دیدار: رۆژڤان
دیرۆكا جوھییان ل دەڤەرا ئاكرێ و بەردەرەش، ئەڤە بەرهەمێ نوی یێ نڤیسەر (سەعید شەریف)ە و دا ژ نزیك بزانین، ڤەكولین و دیڤچوونێن وی یێن مەیدانی ل سەر بابەتێ جوھییان، ژین و ژیارا وان، دابونەریتێن وان، ژیانا وان دگەل دەوروبەرێن وان و ئەو جھێن لێ ژیایین گەھشتییە كیڤە و چەندین پرسێن دی ل سەر ڤان ڤەكولین و دیڤچوونان ل سەر مێژوویا جوھییان، مە ئەڤ دیدارە دگەل نڤیسەر (سەعید شەریف) كریە و ددانوستاندنێن خوەدا، مە پرسیارێن خوە لبەر رێزكرن و وی بەرسڤێن خوە لسەر ددان.
* وەك خەمخورەكێ مێژووڤان، تە چەندین بەرنامێن مێژوویی ل چەند رادیویان پێشكێشدكر و نۆكە ل سەر دیرۆكا جوھیێن كوردستانێ كاردكەی، ئایا ئەم دشێین بێژین بسپورییا تە مێژوویە؟
- ئەز نەمێژوونڤیسم و ئەز زێدەتر خوە نزیكی ھونەری دبینم، لێ ژ ڤالاتیێ و وەك ئەركەكێ نیشتیمانی و یێ نەتەوەیی، من خوە دایە بەر ڤی ئەركێ گران.
*مەبەستا تە بڤالاتیێ چ تشتە، ئایا مە مێژوونڤیس نینن؟
- ئەز ب نموونەكا نڤیسەر (سەعید دێرەشی) بینم، د پەرتووكا خوە ئەوا ل سەر دیرۆكا میرنشینا بەھدینان دبێژیت: «دەما ئەز خوێندكار ل زانكویا بەغدا، ماموستایەكێ مە گازی من كر و گوت، مادەم تە دەستێ نڤیسینێ هەیە، هەرە ل سەر دیرۆكا خوە ئامێدیێ بنڤیسە كو پرە ژ ڤالاتیێ» و هەمان تشت بۆ من ژی، ژبەركو مللەتێ كورد مللەتەكێ دێرینە و چەندین شارستانیەت ل سەر پەیدابووینە و ب لاندكا مرۆڤایەتیێ دھێتە ناسكرنێ، زورا ئاساییە مە ڤالاتی دبوارێ مێژوویێدا هەبیت، ژبیرنەكەین ژی، ئەم دەولەت نەبووینە و كوردستان ل سەر چەند دەولەتێن دی یا پارچەكریە و ب چ رەنگەكی پویتەدان ب مێژوویا وێ و جوگرافییا وێ نەھاتیەدان و وەك ئەز نڤیسەر و ئەز د دەڤەرێدا یێ شارەزا، من ب ئەركێ خوە زانی ئەز ھندەكێ ژڤێ ڤالاھیێ تژی بكەم و هەر چنەبیت ھندەك تشتان ژ بەرزەبوونێ قورتال بكەین،
*تە بۆچی ڤیاییە ل سەر جوھییان و مێژوویا ھەبوونا وان بنڤیسی؟
- ئاكرێ باژێرەكێ كەڤنارە و هەر ژ كەڤن وەرە ژیان لێ هەبوویە و چەندین نەتەوە و چەندین ئاین لێ هەبووینە، هەبوونا جوھییان ژی ل ئاكرێ نە یا كەڤنە و كێم روونشتن هەبوون گەر دانعەمر دناڤدا هەبان، دا بەحسا جوھیان و بازارێ جوھیان ھێتەكرنێ و پشتی بۆ من دیاربووی كو مانەڤەیا ڤان بەحس و بازارا گرێدایی مانەڤەیا وێ چینا دانعەمرانە و ئێدی ئەو ل سەر لێڤا گورینە، من بریاردا ئەز دەست ب ڤەكولینێن خوە بكەم، سەرەرای كێمییا دەمێ من، ژبەركو من كارێ خوە یێ تایبەت هەیە، لێ ئەڤە دێ ئێك ژ بەرهەمێن باش بیت و دێ بۆ گەلەك بابەتان بیتە ژێدەر، ژبەركو دەھان دیدارێن راستەوخو، لێگەریان ل جھـ و شوینوار و هەر كەسێ بیرھاتنەك یان پێزانینەك دگەل جوھیان، بازارێ جوھیان، دابونەریتێن وان و ژیانا وان لدەف هەبایە، من یا خوە گەھاندیێ و من پێزانین یێن ژێوەرگرتین و دڤێ پەرتووكێدا ژێدەرێ پێزانینێن خوە ژی من نڤیسینە و تشتێ بۆ من بالكێش، دەما من ئەڤ دیدارە و لێگەریانە دكرن، ئەز ب سەر گەلەك تشتان ھلدبووم، كو راستی ئەم پێدڤی نڤیسین و بەلگەكرنا مێژوویا خوەینە و پێنگاڤا دوویێ ژی بلا بۆ مێژوو نڤیس و ئەكادیمیا بیت، ئەو بھێن زێدەتر ڤەكولینێ ل سەر ڤان بابەتان بكەن.
* گرنگییا نڤیسینا مێژوویێ د راستییا ڤەگوھاستنا رویداناندایە، ئایا تە بێلایەنییا خوە دڤێ چەندێ دا پاراستییە؟
- دڤێ پەرتووكێدا ئەز لایەنگرێ چ ئالیەكی نیمە، یا من دڤێت جوھی ژی لڤێرە و دەڤەرێ یێن ژیاین، ئەو ژی خودانێن ڤی عەردی بوون و رەز و باغ هەبوون، ئاڤاھی هەبوون و بازرگانی دكر و ئەو بەشەكن ژ مێژوویا مە و ژ كەلتورێ مە و چ ئەم كورد یان جوھی یان مەسیحی یان ئێزدی، ئەم پێكڤە یێ ل سەر ڤێ ئاخێ ژیاین و ئەو كارێ من نینە ئەز ل ناكوكییان بگەرم و بتنێ من دیتنێن خوە ل سەر ھندەك كارێن نە مرۆڤانە دیاركریە.
* ئەم دشێین بزانین دێ كەنگی ئەڤ پەرتووكە كەڤیتە بەردەستێ خواندەڤانی؟
- یا راستی بیت من یا بدووماھی ئینایی، لێ ژبەركو بابەتەكێ گرنگە و دگەریانێن مندا ئەز ب سەر ھندەك تشتێان تازە ھلدبووم، بوویە من ھندەك ھندەك دیڤچوونێن دی كرن و نوكە دێ چیتە دكارێ دیزانێدا و ئەڤە پەرتووكا ئێكێ یە ئەز گەلەك ل سەر راوەستییام و ئەڤە كارێ منێ زێدەتری دەھـ سالانە، ئەگەر ئەڤ سالە چاپ نەبوو، ب پشت راستیڤە سەرێ سالا بھێت دێ كەڤیتە بەردەستێ خواندەڤانان.
