ئا: نەرمین عوسمان محەمەد
لە سەرەتای ساڵێ پێنجهەمیدا سەرلە ئێوارەی رۆژی
2024/8/8 گرووپی هاوڕێیانی خوێنەر و بە ئامادە بوونی ژمارەیەک لە نووسەران و رۆشنبیران لە دەزگای (جەمال عیرفان) یادی دامەزراندنی گرووپەکەیان کردەوە، لە سەرەتای یادەکەدا وتاری گرووپەکە لەلایەن خاتوو نیشتیمان عەبدولقادرەوە خوێندرایەوە و بۆچوون و پێشنیاری کۆمەڵێك لە نووسەران لە سەر گرووپەکە پێشکەش کرا، لەوانە نووسەر بەیان سەلمان کە گوتی «هیوادارم گرووپەکەتان کاری زیاتر بکات و من لەلای خۆمەوە هەرچیم پێ بکرێت ئامادەم بۆ هاوکاریتان»، هاوکات رۆماننووس میران ئەبراهام گوتی: «وێڕای بەخێر هێنانم بۆ ئەندامە تازەکانتان هیوادارم بەردەوام بن»، هەروەها رۆماننووس کاروان کاکە سوور گوتی «هەمیشە دەستی ئەو گرووپە دەگوشم و دەڵێم با دیالۆگ پێشڕەومان بێت « دواتر وتاری هەردوو بەڕێزان ئاشنا ئەزوەر بەرپرسی رێکخراوی کەریمی عەلەکە و شاخەوان سدیق دامەزرێنەری گرووپەکە پێشکەش کران و مۆمی پێنج ساڵەی گرووپ داگیرسێنرا و بڕوانامەی رێزلێنان لە لایەن دامەزرێنەری گرووپەکەوە پێشكەش بە هەریەک لە ئەندامانی گرووپەکە کرا، سەبارەت بە گرووپەکە و و ئەم یادکردنەوەیە، شاخەوان سدیق دامەزرێنەر و سەرپەرشتیاری گرووپەکە بە ئەدەب و هونەری راگەیاند: «لە راستیدا رۆژێکی خۆشە بۆ ئێمە کە رۆژێک بە خەونێکی بچووکەوە دەستمان پێکرد بەڵام بە بڕوا بەخۆبوون و متمانەوە کە گرووپێکی رۆشنبیری خوێندنەوەی کتێب و گفتوگۆ لەگەڵ نووسەران دابمەزرێنین، ئەوە تەمەنی گرووپەکە ئەمڕٶ بوو بە پێنج ساڵ کە هەموو هەفتەیەک بە بێ دابڕان پێنجشەممان توانیومانە ئەڵقەیەکی رۆشنبیریی دروست بکەین و گفتوگۆ لەگەڵ نووسەران بکەین بۆ من جێگای شانازییە کە توانیومە جێگە پەنجەی خۆم بەجێبهێلم لەوەی کۆمەڵێک تاکی خوێنەر کۆبکەمەوە بتوانن گفتوگۆبکەن، رەنگە ئەوە شانازییەکی گەورە بێت کە لەم سەردەمی تەکنەلۆجیا و دیجیتاڵ میدیا و هەموو ئەو شتانەی تردا توانیوومانە ئەو کارە بکەین، بەهیوام توانیبێتمان لە رابردوودا شتێک بکەین و بۆ داهاتووش بەو رۆحییەتەی پێشووەوە بەردەوام بین، هەروەها خاتوو بەهرە یاسین وەکو ئەندامێکی گرووپەکە گوتی:
«سوپاس بۆ سەرپەرشتیاری گرووپ و هەموو ئەندامەکانی بۆ من زۆر جێگای شانازی و دڵخۆشییە ئەم گرووپە چونکە توانیوومە لە رێگای ئەم گرووپەوە کۆمەڵیک زانیاریی زیاتر وەربگرم، لەبەرئەوەی لەم گرووپەدا ئێمە هەموو کایەکان وەردەگرین و زۆرینەی ژانرەکانمان وەرگرتووە ئەگەر ئەدەبیی بوو بێت یان فەلسەفی یاخود هەر بوارێکی دیکە بوو بێت کە بۆ من پڕ چێژ و پڕ سوود بووە» هەروەها ئەندامێکی دیکەی گرووپەکە عەلی عەزیز گوتی: چوارهەمین ساڵگەڕی گرووپی هاوڕێیانی خوێنەر تەواو بوو و داخڵی پێنجهەم ساڵ بووین، ئەم گرووپەمان کۆمەڵێك هاوڕێین هەوڵدەدەین خوێندنەوە بە کەلتوور بکەین و هەڵسەنگاندن بۆ رۆمانەکان، بۆ شیعر، بۆ چیرۆک بکەین، بەراستی یەکێک لە شانازییەکانی ژیانی من ئەوەیە کە لەم گرووپەدام، ئەمە منی بەرەو پێش بردووە و مەعریفەمی زیاد کردووە لەگەڵ کۆمەڵێک کەسدا کە وێڕای خوێنەر بوونیان نووسەر و وەرگێڕ و لێکۆڵەرن و ئەزموونیان هەیە و کەسانی ئەکادیمین، من بۆخۆم زۆر سوودم لێیان بینیووە، ئەمڕۆ رۆژێکی زۆر خۆش بوو بەلای ئێمەوە چونکە بەو پەڕی ئالنگاری و خۆراگرییەوە توانیمان بچینە ناو پێنجەم ساڵەوە، هیوای بەردەوامی وچالاکی زیاتر بۆ گرووپەکەمان دەخوازم».
