هێزا كومەلگەهێ دهێزا ژناندایە

رێژین حكمەت

دڤێ هەیڤێدا چەندین هەلكەفتێن خۆش و نەخۆش هەنە و ژوان ژی رۆژا جیهانییا ژنان، كو هەر سال دكەڤیتە هەشتێ ئادارێ و ل سەرانسەری جیهانێ ئەڤ رۆژە ب رەنگێن جودا دهێتە ساخكرنێ. ژن ئانکو ژیان، ژن ئانکو نیڤا کومالگەهێ، ئەگەر  بەرێ خۆ بدەینە كومەلگەها خوە یا كوردی و رەوشا ژنان، هەر ژ درێژاھییا مێژوویێ ژنا كورد رۆلێ خوە هەیە و شیایە هەبوونا خوە ب سەلمینیت و دەهان كەس هەنە ب ناڤێ ژنان دهێنە ناسكرنێ. بۆ نموونە خانزادا سوران، لەیلا قاسم.. هتد. ئەگەر لدویڤ بچین ژی دێ بینین كو ئەو ژن ناڤێ دەیكا وی بوویە یان هەڤژینا وی و ژبەر زیرەك و دەستهەلی و ژیرییا وێ، ئەو ناڤ و دەنگی بۆ مایە. ئەگەر ل بەری سەرھلدانێ بزڤرین و رۆلێ ژنان، رۆلێ دایكان د سەرخستنا خەباتا چەكداری دا، دڤێت ھیچ جارەكێ ماندیبوونا وێ ژبیرنەكەین و راستە پێشمەرگەی ب چەكێ خوە خەبات و بەرخودان دكر، لێ ژنان و دایكان، ب چاڤدێرییا وی پێشمەرگەی، دروستكرنا خوارنێ بۆ وی پێشمەرگەی و بەرهەڤكرنا وی چ ژ خەباتا وی پێشمەرگەی كێمتر نەبوویە، ئانکو پەروەردەییا وی پێشمەرگەیی ل سەر دەستێ وێ دایکێ بوو، ئەگەر زێدەتر ژی نەبیت و ژروویێ هەلگرتنا چەكی ژی ڤە، ژنان رۆلێ خوە هەبوویە و خوە ئەگەر ل شەرڤانێن رۆژئاڤایێ كوردستانێ بنێرین و چاوان وان ب بەرگری دكر، شەر دژی تیرۆرێ دكر و دژی رێكخراوا تیرۆرستیا داعشێ و شییان ناڤێ كوردان ل جیهانێ هەمیێ بلاڤ بكەن و دنوكەدا دەهان ژن مە هەنە د هەر بوارەكیدا، چ زانستی بیت یان تەندروستی بیت و ئەدەبی بیت و هونەری بیت و یا رۆلێ خوە دگێریت.
دەما ئەم بەحسا هێزا ژنان دكەین، ئەم یێ بەحسا رۆلێ وێ د پەروەردەكرنێ دا دكەین و چاوان دشێت خێزانا خوە برێڤە ببەت، چاوان زارۆكان پەروەردە دكەت و ژخوە ل ژیانا گوندان و تایبەتی ژی بەری سەرھلدانێ رۆلێ ژنان گەلەك بوو، ملێ وێ ب ملێ زەلامی ڤە بوو و هەر كارێ زەلامی دكر وێ ژی دكر، چ ئەو كارێ هەنێ ل ناڤ ئاژەلی بایە و خودان كرن و سەخبێكرن یان ژی دناڤ عاقاری و چەمیدا یان ژی كارێن پیشەیی وەك دروستكرنا گورە و ساق و پارزینك و چاندك و تشتێن دی و ئەگەر مە بڤێت مە كومەلگەهەكێ بهێز هەبیت، دڤێت ل ژنان و رۆلگێرانا وێ بزڤرین، ئایا وەك پێدڤی مافێن وێ دهێنەدان یان رێگرتن بۆ هەیە و ئەو ئاستەنگێن دكەڤنە درێیا ژناندا، دڤێت ئەو ئاستەنگە بهێنە لادان و هێشتا ژن ل كوردستانێ ژ مافێن وێ دهێنە بێ بەھركرن و هێشتا توندوتیژی ل بەرامبەری وێ دهێتەكرن و حالەتێن كوشتنێ دهێنە توماركرنێ، نەبوونا دەرفەتێن كاری و یێن خواندنێ و ئەگەر مە بڤێت پێگەهێ ژنان بهێز بیت، كو بهێزبوونا وێ هێزبوونا كومەلگەھی یە، پێدڤییە خولێن ھشیاركرنێ بۆ بهێنە ڤەكرنێ و زانیارییێن وان بهێنە زێدەكرنێ چ یێن یاسایی بن و چ یێن كومەلایەتی و ببیتە خودان داهات، چ داهاتەكێ ڤەبرییێ هەیڤانە بیت، ئەگەر ئەو ژنا هەنێ بەرمالی بیت یان دەرفەتێن كاری بۆ بهێنە ڤەدیتنێ. ئەو رێكە بهێنە گرتنێ یێن ژنان وەك كالای ددەنە ناسكرنێ و بەردەوام دكەڤنە بەر سڤكاتیكرنێ و دڤێت راگەهاندن رۆلەكێ بەرچاڤ بگێریت و ئەگەر مە بڤێت كومەلگەهەكێ سەركەفتی ئاڤا بكەین، دڤێت گرنگییێ ب رۆلێ ژنان ژی بدەین.