نەڤڕۆزا پیرۆز

نەوزاد ئامێدی

هەر مللەتەکی لڤێ جیهانێ، پیرۆزیێن خۆ یێن هەین و رێزێ ل وان پیرۆزیان دگرن و کڕێت ناکەن. هەبوونا پیڕۆزیا، نەک بەس بۆ خۆشی و ئاهەنگ گێرانایە، بەلکو نیشانا یەکبوون و یەک هەڵۆیستییێ یە و ئامڕازەکا گرنگە بۆ یەکگرتنێ و نیشانەکا گرنگترە بۆ هەبوونا نەتەوا، چۆنکە پیڕۆزی نە بەس دناڤ ئایناندا هەنە..
نەڤڕۆز ئێک ژ پیڕۆزییێن مللەتێ کوردە و بنەمایەکێ گرنگێ ڤی نەتەوییە. وەکی ئاخێ و زمانی و ئاڵای و خەلکێ وێ. د رۆژێن هەرە سەخت و دژواردا، نەڤڕۆز ببوو هەناسەک ژیانێ ژبۆ ڤی مللەتی، هەستێ نەتەوی و نشتیمانی ددلێ بچیک و مەزن و کاڵاندا گەشدکر. ئاگرێ نەڤڕوزێ، ئەگەر رۆناھیا شەمالەکا بچیک ژی بیت، د بۆ سیمبۆلێ بەرخودانێ و خۆڕاگرتنا ڤی نەتەوەی. ئەڤ ئاگرە بۆ گوریا وێ و روناھیا وێ جەرگێ دۆژمنێ کوردا دسۆت و بێ ئومێدیەک دناڤا واندا دڕۆست دکر و ھیڤیێن وان بۆ وان دکرنە کابویس و ئەڤێ روناھیا بچیک دگوتێ، ئەڤ مللەتە بن پێ نابیت و ئیرادا وی ناشکێت و دێ سەرکەڤیت.
 بەلکی راست بیت و کاوە و زحاک دوو ناڤ بن، دناڤا چیڕوکەکا ئەفسانەییدا. بەلکی ئاگر نیشانا ئاگرێ زرادەشتییا بیت. بەلکەی ئاهەنگا دستپێکا بهارێ بیت. بەلکی و بەلکی هەتا سوبەھی.. ھیچ ژ پیرۆزیا ڤێ رۆژێ د جەرگێ کەسێ کورد و مللەتێ کوردا کێم ناکەت. بابا نوئێل ئێک ژ ئەفسانەیێن هەرە مەزنێن دونیایێ یە، ئۆ ئەوڕۆپی باش دزانن کو چ راستی ژبۆ نینە و چیڕۆکەکە دلێ بچیکا پێ خۆش دبیت. لێ هەتا ئەڤرۆ زانا و شەھرەزا و قەشە و سیاسەتمەدار و پالە و جوتیار و ئیماندار و مولحد و ھتد، ڤێ رۆژێ و ڤی ناڤی ب پیڕۆزی تەماشە  دکەن. چۆنکە کولتورێ وانە و کەیفا بچیکێت وان خۆش دکەت و گرنژینێ دئێخیت لسەر لێڤێت وان، ژبەر ھندێ یا بوویە ئێک ژ پیرۆزیا ئەڤرۆ.
ئەڤجا دەرفەتێ نەدەن، کەسەک ناڤێ نەڤڕوزێ بشکێنیت یان ئاگرێ وێ ل بن هەر ناڤەکی بیت یان هەر ئەگەرەکی بیت ب ڤەمرینیت. هەر کەسێ ئەو وێرەكییە دا خۆ، دێ سوبە ب ساناھی وێرەكیا ھندێ ژی کەت، نەپاكیێ بکەت و وەڵاتی ب فرۆشیت و ئینکارا هەبوونا کوردا ژی کەت. ئەگەر ئەم نەشێین یاسایەکێ دەربێخین بۆ راوستاندنا ڤان جورە مڕۆڤا، ئەم دشێین دەنگێ وا کپ کەین ب سرۆدا ئەی رەقیب و چاڤین وان ب رۆناھیا ئاگرێ پیڕۆزێ تاڕی کەیین.