زاگرۆس بەرواری
ئەڤ شەهیانا ئەز ژێ بەحس دكەم، ل ئێك ژ گوندێن باكورێ كوردستانێ یە و ب تایبەتی ژی دەڤەرا (جولەمێرگێ و سولەهێ) و ئەز ژی ئێك ژ داخوازكریێن ڤێ شەهیانێ بووم و دێ هندەكێ بەحسا دابونەریتێن كوردێن مە یێن ڤێ دەڤەرێ كەم، پێشوازیا وان بۆ داخوازكریێن سەر شەهیانێ، ڤەگوهاستنا بووكێ و دانا سەر سبەحیێ و چەند بابەتێن دی یێن كورت، ب مەبەستا ئەم ژ نێزیك هایداری هەمی دەڤەرێن خوە یێن كوردی ببین و بزانین دابونەریتێن وان چاوانن.
پشتی مە خوە بەرهەڤکری، ژ بۆ مەبەستا شەهیانێ و دێ بووکێ ژ ناڤەندا جۆلەمێرگێ بۆ دەڤەرا سولەهێ ڤەگوهێزین، کو 20 کیلۆمەتران دوورە. بووک ژ هوزا پنیانشیانە، لێ زاڤا ژ دەڤەرا سولەهێ یە. ل گۆرەی چاند و تیتالێن دەڤەرا جۆلەمێرگێ، کو نێزیکی چاندا بەهدینانن، پشتی مە بووک ژ مالا بابێ وێ بری. لێ هندەک ژ کەسێن مالێ پشتە دەری وەرگرتن و پاشی ل بەر دەرگەهێ مالێ بابێ بووکێ ب چاڤێن گریڤە خاتر ژ کچا خوە خواست. پشتی ئەم برێکەفتین، چەپا بووکێ ژی ب داوی هات. ئەم گەهشتینە دەڤەرا گوندێ سادینا و د ڕێکێدا مە چەند بووسەیێن زارۆکان ژ ڕێکا خوە ڕاکرن، لێ پشتی کو دراڤەکێ باش ژمە وەرگرتی.
ل گۆرەی چاند و تیتالێن کوردان، پشتی ئەم نێزیکی گورەپانا جهێ شەهیانێ بووین. زاڤا هاته پێشیا بووکێ و خێلی ل سەر سەر و چاڤێن وێ راکر. بووک برە جهێ وێ یێ تایبەت و زاڤا ژی ئینا جهێ وی، کو جهێ بووک لێ، ئالیێ خانما بوو، جهێ زاڤای ژی مێر د روونشتی بوون. واتە جهێن وان ژێک جودابوون، ره سپی و مەلا و کەساتیێن جڤاکی، هەر هەموو هاتبوونە داخوازکرن و پرانییا وان د ناڤ شەهیانێ دا بەرهەڤبوون. لێ خوارن ژ بال مالباتا زاڤای ڤە هاتبوو بەرهەڤکرن، چەندین گارەش و بەران هاتبوونە سەرژێکرن. خوارنەکا کوردەواری یا بەرفرەه بوو. ژ لایێ دیڤە چەندین، سترانبێژ و هونەرمەند ب سازبەندێن خۆڤە، بەرهەڤیێن باش هاتبوونە کرن. لێ دەما ئەز گەهشتیمە مەیدانا شەهیانێ، ژ ڕەوشتێ خۆ یێ باش، پێشوازیەکا گەرم ل مە کرن. ئەز برمە دناڤبەرا مەلایێ گوندی و سەرۆکێ شارەداریا سولەهێ دا، کو کەساتیێن هیژانە. لێ دەما من گۆت: شارەدار ژ کیژان پارتیێ هاتیە هەلبژارتن؟ بەرسڤ گۆتی: پارتیا دەستهەلاتدارە، واتە AKP و پەسنێن جوامێریا وی کرن. من ژی ب دلخۆشی دیدارا وی پێشوازی کر. لێ دگەل هندێ ژی، دەرگەهێ سیاسەتێ ڤەبوو، لێ ژ بۆ بەرسڤا مامۆستایێ ئۆلی و شارەداری، تەنێ من گۆتێ یا گرنگ دیالۆگ و ڕێیێن ئاشتیێ نە و ب چەک و کوشتنێ چ دۆز ناهێنە چارەسەرکرن و چ مللەت ژی ژ هۆلێ ناهێنە ڕاکرن. واتە یەک ڕێک هەیە ئەو ژی ئاشتی و براتی یە و ژ جوامێریا خوە دیتنا مە پەژراندن. دەمەک دەرباز بوو، مە دیت ڕێڤەبەریا HDP ژی ژ باژێرێ جۆلەمێرگێ هاتن، دیسان وەک هەرجار ژ چەند ژن و مێرەکا پێک دهاتن. هندەکێ ب کەلەجان بوون. دەمەکێ ئاماژە ب پارتیا خوە کرن و من وەسا زانی گەلێن ل سولەهێ گرێدای پارتیا دەستهەلاتدارن. لێ هەموویان پێکڤە دەست بۆ گۆتارا وان قوتان. ئانکو، دیارکر هەر دێ دەستهەلات بۆ HDP زڤریت. لێ دەما گۆڤەند دکێشا، ڤیان ئەز و ئەو پێکڤە گۆڤەندێ بگرین و ئەو ژی ئاماژەکا باش بوو، دا دیارکەن کو براتیا کوردان یا بهێزە و ب براتیێ دشێن بگەهنە هەموو ئارمانجێن بلند یێن گەلێ خوە.
لێ خالا سەرەکی د ناڤ ڤان شاهیاندا ئەوە دەما زێر و زینەتێ بووکێ ب دەنگەکێ بلند دبێژن: زێر و زینەتێ بووکێ ڕادخنە بەرچاڤێن داوەتیان، دگەل هندێ ژی جهێ زاڤا لێ کەسەکێ خواندەڤان و جهێ باوەریێ یە. وەک برازاڤا ل تەنشتا زاڤایە و سندۆقەک ژی یا بەرهەڤە دگەل زەرفێن ناما. تو بێژی سندۆقا دەنگدانێ یە. هەر کەسێ بچیتە سەرێ زاڤای، دێ دراڤێ خوە کەتە د زەرفیدا و ناڤێ خۆ ل سەر نڤێسیت و خەلاتێ زاڤای کەتە د سندۆقێ دا. کو بەری چەند سالان ئەڤ چاندە ل دەڤەرا مە ژی د هاتە پەیرەوکرن و ئەز پشتەڤانم و کارەک پیرۆزە و پشتەڤانیەکا بهێزە، بۆ هێلینەکا نوی. ئەڤ چەندە وەک چاند یا هاتیە پاراستن، لێ ئالیەکێ دی یێ شاهیێ زەلام جودا شاهیێ دکەن و ژن ژی جودا دکەن. زاڤا جودا هاتە شاهیا زەلامان و بووک جودا چوو شەهیانا خانمان.
پشتی چەند وێنەک بۆ بیرهاتن و خواتر خواستنێ مە گرتین، شاهی و گۆڤەند ب داوی هات. لێ گەلەک باران باری و پێن مە بوونە هەری و بووک ب خوارنا ڤەرەنکێ هاتە گونەهبارکرن، گۆتی بووکا مە گەلەک ڤەرەنک خواریە، بوویە هندە باران یا د باریت. لێ سوپاسدارێن یەزدانێ پاک و دلۆڤان بوون. پشتی سندۆقا خەلاتێن زاڤای كو ب سەر سبەحی دهێتە ناڤكر و هاتیە ڤەکرن، شونی مە نرخێ خەلاتان باشتر زانی. نێزیکی 145 ملیارێن لیرێ تورکی بوون. واتە نێزیکی، 14 ملیۆن دینارێن عێراقی بوون.
