مهاباد ئەنوەر
ڕۆژێ ب ئەڤینەكا مەزن، گەرماتییا خوەدا بەژن و بالا وێ یا ئەڤە چەندین سالە دناڤ سەرمایەكا هشكدا خوە ڕاپێچایی. جل و بەرگێن چەندین سالە ڕاكرین، كرنە بەرخوە. داڤێن پرچا خوەیا دڕێژ كرنە خەلەك و بەردانە سەر وان ملێت گران، ئەوێت ئەڤڕۆكە دێ سڤك بن. هەر فرچەیەكێ ب دێمی وێ دكەڤیت، جوانیەكا هاتیە مراندن دئینیتە د ژیانێدا. ئەو خودیكا ل بەرامبەری وێ، چەند كچەكا ژێهاتی دبینیت.
دەم هات، بۆ ژڤانێ چەندین سالە چاڤەڕێی بووم بچم. تیڕۆژكێن ڕۆژێ، تیشكێن خوە بەردانە سەر ڕوویێ ئەردی، تو دبێژی ئەو ژی دگەل من بكەیفن.
ژڤانەكە، دێ ناخەكی ڤالا كەت. ئەو ڤیانا كەسێ نەگوتی، ئەو خەونێن ب سالایە بتەڤە دبینم و یا ژ هەمییێ گرنگتر، دێ پسیاركەم، ئەرێ تەژی ئەو ئەڤین دیت؟
گەهشتم جهێ ژڤانێ، ب چاڤان لهەمی مێزا تەماشەكر و هێشتا پر نەبوویە ژ وێ دیتنا چاڤەرێ دكەم، ژ وێ غەریبیا ب دەر و كەدەر، وەكی بالندەیەكا بێ چەنگ روینشتم خواڕێ. چەند دەمژمێرەك بورین، هەر نەهات. ما دێ كەنگی ترازیا هاتن و نەهاتنێ یەكسان بیت! لێ هەر ژ وێ چاڤەرێ بوونێ نە ب زحمەترە، یا ئەڤە چەند سالە دناڤ خوەدا دبیتە شەمالكەكا چاڤەرێكری.
دگەل ڤەبوونا دەرگەهێ خوارنگەهێ، بایەكێ نەرمێ تژی ئازار ب ژوور كەفت، چ بەژنەكا زڕاڤ و دێمەكێ وەستایی ب هەمی جوانیا خوەڤە بەرەڤ چاڤەرێبوونا، هندە دوماهیكە دهێت.
ئالۆزیێ وەكی دارا دارئالینكێ پێن من ڕاپێچان، شییانێن رابوونێ بێ هێزكرن. چۆك بۆ خوە دڕەجڤن. ناخی گازیی كر، ڕابەڤە دا ب ڕێزڤە پێشوازیێ بكەین، دڤێت لاوازیا مە نەبینیت.
ڕابووم، وەكی لەشكەرەك بەرامبەر دۆژمنێ خوە هێزا سەركەفتنێ نیشان ددەت. سەرێ خوە بلندكر و دەستێ خوە دڕێژكر بەرامبەر ئەڤینەكا ب كەدەر. گەرماتییا دەستێ وی، هشیاركرم. ڕۆندكێن گەرم ب سەر ڕوویێ مندا دهێن خوارێ، ل سەر لاپەرەیەكێ سپی و ب پێنووسەكێ ڕەش و سەرێ وی رساسی، پیتان دادڕێژم و دوماهیك ژڤان ژی، نەشیام تە بینم زمان!
ژوورەكا تژی پەرتووك و ڕۆناهییەكا لاواز، مێزەكا بچووك دگەل چەند لاپەرەكێن كێم، نڤێسەرەكێ هێژا دڤیا چەند بابەتێن جڤاكی و ڕەوشەنبیری ب ڕێكا چیڕۆكێ ڕەخنەیا خوە بدەت. لێ ئەو نڤێسەرە دەستكردە و خەیالا كچەكا بلیمەتە. كەزییەكا درێژ، ب ڕەنگێ ڕەش و سپییەكێ تام پەمبی تێكەلكریە ل سەر بەرەكی. هنداڤی كانییەكا زۆزانا ڕۆنشتییە، دەنگێ پەزی تێكەلی ئاوازا بهارێ بوویە. پێنووسا وێ، نە نەخشەیێ زۆزانەكێ، بەلكو باژێرەكێ دناڤ قرێژا خۆەدا بەرزە دنڤێسیت. ئەو ژڤانە دوماهیك نەبوو، بتنێ خەیالەكا بێ بنەما یە.
