لە یادی سەدو بیست و حەوت ساڵەی رۆژنامەگەریی كوردیدا، گەرمترین پیرۆزبایی لە رۆژنامەنووسانی كورد و لە کایەی میدیایی کوردستان دەكەین كە توانیویانە لێبڕاوانە گەشە بەو بوارە بدەن.
ئەگەرچی كاروانی رۆژنامەگەریی كوردیی لە سایەی داگیركەراندا چەندین ساڵی سەختی لە هەڕەشەی داخستن و راوەستان بینیوە، بەڵام لە پاش راپەرینی ساڵی ۱۹۹۱ وە دەتوانرێت بوترێت رۆژنامەگەریی كوردیی جۆرێك لە بەرفراوانبوونی ئازادییەكانی بەخۆوە بینی و خۆشبەختانە تا ئێستاش بەردەوامە.
یەكێتیی نیشتمانیی كوردستان هەر لەسەردەمی خەباتی شاخەوە گرنگییەكی بەرچاوی بە دابینكردنی ئازادی بۆ رۆژنامەگەریی و روناكبیری داوە و دروشمی (نان و ئازادی)ی پڕاو پڕ جێبەجێكردووە، هەر بۆیە لە پاش راپەرینەوە لەسەر هەمان دیدی سەرۆك مام جەلال، گشت هەوڵێكی خستۆتەگەڕ بۆ بەرفراوانكردنی ئازادییەكانی رۆژنامەگەری و یەكەمین رۆژنامەو دامەزراوی میدیایی ئەهلی و سەربەخۆ لە ناوچەكانی دەسەڵاتی یەكێتیدا دەرفەتیان بۆ رەخسا و لێرەوە كاروانی رۆژنامەگەری كوردیی بێوچان پێشدەکەوێت.
هەر لەم یادەدا جارێكی تر پشتیوانی خۆمان بۆ رۆژنامەنووسانی وردبین و راستبێژ و پشت بەستوو بە سەرچاوەی هەواڵ دووپاتدەكەینەوە، بە جۆرێكی وەها كە لە سەرتاسەری كوردستاندا پانتایی ئازادییان بۆ فراوانتر بكرێت و کایەی ئازادیی سیاسی و رۆژنامەگەری بێ بەربەست و کەیسی ناڕەواو هەڵبەستراو هەرگیز تەنگ نەکرێتەوە.
میللەتەکەمان شایانی ئازادیی زیاترە و ئازادی و دیموکراسیش پایەی سەرەکی شانازیمانە بە ئەزموونەکەمانەوە لە سەرتاسەری جیهاندا.
جارێکی تر پیرۆزە.
مەکتەبی سیاسیی
یەکێتیی نیشتمانیی کوردستان
