ل دهۆكێ دیاردەیا سەیرانێن گوندان بەردەوامی هەیە

نڤیسەرەك: زانكۆ دشێت مفای ژ سەیرانێن گوندان وەربگریت

راپۆرت: ئاڤدو

بۆ ماوێ چەند سالانە و هەر دەما وەرزێ بهارێ دگەهیتێ، ل دهۆكێ سەیرانێن گوندان دەستپێدكەن و سەرەرایی هندەك دبێژن ئەڤ سەیرانێن هەنێ ئەگەرەكن بۆ بهێزكنا دەستهەلاتا عەشیرەتێ و ناوچەگەریێ و دویركەفتنێ ژ ئێك، لێ د بەرامبەردا هندەكێن دی دبێژن نەخێر، ئەڤ سەیرانێن هەنێ بۆ بهێزكرنا شیرازێ پێكڤە ژیانێ یە و ئاڤەدانكرنا گوندی و ب دیتنا نڤیسەرەكی ژی، سەیرانێن گوندی ژ گەلەك ئالیانڤە د گرنگن، بۆ نموونە برێكا رێكخستنا ڤان سەیرانان، دێ دیرۆكا گوندی و شێوازێ ژیانێ ل گوندی بۆ نفشێ نوی هێتە روونكرن و ڤەگوهاستن، كانێ چاوان باب و باپیرێن وان ژیان ل گوندی دكر.
ئێك ژ هاولاتیێن گوندێ لیناڤا، بەحسا سەیرانا گوندێ لیناڤا دكەت و دبێژیت: «بۆ رێكخستنا سەیرانا گوندی، پێش وەخت ئەم خەلكێ گوندی ئاگەهدار دكەین و جهەكی دەستنیشان دكەین كو سەیران لێ بهێتەكرنێ و ئەو جهێ هەنێ دڤێت یێ گونجایی بیت بۆ سەیرانییا و ئەم هەمی پێداویستیێن سەیرانێ بەرهەڤدكەین وەك جهێ دەستشوویێ و پەیداكرنا ئاڤێ بۆ خوارن و ڤەخوارنێ و تا جهێ روونشتنێ دڤێت هەبیت و جهەكێ بەرفرەه بۆ كرنا ئاهەنگێ و داوەتان». فەتحی لیناڤای زێدەتر گوت: «سەیرانێن گوندان مە گوندیان نزیكی ئێك دكەن، ئەم زێدەتر ئێك و دوو ناسبكەین، تایبەت تەخا گەنجان كو نوكە پرانیا خەلكێ گوندی ل باژێری دژین و لڤێ رۆژێ هەمی بزاڤێ دكەن دڤێ سەیرانێ دا بەرهەڤ ببن و ئەڤە ژی پێنگاڤەكا باشە، ئەم حالێ ئێك و دوو ژ نزیكتر بزانین و هەر ئێكی رەوشا وی چاوانە و دیسان خەلكێ گوندی و گەنج ئێك و دوو ناس بكەن و دیرۆكا و جوگرافیا گوندێ خوە ناس بكەن». 
ئێك ژ رێكخەرێن سەیرانا گوندێ رەشاڤە و د هەمان دەمدا نڤیسەرە و سالانە بۆ سێرانا گوندێ خوە بەلاڤۆكەكا هەشت لاپەرێ دەردئێخن گوت: «سەیرانێن گوندان ژ گەلەك روویانڤە دگرنگن، بۆ نموونە خەلكێ گوندی و ب تایبەتی تەخا گەنجان ژ نزیك ئێكودو ناسدكەن و نوكە گوندێ مە یێ بوویە جهەكێ دویرە دەست، ژبەر كێشێن سیاسی ئەم نەشێین سەرەدانێ بۆ بكەین و نەهاتیە ئاڤەدانكرن، لێ خەلكی و تایبەتی تەخا گەنجان، مەرەقە بزانن خەلكێ گوندی ل وی سەردەمێ گوند ئاڤا، چاوان دژیان و ژیانا خوە چاوان دەربازدكرن و ئاستەنگێن ژیانكرنێ لدەف وان چبوون». ئەدیب عەبدوللا رەشاڤەیی، زێدەتر گوت: «ئەم بۆ سەیرانێن گوندی سالانە بەلاڤۆكەكێ دەدرئێخین و ل سەر گوندیان بلاڤەدكەین و مەبەستا مە، برێكا ڤێ بلاڤۆكێ خەلكێ گوندی ئاگەهیان بزانیت، یێن گرێدایی گوندی و چالاكیێن خەلكێ گوندی د هەمی بوارەكیدا». رەشاڤەیی ب گرنگی زانی زانكۆ ژی مفای ژڤان سەیرانان و بلاڤۆكێن ئەو دەردئێخن وەبگریت و گوت: «ژبەركو دیرۆكا مە نەهاتیە نڤیسین، ئەڤ سەیرانێن هەنێ دشێن هندەك ڤالاهیێ پر بكەن، زانكۆیێن مە ژی دشێن مفای ژ بیرۆكا بەلاڤۆكێن سەیرنێن گوندان وەربگرن، قوتابی ڤەكولینێن خوە یێن دەرچوونێ ل سەر گوندێن خوە چێكەن، دیرۆكا گوندی، ئاكنجیێن گوندی، جوگرافیا گوندی، ژێدەرێن ژیانێ و تا دگەهیتە ئایا گوند چەند جاران هاتیە خرابكرن و نوكە گوند ئاڤایە یان نە و ئەڤێن هەنێ هەمی دێ بنە ئەرشیفەكێ و مێژوویەك و داتا و زانیاریێن پارێزگەهێ بخوە دێ ل بەر دەست بن، كو مخابن ژ روویێ مێژوو و جوگرافیا خوەڤە، مە گەلەك كێماسی هەنە».