هەڵگری خەڵاتی نۆبڵی ساڵی 1907
شاعیری ئینگلیز ردیارد کبلنگ، لەشاری بۆمبای لە وڵاتی هیندستان لەساڵی 1856 لەدایک بووە و لەساڵی 1936 لە ئینگلترا ژیانئاوایی کردووە. چۆتە کۆلیژی سەربازیی لەدیڤن لە ئینگلترا بەڵام لەبەر چاوکزی نەیتوانیوە لەکاری سەربازیی بەردەوام بێت و لەساڵی 1882گەڕاوەتەوە بۆ هیندستان و لەبواری رۆژنامەگەرییدا کاریکردووە. لەپاڵ ئەوەی بەشاعیر ناسراوە وەکو رۆماننوس و کورتە چیرۆکنووسیش جێ دەستی دیاربووە، زۆر سەرسام بووە بە ئیمپراتۆریەتی بەریتانی و خاوەنی ئەو شیعرە بەناوبانگەیە کە دەڵێ:(رۆژه هەڵات رۆژ هەڵاتە و رۆژ ئاواش رۆژ ئاوا، هەردووکیشیان هەرگیز بەیەکتر ناگەن). ردیارد خەڵاتی نۆبڵی لەپای تێبینییە بەهێزەکانی و رەسەنایەتی هزری و گوڕوتینی بۆچوونەکانی، هەروەها توانای بێ ئەندازەی لە چڕکردنەوەدا پێ بەخشراوە.
وەرگێڕانی لە عەرەبییەوە:
ئاوات حەسەن ئەمین
ئـــەگـــەر
گەر توانیت ورەی خۆت بپارێزیت،
لەکاتێکدا هەموو ئەوانەی دەورو پشتت لەدەستیان داوە و
خەتاکەشیان خستۆتە ئەستۆی تۆ.
گەر توانیت باوەڕت بەخۆت هەبێت
لەکاتێکدا سەرجەم خەڵکیی گومانت لێ دەکەن،
تۆش لێیان دەبووریت لەو گومانکردنەیان.
گەر توانیت چاوەڕوان بیت بەبێ ئەوەی بێزار بیت،
یان کەسانی تر درۆت لەگەڵ بکەن بێ ئەوەی تۆ درۆیان لەگەڵ بکەیت،
یان رقیان لێت ببێتەوە بەبێ ئەوەی تۆ رقیان بەرامبەر هەڵگریت.
لەهەمان کاتیشدا دڵت بەخۆت خۆش نییە و
فەلسەفەش بەسەر کەسدا لێ نادەیت.
گەر توانیت خەون ببینیت بەبێ ئەوەی خەون ببێتە گەورەت.
گەر توانیت بیر بکەیتەوە بەبێ ئەوەی بیرکردنەوەت ببێتە ئامانجت.
گەرتوانیت لەگەڵ سەرکەوتن و شکستا رووبەڕوو ببیتەوە بەهەمان شێوە.
گەر توانیت گوێت لە گوتارێکی راستگۆیانەبێت
کە لەلایەن تەڵەکە بازەکانەوە شێوێنراوە
تاببێتە تەڵەیەک بۆ گەمژەکان،
یان بتوانیت تەماشای ئەوهەموو شتە بکەیت
کەتەمەنت بۆ سەرف کرد تا دروستیان بکەیت و
دواتر لەبەرچاوتدا ووردوو خاش دەبێت،
دواتر دەچەمێیتەوە تا بە کەرەستە پەرپووتەکانت
هەوڵی دروست کردنیان بدەیتەوە.
گەر توانیت هەموو پاشەکەوتەکانت کۆبکەیتەوە و
بەیەکجار قوماری پێوە بکەیت، بە پشتبەستن بە چارەنووس و بەختت
دەی دۆڕێنی و
دواتر لەسەرەتاوە، لەسفرەوە دەست پێدەکەیتەوە،
بەبێ ئەوەی لێوی پەشیمانیی بگەزیت.
گەر توانیت زۆر لەدڵت یان مێشکت بکەیت بەردەوام بن لەرۆڵگێڕانت
دوای بەسەرچوونیان
یان بتوانیت خۆڕاگر بیت، دوای ئەوەی هیچت بەدەستەوە نامێنێ لە ناختا،
تەنیا ئەو ئیرادەیە نەبێ کە پێت دەڵێ خۆڕاگربە.
ئەگەر توانیت گوتار بۆ جەماوەر بدەیت و سیفەتی راستگۆیی بپارێزیت
یان لەگەڵ پادشاکاندا رێ بکەیت،
بێ ئەوەی پێیەکانت لەزەوی بترازێن
ئەگەر نە دۆست و نە دوژمن توانای ئەوەیان نەبێ کە بریندارت بکەن
گەر توانیت رێز بۆ هەموو کەسێک دابنێیت بەڵام
بەبێ زیادە رۆیی.
گەر توانیت ساتێکی شەست چرکەیی پڕبکەیتەوە
بە راکردنە خێراکەت
کەواتە :
چی لەجیهان و ناویدایە
هی تۆیە.
لەوەش زیاتر
کە زۆر گرنگە
ئیتر تۆ بە پیاو هەژمار دەکرێیت و زیاتریش
بەپیاویش دادەنرێیت ئەی کوڕی خۆم.
سەرچاوە:قصائد من شعراء جائزه نوبل
إختارها وترجمها د. شهاب غانم مارس 2009
