ناجح بێجانی
دبیتن بەختەوەری جودا بت ژ ئەڤا دمێشکێ مرۆڤاندا، چ ل مالیێ دنیایێ بکم، هەگەر ئەز ئارام نەبم و نەشێم هاریکاربم بۆ ئەو کەسێن پێدڤییا وان ب مرۆڤی و دەستێ هاریکاریێ بۆ درێژنەکم
تێگەھا مە بۆ بەختەوەریێ چییە و مرۆڤ دێ چاوان بەختەوەر بیت؟ پشتی کو ژ دایکبوونا هەر ئێک ژمە و پاشی دچەندین قووناغێن ژیانێ را دەرباز دبن و دەستپێکا ژیانا خوە گەلەک یێ گەشبینە و دڤێتن وەسا بت، دا کو بەردەوامیێ بدەتە ژیانێ، هەتاکو دگەهیتە ژیەکێ گونجای و ئێدی هزر ل هندێ دکتەڤە، چاوا بەختەوەری بژیت و ژیانەکا پڕی خۆشی و ئارام و ڤیان و حەزژێکرن و دوور ژ کەرب و کینێ و خۆسەپاندنێ، ئەڤە دبت شەنگستەک مۆکم کو مرۆڤ کەسایەتییا خۆ لسەر ئاڤا بکت و بمینت بهێز. دبتن ب ساناهی بدەستڤەن ەئێتن، لێ دڤێتن مرۆڤ خودان هیڤی و ئارمانج بت و بەردەوامیێ د هەولدانێ دابیت، چونکو کەسانێک هەنە هۆسا هزردکن بدەستڤەئینانا باوەرنامەکا بلند و پلەک بەرپرسیارەتیێ، پارە و مالێ دنیایێ، زەنگیناتی، خانی و ڤیللە، مزرەعە، ترۆمبێلێن گران بها و گەشتێن بەردەوام ژ ئەڤێ وەلاتێ بۆ ئێکێ دیتر، دێ بەختەوەربتن، یانژی ئەو کەسێن بەرنامە و پلان بۆ خۆ دەیناین و باوەری بۆ دورست بووی و ئێدی پێنگاڤان بۆ بهاڤێژن، بەلکو هندەک ئارمانجێن وان یێن دەستپێکێ و لاوەکی ب دەستڤەبێن و داخوازێین وی یێن کەسۆکی جێ بەجێ ب بن! لێ ئەڤە نە بەختەوەرییە، دبیتن بەختەوەری جودا بت ژ ئەڤا دمێشکێ مرۆڤاندا، چ ل مالیێ دنیایێ بکم، هەگەر ئەز ئارام نەبم و نەشێم هاریکاربم بۆ ئەو کەسێن پێدڤییا وان ب مرۆڤی و دەستێ هاریکاریێ بۆ دڕێژنەکم د دەمێ پێدڤیدا؟ چ لێبکەم هەگەر ئەز دناڤ گێلەشۆک و گازندێن ژیانێدا بژیم و دفنبلندی و فێلبازی و خۆ مەزنکرن لسەر خەلکێ خۆبایی بم و جڤاکی ب کێمی ب بینم، هەر وەکو ئەز ژ هەر کەسەکی باشترم.
ئەڤ مەزناهی خۆبایا من، دێ من بەرەڤ ئاقارەکێ نە چاڤەرێکری ڤەبتن، ئەڤە هەمی دوورن ژ رەوشت و رەفتاریێن مرۆڤان، دێ خەلک وەسا هزر کەن ئاریشەک یا د مێشکێ مروڤیدا، ژبەر هندێ دڤێتن تو خۆ ڤاڤێر نەکەی، داکو نەبییە هوکارێ دوورکەفتنا تە ژ جڤاکی، ل دووماهیێ دێ ئاستەنگ د ژیانا مرۆڤیدا پەیدا بن و دێ بینی تو بتنێی. ئەڤجار دێ چاوا بەختەوەر بی، بەلکو ب دوو ئاخفتنێن خۆش و دلڤەکر، دگەل خۆشی و نەخۆشێن خەلکێ بژی، هەمی دەما بلا هزرا چاک د دلێ تەدابت، چاڤێ تە کێماسیێن خەلکێ نەبن، وەسا هزر بکە و کار و کریارێن وان یێن باش ب هەلسەنگینە و ل قەلەم بدە، دا خەلک ب چاڤ ڤەکری و دلەک ب حەسرەت بەڕێخۆە بدنەتە، لێ ئەز دبێژم جامێری و دلپاکی و نەفسبچویکی و دناڤ تەخێن جڤاکیدا دێ پتر بەختەوەر بت، کا چاوا دلەک ئارام و لەشەک ساخلەم و ئەقلەک ڤەکری و نیشانێن مرۆڤی ب هێزوسەنگ بهێلیت، دگەل هەر کەسەکی بگونجیت و ژێ ڤەدەر نەبتن، داکو تو هەست ب هەبوونا خوەبکەی، وەکو مرۆڤ دوور ژ فەخفەخێ و خۆباییێ، بشێی ژیانا خوە بۆرینی ب سەرفرازی و زانین سەرەدەریێ دگەل جڤاکی بکەی و چ لسەر تە پێدڤییە، کومەلگەهـ ژی تە رازی بیت، داکو ب بی مرۆڤەک خۆشتڤی دناڤ خەلکێدا، جارێ رازیبوون ب ژیانێ ئەگەرەک سەرەکییە کو دێ هێز بۆ مرۆڤی پەیدا بت و هەر چاوا بت سپاسیا خودێ بکەی لسەر ئەڤێ خۆشیێ و ب بت پالدەرەک و تە باوەری هەبت و هندەک سالۆخەتێن تە یێن جودا دەوروبەریێن تە هەست پێ بکن و پێخۆشحالبن ب هەبوونا تە، تو جودایی ژ کەسێن دیتر ئەڤە ژی ڤەدگەریت سەر کەسایەتییا تە ب خوە، کا چاوا دێ سەرەدەرییێ دگەل کارێن خوە یێن رۆژانە کو بسەلمینی ب کریار و ئاخفتنێن تە یێن باش تو جودای و تە دڤێت بەختەوەر بی، هەر دەما تە هزر کر تو ئێکی ژ ئەڤێ خەلکێ، هینگێ دێ شێیی خوە بینی تو بەختەوەرو دەما تو ژ ژیانا خۆ رازی بی و کرنۆشا بۆ خودایی مەزن ببی و هەر ئەوە مروڤی بەختەوەرو سەرفراز دکت ل ئەڤێ دنیایێ.
