سەرۆک کۆماری عیراق پێشوازیی لە وەفدی مەکتەبی راگەیاندنی یەکێتی کرد

دکتۆر بەرهەم ئەحمەد ساڵح سەرۆک کۆماری عیراق پێشوازی لە وەفدی مەکتەبی راگەیاندنی یەکێتیی نیشتمانیی کوردستان کرد کە پێکهاتبوو لە ستران عەبدوڵڵا لێپرسراوی مەکتەبی راگەیاندن و سۆران عەلی بەڕێوەبەری کەناڵی ئەلمەسرا و رێبین عومەر راوێژکاری مەکتەبی راگەیاندن کە بەسەردانێک لە شاری بەغدا بوون. 
وەفدەکە مەبەستی سەرەکی سەردانەکەی بۆ بەغدا بۆ سەرۆک کۆمار روونکردەوە کە بریتییە لە ئاگاداربوونی زیاتر لە رەوشی کاری میدیایی لە بەغدا و شارەکانی دیکەی ناوەڕاست و باشووری عیراق هەروەها تاوتوێکردنی چۆنێتی رێکخستنەوەی کاری کەناڵەکانی سەر بە مەکتەبی راگەیاندن و بەتایبەتیش ئەوانەی بەزمانی عەرەبی پەخشی بەرنامەکانیان دەکەن. 
سەرۆک کۆمار دەستخۆشی لە وەفدەکە کرد و هیوای خواست سەردانەکەیان بەرهەمدار بێت بۆ خزمەتی راگەیاندنی یەکێتی تا پێگەی گەورەو کاریگەری خۆی بەدەستبهێنێتەوە هەروەک هاوکاری و پشتیوانیشی بۆ دووپاتکردنەوە.