راپۆرتی / ئه‌یاز هه‌ركی
ماوەی چەند رۆژێکە 643 مامۆستای وانه‌بێژی زمانی عەرەبی لە قەزای شنگال بایکۆتی دەوامیان کردووە، داوا له حكومه‌تی فیدراڵ دەکەن دابمەزرێن و گرێبەستەکانیان بکرێتە هەمیشەیی، هاوشێوەی قەزاکانی دیکەی سنووری پارێزگای موسڵ. مامۆستایانی وانه‌بێژ رۆژانه لە بەردەم بەڕێوەبەری پەروەردەی شنگال لە بایکۆت و مانگرتن به‌رده‌وامن و بڕیاریانداوە تا کاتی وەڵامدانەوەی داواکارییەکانیان بەردەوام بن، هەروەها بەهۆی به‌رده‌وامیی بایکۆتی مامۆستایانی وانه‌بێژی سنووری شنگال خوێندن لە بەشێک لە قوتابخانەکان راگیراوە و کێشەی بۆ پڕۆسەی خوێندن له‌و قەزایە دروست کردووە.
گردبوونەوەی رۆژانە
مامۆستا سفیان كه‌ریمو وته‌بێژی مامۆستایانی وانه‌بێژ له قه‌زای شنگال به كوردستانی نوێی راگه‌یاند: وەک مامۆستایانی وانه‌بێژی زمانی عەرەبی لە قەزای شنگال، ساڵی رابردوو گردبووینەوە بۆ ئەوەی گرێبەستەکانمان بکرێتە هەمیشەیی، بەڵام تائێستا داواکارییەکانمان جێبەجێ نەکراوە. لە چەند رۆژی رابردوودا نزیکەی 16 هەزار مامۆستای گرێبەست لە سنووری پارێزگای موسڵ ناوەکانیان گەڕاوه‌تەوە و دامه‌زراون، تەنها مامۆستایانی وانه‌بێژی سنووری قەزای شنگال ناویان نەگەڕاوه‌تەوە، هۆکاری سەرەکیش دەستێوەردانی سیاسییە.
وتیشی: لە رۆژی پێنجی شوباتەوە بایکۆتی دەواممان کردووە له قۆتابخانه‌كان تا جێبەجێکردنی داواکارییەکانمان بەردەوام دەبین، رۆژانه بە بەردەوامی لە به‌رده‌م بەڕێوەبەری پەروەردەی قه‌زای شنگال کۆدەبینەوە و داوای جێبەجێکردنی مافەکانمان دەکەین.
مامۆستا سفیان ئاماژەی بەوەشکرد، شنگال لە هەموو روویەکەوە پشتگوێ خراوە، کێشەی ئیداری و سیاسی زۆر لە قەزاکەماندا هەیە، ئێمە تائێستا ده‌ڤه‌ردار و و مودیر ناحیه‌مان نییە تا داواکارییەکانمان بگەیەنێته لایه‌نی په‌یوه‌ندیدار، ناوی مامۆستایانی وانه‌بێژ دروستن و هیچ کێشەیەکی یاساییان نییە، جگە لەوە ئێمە وەک خەڵکی شنگال جینۆساید کراوین پێویستە زیاتر گوێ لە ماف و داواکارییەکانمان بگرن، بەڵام هێزە ئەمنییەکان کێشە بۆ مانگرتن و گردبوونەوەکانمان دروست دەکات و خێمەی مامۆستایانیان لابردووە، بەڵام ئێمه‌ی مامۆستایانی وانه‌بێژی زمانی عه‌ره‌بی سازش لەسەر داواکارییەکانمان ناکەین و بەردەوام دەبین لە بایکۆتکردنی قوتابخانەکان.
به‌ڕێوه‌به‌ری په‌روه‌رده‌ی قه‌زای شنگال بۆ کوردستانی نوێ :
له كۆی 643 مامۆستای وانه‌بێژ تەنها گرفت بۆ ناوی 83 مامۆستا دروست بووە، لەسەر هێڵین بۆ چارەسەرکردنی کێشەکەیان
ناوی مامۆستایانی موسڵ گەڕاوەتەوە
سەبارەت بە داواکارییەکانی ئەو مامۆستایانە حه‌سه‌ن ساڵح به‌ڕێوه‌به‌ری په‌روه‌رده‌ی قه‌زای شنگال به كوردستانی نوێی راگه‌یاند: پەروەردەی قه‌زای شنگال بەردەوام داواکاری مامۆستایانمان گەیاندووەتە لایەنی پەیوەندیدار، هه‌روه‌ها وەزیری پەروەردەی عیراق و سەرۆک وەزیرانی عیراق بە خۆشحاڵییەوە رەزامەندبوون لەسەر دامەزراندنی 1000 مامۆستای خۆبەخشی زمانی عەرەبی لە شنگال، بەڵام ناوی زۆربەی مامۆستایانی وانه‌بێژی سنووری پارێزگای موسڵ گه‌ڕاوه‌ته‌وه، تەنها ناوی وانه‌بێژانی قەزای شنگال تائێستا نەگەڕاونەتەوە.
وتیشی: له كۆی 643 مامۆستای وانه‌بێژ ئێستا تەنها گرفت بۆ ناوی 83 مامۆستا دروست بووە و بەردەوام لەسەر هێڵین بۆ چارەسەرکردنی کێشەی ئەو مامۆستایانە، هه‌روه‌ها دوای بایکۆتی مامۆستایانی وانه‌بێژ، کێشە بۆ پرۆسەی خوێندن لە سنووری پەروەردەی قەزای شنگال دروست بووە و داوا لە لایەنە پەیوەندیدارەکان دەکەین مافی کەس ون نه‌بێت و داواکارییەکانی مامۆستایان جێبەجێ بکرێن.
له‌وباره‌یه‌وه وسام سالم ئه‌ندامی ئه‌نجومه‌نی پارێزگای نه‌ینه‌وا له فراكسیۆنی یه‌كێتی به كوردستانی نوێی راگه‌یاند: له‌وباره‌یه‌وه وسام سالم ئه‌ندامی ئه‌نجومه‌نی پارێزگای نه‌ینه‌وا له فراكسیۆنی یه‌كێتی به كوردستانی نوێی راگه‌یاند: دوای چه‌ندین كۆبوونه‌وه و پشكنین له بنكه‌ی زانیاری ئاواره‌كانی دهۆک تایبەت بەشنگال ده‌ركه‌وتووه، لیستی ناوی مامۆستایانی وانەبێژ كۆنه و ژماره‌یه‌ك ناو لەناو لیستەکەدا هەن کە کۆچیان کردووە بۆ دەرەوەی وڵات.وتیشی: لیژنەی پەیوەندیدار لە ئەنجومەنی پارێزگای موسڵ بڕیاریدا دۆسیه‌ی مامۆستایانی وانه‌بێژی شنگال رابگیرێت بۆئەوەی لیستی ناوەکان پاک بکرێتەوە، هه‌روه‌ها نوێنەرانی سەرچاوە مرۆییەکان لە قایمقا‌میه‌ت و پەروەردە داتابه‌یسه‌كه نوێ دەکەنەوە بۆ ئەوەی بتوانن هەنگاوی پێویست بنێن بۆ چارەسەرکردنی کێشەی مامۆستایانی وانه‌بێژی زمانی عەرەبی لە قەزای شنگال، ئێمە وەک فراکسیۆنی یەکێتی نیشتمانی كوردستان لە ئەنجومەنی پارێزگای موسڵ بەردەوام لەسەر هێڵین بۆ چارەسەرکردنی ئەم کێشەیە و لە لیژنەکاندا به‌رده‌وام كارده‌كه‌ین بۆ چارەسەرکردنی بە زووترین کات و درێغی ناکەین بۆ جێبه‌جێ كردنی ماف و داواکارییەکانی مامۆستایانی وانه‌بێژ له قه‌زای شنگال.
ئه‌ندامێکی ئه‌نجومه‌نی پارێزگای نه‌ینه‌وا بۆ کوردستانی نوێ :
بەهۆی کۆنیی داتابەیسی ناوەکان دامەزراندنی ئەو مامۆستایانە راگیراوە، لیژنەی پەیوەندیدار لەسەر هێڵە بۆ نوێکردنەوە و جێبەجێکردنی داواکارییەکانیان
