عەبدولڕەحمان بامەڕنی
هەلبژاردن ب پرۆسەكا دیموكراسی دهێنە زانین و لهەمی وەلاتان تایبەت ئەڤ وەلاتێن پێشكەفتی و ئەڤێن گرنگیێ بمافێ مرۆڤی ددەن، هەلبژاردنان دكەنە بنەمایەك بۆ رادەستكرنا دەستهەلاتێ، چ ل سەر ئاستێ تاكی بیت یان حزبێ و ئەڤا من دڤێت دڤێ گوتارێدا بەحس بكەم، ئایا مە شییا چ ئەزموون ژڤێ گەرا هەلبژاردنێن پەرلەمانێ كوردستانێ وەربگرین یێن 2024ێ؟
ئەز بەحسا قوناغا پشتی دەنگدانێ ناكەم و چ حزبەكێ دەنگێن خوە كێمكرن یان زێدەكرن و كی ژ كاندید شییا دەنگێن پێدڤی بۆ خوە بینیت، لێ ئەز دێ بەحسا بەرنامەیێ حزبان كەم، بەرنامەیێ كاندیدان. مە هەمیان دیت چ شلەژان كەفتبوو ناڤ جاددێ، حزبان ب سەرۆكێن خوەڤە خۆ بەردابوونە ناڤ جەماوەرێ خوە و دا بشێن باوەرییا وان بدەستڤەبینن و دەنگێن خوە زێدەبكەن، ئەو تشت دگوتن یێن خەلكی پێدڤی پێهەی، چ خۆشگوزەرانی بیت یان خۆشكرنا ژیانا وان و ئایندێ وان و نەهێلانا كەموكۆرتیان و ژخوە بەربژێران ژی، سەرەدانێن خوە چڕ كربوون، كەسێن سلاڤەك ژی دگەل هەیی، خوە دگەهاندنێ و سەرەخۆشی لئێك دكرن و مرۆڤایەتییا خوە دووپاتدكرن. لڤێرە چ دگەھینیت، هەم حزب و هەم كاندید كەفتبوونە حالەتێ تەنگاڤیێ، ل تەنگاڤییان ژی مرۆڤ پێدڤی هەر كەسی دبیت، مرۆڤ قورتال ببیت چ ئەو قورتالبوونە رزگاربوونا مرۆڤی بیت ژ روودانەكێ یان گەھشتنا مرۆڤی بیت بۆ پلە و پوستەكی و حزبێن مە و بەربژێران ژی ئەڤە كر، برەنگەكی و دوویان دەستێ خوە ل بەر دەنگدەری درێژكرن كو وان ژ ڤێ تەنگاسیێ رزگار بكەن، ھندەكان پارە بەخشین، ھندەكان جوامێرییا خوە ئینا پێش و مرۆڤكانێ و عەشیركانێ خورتكرن و لدویڤ رھـ و دیندەهاخوە چوون و ژخوە حزبان هەر خزمەتا كری ئینانە بەرچاڤێ دەنگدەری و هوسان، لێ ئەڤ هەلبژاردنە و ئەڤ دەستێخوە درێژكرنا ل بەر دەنگدەری، بتنێ تشتەكی پیشانی مەددەت، ئێدی دەمهات ئەم چ وەك تاك، چ حزب دەستان ژ ھندەك رەفتارێن خوە بەردەین و خوە شور بكەینە ناڤ خەلكی و دەستێ هاریكاریێ بۆ وان درێژبكەین، دا ل رۆژەكا ھوسا ئەو ژی دەستێ خوە بۆ مە درێژ بكەن.
