ھیڤی زێرەڤان
لڤان هەیامێن بوری، ئەم خوەش گۆتنێن ل دۆر پێکڤەژیانێ د بهیزن. گوتنێن وەكو ئاشتی و ئێک ودوو قەبوولکرن، زێدە دووبارە و سێبارە و چاربارە دبیت. لێ د راستیدا و وەک کەتوار، پترییا جڤاکی گوهـ نادەتێ و کار پێ ناکەت و قەبوول ناکەت. بەرۆڤاژی، هەڤدو کێمکرن و کرێتکرن ب رێژەیەکا مەترسیدار زێدەبوویە و بەردەوامە.
کا ئەم بهێین ل ئەگەران بگەڕن، دەستپێکێ بلا ئەم ئاوڕەکێ ل شیرەت و ئامۆژگاریان بدن، ئەڤێن رۆژانە دئێنە ئاراستە کرن، کا بۆچی چو بەرێ خوە نینە یان ئەم بێژن چو شوونوارێن خوە یێن بەرچاڤ نینن؟
ئەم دبینن پڕانییا مللەتێن پێشکەفتی دسەردەمێ نووکەدا، ئامۆژگاریان وەرناگرن، چونکی خوە ئازاد دبینن
ب دیتنا من، پێتریا مرۆڤێن سەردەم شیرەت و ئامۆژگاریان وەرناگرن، چونکی شیرەت و ئامۆژگاری ڕێکەکا کیێر نەهاتییە ژبۆ ئاراستەکرن و رەفتارکرنێ. د گەوهەرێ شیرەت و ئامۆژگاریاندا جۆرەکێ خوە بلند دیتنێ هەیە، جۆرەکێ دفن بلندیێ هەیە؛ هەر ژبەر وێ چەندێ ژی، ئەم دبینن پڕانییا مللەتێن پێشکەفتی دسەردەمێ نووکەدا، ئامۆژگاریان وەرناگرن، چونکی خوە ئازاد دبینن، خوە پێگەهشتی دبینن، حەز ژ وێ خوە بلند دیتنێ و دفن بلندیێ ناکەن؛ بەلکو پەنایێ دبەنە بەر چاندنا هزران دناڤ جڤاکێن خوەدا، ب هندەك رێکێن دی، کۆ ژلایێ مرۆڤان ڤە باشترن ژبۆ وەرگرتنا هزران و هەزمکرنا وان.
رێکا ژ هەمییا باشتر تا نووکە کۆ راستڤەکرنێن باش ژی د شێوازێ وێدا هاتینە کرن «سینەمایە»، یا کۆ رۆلەکێ مەزن و کاریگەر ل سەر هزرا بینەران دهێلت. بۆ نمۆنە؛ ئێدی د کێم فیلماندا مرۆڤ قارەمانەکێ ئێکانە دبینت، کۆ بتنێ ئەو یێ باش و زیرەك و ژێهاتییە. پێتریا کاران چو قارەمانێن دەستنیشانکری نینن، ژبەرکۆ ئێدی وان دڤێت بینەر تێبگەهن کۆ ژیان گەلەك ژ هندێ مەزنترە کۆ ل دۆر کەسەکی بزڤڕت. هەروەسا پێتریا فیلمان زێدەتر نزیکی ژیوارێ ژیانێ نە و دفرە رەهەندن. ئەڤ چەندە ئاسویێن هزرێ ل دەڤ مرۆڤان پێتر ڤەدکەن و وە دکەت، کۆ مرۆڤ ب گومان بکەڤیت لسەر هزرێن خوە یێن کۆنکریتی و دەرفەتا تێگەهشتن و تێهزرینێ دگۆتن و تێگەهاندا باشتر بکەت، بلا ئەم ژی بۆ خوە پیچەك مفایی ژ ئەزموونێن یێن دی وەربگرین.
