کەریم عەبدوڵڵا هەرتەلی
بەنداوی سەروچاوە یەکێکە لە بەنداوە جوانەکانی سنووری ناوچەی خۆشناوەتی، کە کەوتووەتە گوندی سەروچاوەی ناوەندی ناحیەی بێتواتە. لەسەر ئاوی گشتیی شارۆچکەکە بە گوژمەی «11 «ملیار دینار لەلایەن حکومەتی عیراقەوە بنیاتنراوە.
هەرچەندە وەک پێویست لەلایەن وەزارەتی سەرچاوەکانی ئاوەوە، ئاوڕی لێنەدراوەتەوە، بەڵام گەشتیارانیش وەک پێویست جوانی و پاکی ئەو بەنداوەیان نەپاراستووە.
بەڕێوەبەرایەتیی ناحیەی بێتواتە سەبارەی بەو بەنداوە چەند زانیارییەکیان بۆ کوردستانی نوێ-ی راپەڕین ئاشکراکرد و دەڵێن: لەساڵی «2005»ـەوە دەستکراوە بە دروستکردنی و لە ساڵی «2009»دا تەواوکراوە، رووبەرەکەی «113736» مەتر دووجایە کە توانای گلدانەوەی «500» هەزار مەتر سێجا ئاوی هەیە و لەسەر بودجەی حکومەتی فیدراڵیی عيراق دروستکراوە.
بۆ یەکەم جار لە ساڵی «2023» ئەو بەنداوە پاککرایەوە، دواتریش وەزارەتی کشتوکاڵی هەرێم، بە هاوکاریی تێکخراوی «GIZ»ـی ئەڵمانی بەبڕی «620» ملیۆن دینار نۆژەنی کردەوە.
ئەو بەنداوە بە مەبەستی ئاودێری و گەشتوگوزار بنیاتنراوە و دوو جۆگەی سەرەکی لەسەر هەڵدەبەسترێت بەناوی جۆگەی «سکتان، کاکی زیوە»، ئەوانیش چەندین جۆگەی تریان لێ جیادەبێتەوە کە ساڵانە دەیان دۆنم زەوی هەر لە گوندی سەروچاوەوە تا دەگاتە گوندەکانی «پوکەی سەروو و خواروو، گوندی ماران و قەرەنیاغا و گردجان بەراو دەکەن، لەوێشەوە درێژ دەبێتەوە بۆ دەشتی چوارقوڕنە و لەکاتی زستانانیشدا ئاوی ئەو بەنداوە بچووکە دەڕژێتە ناو زێی بچووکەوە.
بەنداوەکە سەرچاوەیەکی باشی سامانی ماسیيە و ساڵانە چەندان هەزار گەرای ماسی-ی تێدەکرێت، هەروەک لەبەر ئاوەکەشیدا دەیان حەوزی ماسی بەخێوکردن هەن کە سەرچاوەیەکی باشی بەرهەمهێنانی ماسین، لە دەڤەری راپەڕین، هەروەها لەگەڵ دەیان باخی جۆراوجۆریش کە لەبەر ئەو ئاوە بنیاتنراون.
لە رووی گەشتوگوزاریشەوە، ساڵانە لەهەر چوار وەرزدا گەشتیار سەردانی دەکەن، بەڵام لە وەرزی هاویندا ژمارەکەیان دەگاتە لووتکە، چونکە ناوچەکە فێنکە، بەمەبەستی مەلەکردن و خۆفێنکردنەوە و بۆنەکان و کات بەسەربردن رووی تێدەکەن و شەوانەش تا رۆژ دەبێتەوە جمەی دێ لە گەشتیار.
ماوەتەوە بڵێین: بەنداوەکە هەندێک کێشەی هەیە، ئەگەرچی بەڕێوەبەرایەتیی کارەبای رانیە رووناکی بۆ دابینکردووە و سەرۆکایەتی شارەوانیی سەروچاوەش لەچواردەوری بەنداوەکە، دەیان نەمامی چاندووە، بەڵام هێشتا لەڕووی سەوزایی و دابینکردنی ئاوی پاکی خواردنەوە و هەندێک پێداویستیی گەشتیارانەوە، گرنگی زیاتری پێویستە، بۆیە بە گەشتیاریکردنی بەنداوەکە لە قازانجی ناوچەکەدایە و هەلی کار بۆ دەیان گەنج دەڕەخسێنێ.
