وی دناڤا پیشانگەهێن تایبەت و یێن هەپشكدا و نە بتنێ ل ناڤخوویا عیراقێ، بەلكو ل وەلاتێ ئوردنێ ژی هاتینە نمایشكرن و دگەل ڤانە هەمیان ژی، لێدەرەكێ زیرەكێ ئامیرێ بزقێ یە.

*نزار بەزاز ناڤەكێ بەرنیاسە و تایبەتی ژی بەری سەرھلدانێ، ناڤێ وی دناڤا كارێن رەوشەنیری و ھونەریدا گەلەك دكەتە بەرچاڤ، تو كەنگی بوویە خودانێ ڤی ناڤی؟
- هەمی كەسان ناڤێ خوە هەیە، لێ وەك نزار بەزاز، ل سالا 1971ێ ئەز هاتمە ناڤ گورەپانا نڤیسینێ و ھونەری، ھینگێ من و چەند هەڤالان ئەڤێن حەزا ئەكتەریێ و ھونەری هەیی، مە (تیپا 11ی ئادارێ یا ھونەری) دامەزراند.  وی دەمی من گەلەك شانۆگەری نڤیسین و ژلایێ ڤێ تیپێ ڤە ل سەر دەپێ شانۆیا ئامادەییا كاوە ل دھوكێ دهاتنە پیشاندان و بەلكۆ ل چەندین قەزا و ناحیێن دی یێن سەر ب دھوكێ ڤە ژی دهاتنە پیشاندان.  ھووردەكاریێن ڤێ تیپێ ژی د پەرتووكا (بزاڤا شانۆیێ ل دھوكێ) یا ھونەرمەندێ وەغەركری (رەفعەت رەجەب)دا هاتینە بەلگەكرن. 
بۆ نڤیسینا شانوگەریێن خوە ژی ئەز ل وان بابەتان دگەرییام ئەڤێن بۆ كومەلگەھی دگرنگ، ب رەنگەكێ كومێدی و تەعبیری و هەمی كارێن من یێن ھونەری د پەرتووكا ناڤبریدا د بەلگەكرینە و سەرۆكێ ڤێ تیپێ ئەز بخوە بووم و تا سالا 1973ێ ئەڤ تیپە ما و پاشی ئەز بۆ سەربازییا زورەملێ یا وی دەمی، هاتمە داخازكرن.

*ئەو چ ئەگەر بوون، بەرێ تە ژ شانۆیێ دایە نڤیسینێ؟
- ل سالا 1979ێ ئەز ل (دار الثقافة و النشر الكردية) ل بەغدا هاتمە دامەزراندن. د پرانیا چاپكریێن وێدا من كارێ دیزاینێ كرییە، وەك (رۆژناما هاوكاری، گوڤارا بەیان، گوڤارا رەنگین، گوڤارا رەوشەنبیری نوێ)، دیسان من بەرگێ گەلەك پەرتووكان ژی دیزاین كرییە و پاشی ئەز بوومە بەرپرسێ بەشێ ھونەری و رێڤەبەرێ نڤیسینێ یێ گوڤارا بەیان و ل سالا 2008ێ ئەز ب پلا رێڤەبەرێ ھونەری، هاتیمە خانەنیشنكرن.

*چەند ھونەرمەندێن ب ناڤ و دەنگ شعرێن تە كرینە ستران، كا بۆ مە بەحسا خوە و شعرێ بكە؟
- ل سالا 1980 من دەست ب نڤیسینا شعرێ كریە و ئێكەم شعرا من ل وێ سالێ د رۆژناما هاوكاریدا بلاڤبوویە، ژ وی دەمێ وەرە ئەز شعرێ ب هەردوو زمانێن (كوردی و عەرەبی) د نڤیسم و د چەندین رۆژنامە و گوڤاران دا هاتینە بلاڤكرن و ل سالا 1987ێ ئێكەم دیوانا من یا شعری ب ناڤێ (ئەڤینی مالا منە) دەركەفتییە و ل سالا (2000) دیوانا من یا شعری یا دوێ ب ناڤێ (هەیڤ و شەڤ) هاتیە چاپكرن و چەندین شعرێن من بووینە ستران و ئاواز بۆ هاتینە دانان و سترانبێژێن بناڤ و دەنگ گوتینە، وەك (ئەیاز زاخولی، عەبدوڵڵا زێڕین و گولبەهار). 

*ل سەر ئەكاونتێ تە یێ سوشیال میدیایێ، ئەم تابلۆیان دبینین؟
- بەلێ د شێوەكاریێ ژی دا من دەستێ هەیی و تابلۆیێن من د پیشانگەهێن تایبەت و یێن هەڤپشك ژی دا هاتینە نمایشكرن، نە بتنێ ل ناڤخوییا عیراقێ، بەلكو ل وەلاتێ ئوردنێ ژی هاتینە پیشاندان و ژبلی ئەڤێن من گوتین ژی، ئەز لێدەرێ بزقێ ژیمە.