رێژەی بارانبارینی ئەمساڵ نرخی گژوگیا بەهارییەكانی بەرزكردۆتەوە

ئا: رەوەست نەوزاد

لەگەڵ هاتنی وەرزی یەكەمی بارانبارین گژوگیا بەهارییەكانی كە بەشێوەیەكی خۆڕسك لە دەشت و دۆڵ و شاخەكان دەردەكەن، لەوانە (كەنگر، تۆڵكە، كاردی، رێواس، گورمزە، دۆمبەڵان، كوارك) و چەند جۆرێكی دیكە، بەڵام ئەمساڵ بەهۆی دواكەوتنی بارانبارین و كەمی رێژەكەی، نرخی ئەو گژوگیا بەهارییانە بەرزبۆتەوە و لەبازاڕەكان كەمتر دەست دەكەون.
سەعدیە عومەر، ژنێكی فرۆشیاری گژوگیا بەهارییەكانە لەبازاڕی سەیداوەی شاری هەولێر بۆ كوردستانی نوێ وتی: نرخی گیا بەهارییەكان بەراورد بەساڵی رابردوو گرانە، چونكە بارانبارین وەكو پێویست نەبووە و خەڵك كەمتر دەستیان دەكەوێت، بۆیە نرخی یەك كیلۆ تۆڵەكە 2 هەزار دینارە، كە بەشێكی هی وڵاتانی دراوسێیە.
وتیشی: نرخی یەك كیلۆ (كاردی) 7هەزار دینارە، هەروەها (كەنگر) 6 هەزار دینارە و گیای (گورمزە) ش نرخەكەی 3 هەزار دینارە. ئەو نرخانەش وایكردووە هەموو كەسێك نەتوانێ بیكڕێت، چونكە بەشی زۆری لە كڕیاران بەهۆی هەرزانی نرخەكانیان ئەو خۆراكانە دەكڕن.

خواردنی گیا بەهارییەكان سوودێكی زۆریان بۆ تەندروستی مرۆڤ هەیە، لە رێكخستنی رێژەی شەكر و رێكخستنی فشاری خوێنەوە بگرە بۆ كۆئەندامی هەرس و جگەریش

گوڵناز محەمەد، فرۆشیارێكی دیكەیە لەو بازاڕە پێیوتین: لەساڵانی پێشوو رێژەیەكی زۆر لە  بەرهەمی خۆڕسك و گیا بەهارییەكان دەهاتە بازاڕ، خەڵكیش داواكاریی زۆری هەبوو، بەڵام ئەمساڵ رێژەكەی كەمترە، بەتایبەتی لەسنووری هەولێر بەهۆی كەمیی بارانبارین كەمتر دەبێتە بازاڕەكان.
باسی لەوەشكرد: بەشی زۆری فرۆشیارانی گیا بەهارییەكان بازاڕی سەیداوە و شێخەڵڵا لەشاری هەولێر لە ژنان پێكدێت، چونكە كارەكەی تایبەتە بەژنان و ئێمە زیاتر شارەزای پاككردنەوە و ناسینەوەی جۆرە باش و خراپەكانین، هەرچەندە خێری ئەو كارە زۆر نییە، بەڵام باشترە لەوەی بێكاردابنیشین.
حسێن محەمەد وەك جوتیارێك لەدەشتی شەمامك و سەرۆكی لقی هەولێری یەكێتی جوتیاران لە شاری هەولێر لەبارەی گیا بەهارییەكان وتی: ئەمساڵ گیای بەهاری زۆر كەمە كە لەهەندێك ناوچەی دەشتی هەولێر وەكو قەرەچووخ و زورگەزراو، بەهیچ شێوەیەك نەڕواوە، كە لەساڵانی رابردوو رێژەیەكی زۆری لێبەرهەم دەهات، نموونە گیای وەكو (تۆڵەكە) لەشاخەكان ناڕوێت، بەڵكو لەناو زەوییە نەرمەكان و دەشتیاییەكان هەن، ئەمساڵ تەنیا لەو شوێنانە روواون كە بۆ كشتوكاڵ ئاو دراون، سەبارەت بە گیای بەهاری كەنگرو كاردی بەهەمان شێوە ئەمساڵ لەزۆر ناوچەكان بەهیچ شێوەیەك نەڕواوە.
وتیشی: دۆمبەڵانیش یەكێكە لەو بەرهەمانەی نرخی لەهەموو گژوگیا بەهارییەكان بەرزترە و رێژەكەی كەمە، ئەوانیش ئەمساڵ بەهۆی كەمی بارانبارین رێژەكەیان زۆر كەمە، ئەگینا دەبوایە ئێستا رێژەیەكی زۆر لەبازاڕەكان بۆ فرۆشتن هەبوایە، بەتایبەتی دۆمبەڵانی ناوچەی قەرەچۆوخ، بۆیە دەبێت لە رۆژانی داهاتوو چاوەڕوانی شین بوونی گیا بەهارییەكانی ناوچە شاخاوییەكان بكەین.
دكتۆر خاڵس قادر، پزیشكی پسپۆر لەنەخۆشیەكانی هەناو و دڵ لە شاری هەولێر لەبارەی سوودەكانی گیا بەهارییەكان وتی: خواردنی گیا بەهارییەكان سوودێكی زۆریان بۆ تەندروستی مرۆڤ هەیە، سوودەكانیش بریتین لە رێكخستنی رێژەی شەكر و رێكخستنی فشاری خوێن و سوودی بۆ كۆئەندامی هەرس و جگەریش هەیە.
وتیشی: لەبەر ئەوەی خواردنی تەندروست و زۆر باشن، دەتوانرێت لەماوەی وەرزی بەهار هاوڵاتیان زیاتر پشت بەو خواردنانە ببەستن، هۆكارەكەشی بۆ ئەوە دەگەڕێتەوە كە ئەو خۆراكانە پڕن لەڕیشاڵ و ڤیتامینی جۆراوجۆر و كانزا و جۆری شەكری سوودبەخش.
ئەو دكتۆرە ئەوەشی ئاشكرا كرد: لەگەڵ خواردنی ئەو خۆراك و گیا بەهارییانەش لەلایەن هاوڵاتیانەوە، دەبێت خاڵێكی گرنگ پەیڕەو بكەن، ئەویش پاكوخاوێنی ئەو گیا و خۆراكە بەهارییانەیە، چونكە لە ئەگەری پیسبوونیان لەوانەیە مرۆڤ تووشی نەخۆشی سكچوون و رشانەوە  بكات.
خواردنی گیا بەهارییەكان سوودێكی زۆریان بۆ تەندروستیی مرۆڤ هەیە، لە رێكخستنی رێژەی شەكر و رێكخستنی فشاری خوێنەوە بگرە بۆ كۆئەندامی هەرس و جگەریش.