تازه به‌هار ئاماده‌ی نمایشی ئاهه‌نگی فه‌رشی سه‌وزی خۆی بوو، ده‌شتوده‌ر كه‌وتبوونه بوژانه‌وه، هیواش هێواش زه‌وی به‌ره‌و ئاوێته به‌بۆنه‌ی هه‌ڵاڵه و گوڵان ده‌چوو، دروست ئه‌وكات و مێژووه، 5/3/1982 بوو، چیا و به‌فر و هه‌تاو، جریوه و ده‌نگ و ره‌نگی باڵنده‌كان تێكه‌ڵ به قافڵه‌ی پۆلێ پێشمه‌رگه‌ی هه‌رێمی دووی كه‌ركوك ببوو.
پێشمه‌رگه‌كان زۆرینه‌یان گه‌نجی ده‌ڤه‌ری كه‌ركوك بوون، چالاك و خوێنده‌وار و ده‌رچووی زانكۆ، رۆشنبیر و تێگه‌یشتوو، كوڕی خێزانی نیشتیمانپه‌روه‌ر، خاوه‌ن بیروباوه‌ڕی رێبازی ماركسیه‌ت و دژ به‌زوڵم و زۆری چه‌وسانه‌وه‌ی كوردو كوردایه‌تی.
ئه‌وكاته‌ی ئه‌و پۆله پێشمه‌رگه‌یه گه‌یشتبوونه گوندی (قازان)ی سنووری ناحیه‌ی سورداش، ئاگاداركرانه‌وه كه به جه‌یش و جاشێكی زۆره‌وه ده‌وره دراون، به‌ڵام ئه‌وان له‌وپه‌ڕی هه‌ستی به‌رپرسیارێتیه‌وه بۆ پاراستنی گوند و خه‌ڵكه‌كه‌ی له‌زیانی شه‌ڕ، چونه ده‌ره‌وه و له یاڵێكدا لوله‌ی تفه‌نگه‌كانیان كرده رووی جاش و جه‌یش و فڕۆكه، له‌وێوه ناسنامه‌ی قاره‌مانی و شه‌هیدبوونیان به‌ناوی (داستانی قازان)ه‌وه، تۆماركرد.
ئه‌وان باش ده‌یانزانی كاتێك رووبه‌ڕووی شه‌ڕی نابه‌رامبه‌ر و ماوه درێژ ده‌بنه‌وه باشترین شوێن ناو ماڵ و كۆڵانه‌كانی گونده‌كانه، به‌ڵام گونده‌كه‌یان له‌گیانی خۆیان له‌لا گرنگتربوو، بۆیه خه‌ڵك و گونده‌كه‌شیان پاراست.
یه‌كێك له قاره‌مانه‌كانی داستانی قازان كه له‌وێ شه‌هیدكرا، نه‌جمه‌دین فاتیح شوكر-ه و ناسراوه به شیروان، له‌دایكبووی ساڵی 1956ی گه‌ڕه‌كی شۆڕیجه‌ی شاری كه‌ركوكه، دوای ته‌واوكردنی خوێندنی سه‌ره‌تایی و ناوه‌ندی، چۆته قوتابخانه‌ی ئاماده‌یی كوردستان.
گه‌نجێكی چالاكی ناو یه‌كێتی قوتابیانی كوردستان بووه، چه‌ندجارێك تووشی ئاسته‌نگ و گرتن بۆته‌وه، به‌ڵام به هۆی ئه‌وه‌ی ئه‌وكاته شۆڕشی كورد له گفتوگۆدابووه له‌گه‌ڵ حكومه‌تی عیراق، ناچار ئازادیان كردووه.
ساڵی 1974 كه شه‌ڕهه‌ڵگیرسایه‌وه، رووی كرده شاخ و باوكی ده‌ستگیركرا، دوای نسكۆی 1975 گه‌ڕاوه‌ته‌وه شاری كه‌ركوك و درێژه‌ی داوه به‌خوێندن.
ساڵی 1976 له كۆلێژی كارگێڕی و ئابووریی زانكۆی به‌غدا وه‌رگیراوه.
ساڵانی خوێندنی زانكۆی وێستگه‌یه‌كی گرنگ بووه بۆ فراوانبوونی چالاكییه‌كانی، به‌رده‌وام وه‌ك كه‌سێكی چالاك و هۆشیار به‌شداریی زۆربه‌ی كۆڕه فكری و رۆشنبیری و سیاسییه‌كانی ئه‌و قۆناغه بووه به ئاشكرا و به نهێنی، به‌و هۆیه‌شه‌وه چه‌ندجارێك له‌لایه‌ن ئه‌منی زانكۆوه بانگ كراوه و تووشی لێپرسینه‌وه بووه، به‌ڵام به هۆی وریایی خۆیه‌وه نه‌یانتوانیوه هیچ شتێكی نهێنیی پێ بدركێنن، بۆیه ئازاد كراوه.
زۆرجاریش سه‌ردانی هاوڕێ زیندانییه‌كانی كردووه له زیندانی ئه‌بوغرێب.
ساڵی 1980 خوێندنی زانكۆی به پله‌ی نایاب ته‌واو كرد و كۆتایی مانگی ئه‌یلولی ئه‌و ساڵه بوو به پێشمه‌رگه له هه‌رێمی دووی كه‌ركوك، دڵسۆز و ده‌ستپاكی و ده‌رونپاك بوو، خۆشه‌ویستی ناو هاوڕێكانیشی بوو، هه‌ربۆیه به‌زوویی كرا به به‌رپرسی ئابوریی هه‌رێمه‌كه، شه‌هید ئه‌نوه‌ر حه‌سه‌ن فه‌رمانده‌ی هه‌رێمی دوو، پێشتر خوێندكاری به‌شی ئه‌ندازیاریی كاره‌بای زانكۆی به‌غدا و هاوڕێی نزیكی شه‌هید شێروان بوو.
رۆژی 5/3/1982، له شه‌ڕێكی نابه‌رامبه‌ری جاش و سوپای عیراق و هێلیكۆپته‌ر، له گوندی قازان، له‌گه‌ڵ 10 هاوڕێیدا، شه‌هیدكران.
