دەرگەهڤان

رامیار ئەحمەد

بەری هەیامەکی ئەز چوومە پارکەکێ ل باشوورێ لەندەن، مەرەما من پێ ئەو بوو، ئەز هزرا خوە ل سەر هندەک بابەتێن بەری نها من نڤێسین و بەڵاڤنەکرین، بکەم. پەڕتووکەک د دەستێ مندا بوو، من ل گەل خوە بربوو کو وەک سەرچاڤە بکاربینم. ژ نیشکەکێ ڤە، زەریەک نێزیکی من ڕوونشت، ب سەروچاڤانڤە یا دیاربوو کو خەلکا ڕۆژهەڵاتا ناڤینە. پشتی نیڤ سەعەتەکێ، ڕوو کرە من و کەرەمکر و گوت؛ ئەی ڕێڤینگ، ئەو پەڕتووکا د دەستێ تەدا ئێکە ژ خوەشترین و سەرنجڕاکێشترین پەڕتووک من خواندبیت، بخوینە دێ گەلەک حەژێکەی!!! من ژی گوت؛ گەلەک سوپاس،  باوەربکە ئەڤە جارا دووێیە ئەز دخوینم. گوت؛ هەلبەتە، نڤێسەرێ ڤێ پەڕتووکێ  گەلەک ب بابەتیانە و ئەکادیمیانە ل سەر جڤاکێ مە ڕاوەستیایە. من ژێ گوتێ: تو خەلکا کیڤەی؟ گوت ئەز د ئەسلدا کوردم، لێ مخابن باش کوردی نزانم، دەیبابێت من خەلکێ باژێرەکینە د بێژنێ(ئادیەمان) ل باکوورێ كوردستانێ. زەریێ کەرەمکر، ئەی ڕێڤینگ جەنابێ تە خەلکێ کیڤەیە؟ من گوتێ ئەز ژی کوردم و ئەز کوردی تا ڕاددەیەکی باش پێ د ئاخڤم. گەلەک کەیفا وێ هات. لێ گوت؛ ئەم هەردوو کوردین، بەس قەدەرێ یا وەلمە کری، ئەز و تو ب ئنگلیزی دگەل ئێک باخڤین و دانوستاندنێ بکەین.
 ئەم گەلەک ل سەر چەندین بابەتان ئاخڤین. دوماهییێ بۆ من دیاربوو کو ئەڤ زەریە-خاتوونە، ل ڤێرێ ب تنێ دژیت، کەسەک خواندەوارە، لێ بمخابنیڤە چ پەیوەندی ل گەل ماڵباتا خوە ل وەلاتی نەمایە و گەلەک هەست ب غەریبییێ و تنێبوونێ دکەت. من وەسا هەستپێکر کو ئەڤە گەلەک ژمێژەیە کەس نەبوویە ئەو دەردێ دلێ خوە بۆ دارێژیت. هێدێ هێدێ ڕۆندک ژ چاڤێت وێ هاتنە خوارێ و گوت؛ نزا بۆچی هوسا ب سانەهی من دەردێ دلێ خوە بۆتە ڤەکر، نزانم بۆچی باوەریا من بتە دئێت؟ بەلکو ئەو پەڕتووکا د دەستێ تەدابیت یان کەسایەتییا تەبیت، وەلمکر ئەز باوەڕ ژتە بکەم.
 من ژی گوتێ: تو تازە کەسەک گەنج و خواندەوار و دیارە خوەدان شیانی، بەردەوامبە، هیڤیدارم ڕۆژەکێ مالباتا تە ل تە خوەدی دەرکەڤن و ب هەڤدو شاد ببنەڤە. زەریێ گوت؛ چڤاک بهەمی چین و توێژێت خوەڤە، ژ بەر یەزدانی بەربوونە هەڤدۆ، دەرگەھڤانێن وی ژی، ژ بەر تابلۆیا لەشێ من بەربوونە هەڤدۆ. لێ ئەز دبێژم خودێ تێرا هەمی مرۆڤان دکەت، لێ ئەز تنێ تێرا ئاشقەکی دکەم، لێ نە خۆدێ و نە ئاشق تێرا دەرگەھڤانان ناکەت و ئەم ژبیردكەین، خودێ یێت سینگێ ئاشقاندا، لێ خەلک د پەرستگەهاندا لێدگەڕیت و ئەز چ جارەكێ ب مەخەلکەفتنا چڤاکی مەندەهۆش نەبوویمە، لێ دەما چڤاک یێ ڕازی بیت دەرگەھڤان دەری ل سەر بگرن، ل وی دەمی ئەز ژ کەڤلێ لەشێ خوە دەرکەتم و بێ واربووم.
 من ژی چ پەیڤ نەمان بۆ بێژم، تنێ ئەو نەبیت ئەڤە قەدەرە و هیڤیا ساخی و سڵامەتییێ من بۆ وێ خواست و ئەز رابووم چووم، بێی ئەوژی پرسیاربکەت، دی کیڤە چی. لێ مە هەردووكان زانی، دەرگەھڤانان بەرێ مەیێ دایە دووریا وەلاتی، خۆ ئەگەر دەرگەھڤانێن مە ژی وەك ئێك نەبن.