رۆزا دڵشاد مەریوانی
سی و شەش ساڵە و هێشتا هەر ئەو هەستە ناخۆشەی لە ناخی منداڵێکی بێ باوکدا هەیە، هەستیی پێ دەکەم. ژنێکم تەمەنێکم تێپەڕاندووە، بەڵام هێشتا سادەترین یادگاریی و وتە دەربارەی باوکم دڵم تەنگ دەکەن و وەک بڵێیت برینەکانی ناخی منداڵێکی بێ باوک هەرگیز ساڕێژ نابن، بۆیە هەموو جارێک دەکولێنەوە. زۆرجار داوام لێ دەکرێت لەسەر باوکم قسە بکەم و چاوپێکەوتن بکەم، بەڵام نازانن دوای ئەو هەموو ساڵە هێشتا ناتوانم دوو رستە بە ئاسایی بێ ئەوەی دڵم پڕببێت لەسەر ئەو قسە بکەم.
قسەی چیبکەم من هێندەی چوار ساڵ و نیوی تەمەن ئەوم ناسیوە، مەگەر ئەوەی دەیزانم هەر ئەوەیە کە لە باسوخواسی دایکم و هاوڕێ و ئەو کەسانەوە بیستوومن کە ئەویان ناسیوە.
لەگەڵ ئەوەشدا رەنگە هێندەی هەموو تەمەنم خۆشمبووێت و بیریی بکەم، زۆرجار بیر لەو ئەگەرانە دەکەمەوە ئەگەر ئەو بمایە چی دەوت و کاردانەوەی چۆن دەبوو؟ یان ئایا کۆچی دوایی باوکێک لە تەمەنی پیرییدا و بە دەردی خودا هەمان ئازاری بۆ من دەبوو یان نا؟
ئایا ئازاری شەهیدبوونی ئەو لەوەوەیە شتەکانی بە نیوە ناچڵی جێهێشت و لەپڕ و بە بێ ماڵئاوایی رۆیشت، وەک ئەوەی لەگەڵ کەسێکدا لە ناوەڕاستی گفتوگۆیەکی زۆر گرنگدابن و لەپڕ ئەو هەستێت و بڕوات.
بیر لەوە دەکەمەوە رەنگە هۆکاری ئازاری لە دەستدانی باوکم ئەوەبێت، لە تەمەنێکی منداڵییدا جێهێیشتووم، ئاخر زۆر زەحمەتە کچێک لە سەردەمێکدا کە بۆنی خوێنی لێدێت گەورەترین پشت و پەنا کە باوکێتی لە دەستی بدات. زۆرجار بەوە دڵنەوایی خۆم دەدەمەوە کە خودا خۆشیویستووم و دەکرا دۆخەکە خراپتر بێت، بەس نییە دایکێکم لەپشت بووە شەڕی لەگەڵ هەموو دنیادا بۆ ئێمە کردووە، بەڵام جاری دیکەش هەیە دەڵێم: نەخێر، بەداخەوە کەس ناتوانێت جێی کەس بگرێتەوە، دواجار من ئەو کچە نازدارەی باوکم بووم کە دەمویست وەک کچانی تر باوکیان نازیان هەڵبگرێت و یەکەم جانتای مەکتەب و یەکەم چوونە زانکۆ و دەرچوونم لە زانکۆ لەگەڵدا یاد بکاتەوە. دواجار من ئەو کچە بووم دەمویست باوکم (دڵان)ی کچم بکاتە باوەش و شیعرێکی جوان بۆ «دڵەکەم» بنووسێت. دەمویست باوکم لەگەڵ (مانی)ی کچەزایدا ئاهەنگی یادی لەدایکبوونەکەیان پێکەوە بکەنەوە، بەو پێیەی رۆژێکیان لەنێواندایە و تێیدا وێنەیەکی سێڵفی بگرن و لە ژێریدا بنووسن مانیی کچەزا و دڵشادی باپیر.
