یەحیا هەرێم، یاریزانێكی لاوی سنوری قەزای شارەزورە، یاریی تۆپی پێ دەكات، ئێستا یاریی بۆ تیپی تازەپێگەیشتووانی یانەی نەورۆز دەكات كە لە خولی عیراقدا بەشدارە.
ئەم یاریزانە دەڵێت من تەمەنم 16 ساڵە، لە تەمەنی 12 ساڵییەوە یاریی تۆپی پێ دەكەم، تاكە یاریزانی ئەو سنورەم لە خولی تازەپێگەیشتووانی یانەكانی عیراقدا بەشداریی بكەم، حەز و خولیام ئەوەیە بگەمە ئاستی تیپی پێشكەوتووانی یانەی نەورۆز و هەڵبژاردەی عیراق.
سەبارەت بە سەرەتای وەرزشكردنیشی لە یانەكان وتی: سەرەتا لە تیپی یانەی ئاشتییەوە دەستمپێكردووە، ماوەی یەك ساڵ لەو یانەیە لە تیپی تازەپێگەیشتووان یارییم كردووە، ماوەی 2 ساڵیشە لە یانەی نەورۆز بەردەوامم، لەم ماوەیەشدا توانیومە 5 نازناوی یەكەمیی بەدەستبهێنم لەگەڵ ئەو تیپانەی یارییم بۆكردوون.
