هاوار جەلال و خەلیل جەلال، دوو ناون لەناو مێژووی هەر دوو شۆڕشی ئەیلول و نوێدا پێكەوە دێن و پێكیشەوە دەبنە باسوخواسی رۆژگاری بەرخودان، كە باس دێتە سەر خەباتی كۆمەڵەی رەنجدەرانی كوردستان و رۆژگاری سەرەتای سەرهەڵدانەوەی شۆڕشی نوێ، ناوی ئەوان، رۆڵ و پێگەی ئەوان، هەوڵ و ماندووبوونی ئەوان، دیار و كاریگەر و درەوشاوەیە، درەوشاوە وەك پڕشنگی خۆر و بڵند وەك بەژنی دارچنار.
هەر دوو شەهید هاوار و خەلیل، كوڕی بنەماڵەیەكی ناسراون لە تێكۆشاندا، بە سەرپەرشتیی مامۆستا ئیبراهیم جەلالی براگەورەیان رێگەی سەختی خەباتیان گرتۆتەبەر و بوونە سێكوچكەی خەباتی سەختی پێشمەرگایەتی، ئەوان لەو كاروانەدا شەهیدكران و براكەشیان درێژەیدا بە رێباز و سەنگەرەكەیان.
ژیاننامەی شەهید خەلیل جەلال
لە دایكبووی ساڵی 1945ی شاری سلێمانییە، خوێندنی سەرەتایی و ناوەندیی لە شاری رانیە تەواوكردووە، قۆناغی دواناوەندیشی لە سلێمانی خوێندووە.
هەر لەسەرەتای دامەزراندنی كۆمەڵەی رەنجدەرانی كوردستانەوە، لە رێگەی ئیبراهیم جەلالی براگەورەیەوە پەیوەندیی كردووە و لەو رێكخراوەدا دەستی بە تێكۆشان كردووە.
ساڵی 1974 بووە بە پێشمەرگەی شۆڕشی ئەیلول و لە بۆردومانەكەی 24/4ی قەڵادزێ، بریندار بووە.
ساڵی 1976 كاتێك بەڕێوەدەبێت بۆ گەیاندنی نامەیەكی سەركردایەتی كۆمەڵە بۆ هەڤاڵی كۆچكردوو قادر خەبات و برادەرانی ئەوێ، بە مەبەستی پێكهێنانی مەفرەزەی سەرەتایی، لە رێگەدا و بەهۆی ناپاكیی كەسێكەوە دەستگیر دەكرێت، ئەویش هەر ئەوەندەی پێدەكرێت خێرا نامەكە قوت بدات و نەهێڵێت بكەوێتە دەستی دوژمن.
دوای سێ رۆژ لەگرتنی، لەكاتی گواستنەوەی لە سەرای قەڵادزێوە بۆ سەربازگەی قەڵادزێ و پاشان رەوانەكردنی بۆ كەركوك، هەلێك بۆخۆی دەڕەخسێنێت و رادەكاتە ناو كۆڵانەكانی ئەو شارەوە و لە مەنهۆڵی ئاوەڕۆكەوە دەچێتە ناوەوە و هەتا شەو لەوێ دەمێنێتەوە، پاشان بە وریاییەكی زۆرەوە دەچێتە دەرەوە و روودەكاتە شاخ، لەناوچەی باڵەكاتی لای قادر خەبات دەگیرسێتەوە و دەبێتە پێشمەرگەی یەكەم مەفرەزەی سەرەتایی لەو ناوچەیەدا.
ساڵی 1977 كراوەتە فەرماندەی مەفرەزە و ساڵی دواتریش فەرماندەی كەرت لە ناوچەكانی سەركردایەتی، لە نەورۆزی ساڵی 1979دا وەك فەرماندەی كەرت گوازراوەتەوە بۆ لقی 2ی كەركوك.
رۆژی 19/4/1980 لە رێگەی چوونی بۆ سەركردایەتی، لە (گردی رەمكان- ناوچەی پشدەر) بە گوللە هاوەنی سوپای بەعس، لەگەڵ هاوڕێیەكیدا شەهیدكران.
ژیاننامەی شەهید هاوار جەلال
لەدایكبووی ساڵی 1955ی رانیەیە، خوێندنی سەرەتایی و ناوەندیی لەوێ تەواوكردووە و دواناوەندیشی لە سلێمانی تەواوكردووە.
ساڵی 1974 بووە بە پێشمەرگەی شۆڕشی ئەیلول، لەو سەروبەندەدا بەشداریی لە خولی فێركاری بەكارهێنانی تۆپی دوورهاوێژ كردووە و تا نسكۆی ساڵی 1975 بەردەوام بووە.
ئەندامی رێكخستنەكانی كۆمەڵەی رەنجدەرانی كوردستان بووە، مانگی 7/1977 لەلایەن رژێمەوە ئاشكرا دەبێت و فەرمانی گرتنی دەدرێت، بەڵام خۆی دەرباز دەكات و دەچێتە ناوچەی دۆڵی جافایەتی بۆ پێشمەرگایەتی.
دووای دوو مانگ دەنێریتە ناوچەی قەڵادزێ و سەنگەسەر و دەكرێتە لێپرسراوی لیژنەی ناوچەی قەڵادزێ.
ساڵی 1979 گوازراوەتەوە بۆ ناوچەی قەرەداخ و گەرمیان وەك كادری رێكخستن لە لقی كەركوك.
هەر لەو ساڵەدا گوازراوەتەوە بۆ ناوچەی (قەڵاتوكان و ئەبوبەكرە) و كراوەتە فەرماندەی كەرت و لە هەمان كاتیشدا لێپرسراوی رێكخستنەكانی سەنگەسەر و بەستەستێن و قەڵادزێ بووە.
لە مانگی 5/1980 لە شەڕێكی نابەرابەری شەش سەعاتیدا لەگەڵ سەرباز و جاشدا، دوای كوشتن و برینداركردنی زیاتر لە 10 سەرباز و پلەدار، بە سەختی بریندار دەبێت و دوو هاوڕێیشی شەهید دەبن، ماوەی شەش مانگ لە ئێران لەژێر چارەسەردا دەبێت و پاشان گەڕاوەتەوە و درێژەی داوە بە خەبات.
بەداخەوە، 10/7/1982 لە شەڕێكی سەخت و دەستەویەخەدا لەگەڵ جاشەكانی سنوورەكە، لە ئۆردوگای بەستەستێن، شەهیدكرا.
