راپۆرت: بادینان
شكەفتا چارستین ل باكورێ باژێرێ دهۆكێ نە بتنێ جهەكێ شوینەواریە، بەلكو ب كومەلگەهەكا شوینەواری یا گرنگ دهێتە ناسكرنێ و چەندین جهێن شوینەواری بخەڤە دگریت، وەكی: پەرستگەها شكەفتا چارستین، جهێن پیشەسازی و هەبوونا كارگەهێن جودا و ئەڤ جهێ شوینەواری ژی بۆ بەری (2700) سالان ڤەدگەریت، كو پەرستگەهەكا ئایینێ زەرەدەشتیان بوو و د باوەریا باوەردارێن ڤی ئایینی دا، كو (ئاڤ و ئاخ و هەوا) د پیرۆزن، بوویە مریێن خوە دناڤ ئاخێ دا نە دڤەشارتن و جهێن تایبەت بۆ هەبوون. نوكە ئەڤ دەڤەرا شوینەواری كەفتیە د بەرنامێ سەخبێریكرنێ و پویتەپێدانێ دا و ب هەماهەنگیا هەر ئێك ژ پارێزگەها دهۆكێ و سەرۆكاتیا باژێرڤانی و گەشت و گوزاری و رێڤەبەریا كارەبا دهۆكێ كارێن زێدەتر بۆ دهێنەكرنێ، وەك دروستكرنا رێكێ و برنا رۆناهیێ، دا كو ببیتە دەرگەهەك ژبۆ گەشتیاران ئەڤێن قەستا پارێزگەها دهۆكێ دكەن. د. بێكەس بریفكانی رێڤەبەرێ گشتی یێ گەشت و گوزارا دهۆكێ گوت: «ڤەكرنا جهێن شونەواری، دێ بیتە دەرگەهەك ژبۆ كو بەرێ گەشتیارێن ناڤخو و بیانی بكەڤیتە دهۆكێ و مە گەلەك جهێن شوینەواری هەنە وەك یێن ئاینی و سرۆشتی و یێن شونەواری ژی و ئەڤە نموونا پەرستگەها چارستین هاتەڤەكرنێ و دێ كارتێكرنەكا باش ل سەر گەشت و گوزارێ دهۆكێ كەت». لدوور گەشتیاران و ئەڤێن سەرەدانا باژێری دكەن، كا وان دڤێت سەرەدانا چ جه بكەن، خودانێ ئێك ژ دكانێن ناڤا بازارێ دهۆكێ دبێژیت: «ل رۆژێن بێهنڤەدان و جەژن و هەلكەفتان، گەشتیار ژ ناڤەراست و باشورێ عیراقێ زێدەتر دهێنە دهۆكێ و گەلەك ژوان پرسیاران ژمە دكەن، ئایا چ جهێن شوینەواری ل دهۆكێ هەنە ئەم سەرەدانا وان بكەین و ئەم پێشنیارا سكرێ دهۆكێ و شكەفتا چارستین و چیایێ زاوا ددەینێ». خەلیل یاسین كو تەمەنێ وی نزیكێ چل سالانە زێدەتر گوت: «بلا راستی بیت، ئەگەر ژ گەشتیاران نەبیت، لڤین دناڤ بازاریدا نینە و تایبەت ل وی دەمێ مووچە گیرۆ دبیت و ب ڤەكرنا جهێن شوینەواری، گەشتیار دێ قەستا باژێری كەن و دێ بیتە دەرگەهەكێ ئابوری و كاركرنێ بۆ خەلكی ژی، ئەڤە ژبلی كو ئەم جهێن خوە یێن شوینەواری و كەلتورێ خویێ باب و باپیران نیشا وان بدەین».
