دوێنێ، لە سلێمانی، كۆنفرانسی ئامادەكاریی بۆ دووەمین دیداری گشتیی یەكێتیی نیشتمانیی كوردستان لە سلێمانی و چەمچەماڵ، بەڕێوەچوو.
لە كۆنفرانسەكەدا، كە ژمارەیەك لە لێپرسراوان و ئەندامانی مەكتەبی سیاسی و سەركردایەتی و ژمارەیەكی بەرچاو لە هەڤاڵانی سنووری مەڵبەندەكانی سلێمانی و چەمچەماڵ، ئامادەیبوون، گفتوگۆكرا لەسەر پرسە گرنگەكانی یەكێتی و سیاسەتی حزبەكە.
لە كۆنفرانسەكەدا، د.یوسف گۆران ئەندامی مەكتەبی سیاسی، وتاری لیژنەی باڵای كۆنفرانسی پێشكەشكرد و رایگەیاند: دیدار قۆناغێكی نوێی كاركردنی حزبییە لەناو یەكێتیی نیشتمانیی كوردستاندا و بە فراوانكردنی گفتوگۆكانمان، جارێكی دیكە بڕیاری سیاسی دەگەڕێنینەوە بۆ هەڤاڵان و كادرانمان.
هەر لە كۆنفرانسەكەدا، زیاد جەبار لێپرسراوی مەڵبەندی سلێمانی وتارێكی پێشكەشكرد و رایگەیاند: پێویستە دیدارەكەمان گۆڕانكاریی ریشەیی دروستبكات، وتیشی: لە توانای هەڤاڵەكانمان دڵنیاین، كە لەم دیدارەدا بە پرۆژەی نوێ و بیركردنەوەی نوێوە، پەنجە بخەینە سەر كێشەكان و هەوڵی چارەسەركردنیان بدەین.
