سەرھلدان و ژن

بێری غەریب

ئایا سەرهەلدانێ شیایە پێگەهێ ژنان بەرەڤ پێشڤە ببەت، مافێن وان ب پارێزیت و بەرگرییێ ژێبكەت؟ بێگومان مللەتێ کورد ب درێژاھییا دیرۆکێ دخەبات و تێکۆشانێ دایە بۆ بدەستڤەئینانا ئازادی و دیموکراسی و گەشەپێدانا جڤاکەکێ رەوشەنبیر و ئازادانە، بۆ ڤێ چەندێ ژی پێنگاڤێن باش هاتینە هاڤێتن و ئەڤا ل هەرێما كوردستانێ دهێتەدیتنێ، ئەم دشێین بێژین، بەلێ گوهورینێن باش دموکمکرنا پێگەهێ ژنان و بەرەڤ پێشچوونا وان دهەمی سێکتەراندا رویدایە. دنهادا پێگەهێ ژنان بوویە پێکڤە ژیان و ژ جوداهیا ڕەگەزی دەرچوویە و بێگۆمان پشتی سەرهەلدانێ پێگەهێ وان زێدەتر بوویە و نەبتنێ ل هەرێما کوردستانێ، بەلكو ل عیراقێ ژی رۆل و پێگەهێ خۆ هەیە. جوانترین نموونە ژی کو خانما ئێکێ یا عیراقێ ژنەکا ڕەسەنا کوردە و پەرلەمانتارێن ژن یێن كورد دناڤ ئەنجومەنێ عیراقێ دا هەنە. ئەگەر بەراوردیەکێ دناڤبەرا بەری سەرهەلدانێ و پشتی سەرهەلدانێ دا بکەین، دێ بینین کچێن مە ئازادیا وان ل بڕیاردانێ و هاتنە دەرڤە یا وان بۆ کارکرنێ و خواندنێ و دبیاڤێن دیتردا یا سنورداركری بوو، لێ نوکە گوهورانكاری پەیدابووینە و ژن بوویە خودان پرۆژێن خوە یێن تایبەت و ل مۆل و پیشانگەهان كاری دكەن. ژنێن سەرکەفتی یێن وەك دادوەر و نۆژدار و مامۆستا و ئەندازیار و ژنێن دەست ڕەنگین و ژنێن هۆنەرمەند و قەهرەمانێن وەرزشی و ئەڤێن هەنێ نموونەیا بەرەڤ پێشچوونا پێگەهێ ژنانە پشتی سەرهەلدانێ، خوە ئەگەر رێژەیی ژی بیت.
 ئەگەر بچینە سەر بابەتێ ماف و پاراستنا مافێن وان، لڤێرە ژی پێنگاڤێن زۆر باش هاتینە هاڤێتن، چ ژ ڕوویێ یاسایێ ڤە وەك مافێ مسۆگەرکرنا ژیانەکا ئارام و شارستانی و رێزگرتن ل شیانێن وان و پشکداری پێکرنا ژنان دحکومەتێدا، ب یاسا و دەستووری پاراستییە، دنووکەدا ئەگەر توندوتیژی بەرامبەر وێ بێتەکرنێ، مافێ تۆمارکرنا سکاڵایێ هەیە و هشیاریا بەرەڤانیکرن ژ مافێن وان دناڤ ژنان دا رێژە بەرەڤ بلندبوونێ یە و پشتی سەرهەلدانێ ژنان مافێ خواندنێ هەیە و ب خۆشحالیڤە چەندین یاسا بۆ پاراستنا مافێن ژنان هاتینە دەركرن، ئەگەر هات و کچ دبن ژیێ یاساییێدا بیت بۆ نموونە، نابیت بهێتە مارەكرن و سەرپێچكار دێ ڕووبڕوویی یاسایێ بیت و ئەڤێن هەنێ ژی، هەمی پشتی سەرھلدانێ پەیدابووینە.